ໂຮມຊຸມນຸມຊົມເຊີຍວັນສ້າງຕັ້ງສະຫະພັນກຳມະບານລາວ ຄົບຮອບ 65 ປີ

ໃນວັນທີ 1 ກຸມພານີ້, ສະຫະພັນກໍາມະບານລາວ ໄດ້ຈັດພິທີໂຮມຊຸມນຸມສະເຫລີມສະຫລອງວັນສ້າງຕັ້ງສະຫະພັນຂອງຕົນຄົບຮອບ 65 ປີ (1 ກຸມພາ 1956 – 1 ກຸມພາ 2021) ຂຶ້ນຢູ່ຫໍປະຊຸມແຫ່ງຊາດ ນະຄອນຫລວງວຽງຈັນ, ໂດຍການເປັນປະທານຂອງ ທ່ານນາງ ອາລີ ວົງໜໍ່ບຸນທໍາ ປະທານສູນກາງສະຫະພັນກໍາມະບານລາວ ແລະ ເຂົ້າຮ່ວມຂອງ ທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ.

ໃນພິທີ, ທ່ານ ປະທານສູນກາງແນວລາວສ້າງຊາດ ໄດ້ຍົກໃຫ້ເຫັນກ່ຽວກັບປະຫວັດຄວາມເປັນມາ, ຄວາມໝາຍຄວາມສໍາຄັນ ແລະ ການເຕີບໃຫຍ່ຂະຫຍາຍຕົວຂອງການສ້າງຕັ້ງສະຫະພັນກໍາມະບານລາວຕະຫລອດໄລຍະ 65 ປີຜ່ານມາ, ຊຶ່ງສະຫະພັນກໍາມະບານລາວ ໄດ້ເຮັດໜ້າທີ່ຂອງຕົນຢ່າງແຂງແຮງໃນການເປັນຕົວແທນເພື່ອປົກປ້ອງສິດ ແລະ ຜົນປະໂຫຍດຂອງກໍາມະກອນ, ຊາວຜູ້ອອກແຮງງານລາວບັນດາເຜົ່າ, ແມ່ນກ້ອນກໍາລັງແຮງທີ່ສໍາຄັນທີ່ມີນໍ້າໃຈເສຍສະຫລະອັນພິລະອາດຫານເຂົ້າໃນຂະບວນການຕໍ່ສູ້ປົດປ່ອຍຊາດໃນເມື່ອກອນ ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ.

ໂອກາດນີ້, ກໍໄດ້ມີການປະດັບຫລຽນກຳມະບານຊຶ່ງເປັນຫລຽນກາສູງສຸດຂອງສູນກາງສະຫະພັນກໍາມະບານລາວໃຫ້ທ່ານ ປະທານສູນກາງແນວລາວສ້າງຊາດ ທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນວຽກງານກຳມະບານຕະຫລອດໄລຍະຜ່ານມາ.