ໄບເດັນ ຫັນທິດມາສົນໃຈ ອາຊີ ຫຼາຍຂຶ້ນ

ໜັງສືພິມ Politico ຂອງສະຫະລັດ ລາຍງານ ວັນທີ 1 ກຸມພານີ້ວ່າ ປະທານາທິບໍດີ ໂຈໄບເດັນ ກຳລັງຫັນທິດ ໃຫ້ບູລິມະສິດຕໍ່ ອາຊີ ຫຼາຍຂຶ້ນ.

ທີ່ປຶກສາຄວາມໝັ້ນຄົງແຫ່ງຊາດຂອງສະຫະລັດອາເມລິກາທ່ານ Jake Sullivan ໃຫ້ຮູ້ວ່າ ໄດ້ມີການປ່ຽນແປງໃນຄະນະສະພາຄວາມໝັ້ນຄົງແຫ່ງຊາດ ດ້ວຍວິທີການຫຼຸດ ຈຳນວນພົນທີ່ຮັບຜິດຊອບບັນຫາ ຕາເວັນອອກກາງລົງ ແລະ ເພີ່ມຈຳນວນພົນທີ່ດູແລບັນຂົງເຂດ ອິນເດຍ-ປາຊີຟິກຫຼາຍຂຶ້ນ. ທ່ານ Politico ໃຫ້ຮູ້ວ່າ ທ່າທີດັ່ງກ່າວ ສະແດງວ່າ ປະທານາທິບໍດີ ໂຈໄບເດັນ ຈະຫັນທິດມາສົນໃຈ ອາຊີຫຼາຍຂຶ້ນ ຊຶ່ງເປັນນະໂຍບາຍຫຼັກ ໃນວຽກງານຕ່າງປະເທດຂອງສະຫະລັດອາເມລິກາ.

ຫຼັງການຮັບຕຳແໜ່ງໜຶ່ງວັນຂອງ ໂຈໄບເດັນ, ທ່ານ Jake Sullivan ໄດ້ລົມໂທລະສັບກັບຄູ່ຮ່ວມຕຳແໜ່ງຂອງ ຝຣັ່ງ, ເຢຍລະມັນ, ອັງກິດ, ຍີ່ປຸ່ນ, ສ ເກົາຫຼີ. ພາຍຫຼັງຮັບຕຳແໜ່ງແລ້ວ, ໄບເດັນກໍໂທລະສັບກັບການນຳຂອງປະເທດ ການາດາ, ແມັກຊິກໂກ, ອັງກິດ, ຍີ່ປຸ່ນ ແລະ ປະທານາທິບໍດີ ວະລາດີເມຍປູຕິນ. ນອກຈາກນັ້ນ ທ່ານ Jake Sullivan ຍັງໄດ້ແລກປ່ຽນຄຳຄິດຄຳເຫັນກັບຄູ່ຮ່ວມຕຳແໜ່ງຂອງ ອາຟການິສະຖານ ແລະ ອິດສະລາເອວຕື່ມອີກ ແຕ່ປະທານາທິບໍດີ ໄບເດັນຍັງບໍ່ທັນໄດ້ຕໍ່ສາຍລົມກັບບັນດາປະເທດເຫຼົ່ນນັ້ນ.