ທ່ານ ນາຍົກລັດຖະມົນຕີ ທອງລຸນ ສີສຸລິດ ເນັ້ນໃຫ້ຂະແໜງສາທາ ສືບຕໍ່ພັດທະນາວຽກງານ ໂດຍສະເພາະວຽກງານ 5 ດີ 1 ພໍໃຈ

ໂອກາດເຂົ້າຮ່ວມປິດກອງປະຊຸມສາທາລະນະສຸກທົ່ວປະເທດ ຄັ້ງທີ VIII ໃນວັນທີ 29 ມັງກອນນີ້ ຢູ່ການຮ່ວມມືສາກົນ ແລະ ເຝີກອົບຮົມ (ICTI) ນະຄອນຫລວງວຽງຈັນ, ທ່ານ ນາຍົກລັດຖະມົນຕີ ທອງລຸນ ສີສຸລິດ ໄດ້ ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດຂອງວຽກງານສາທາລະນະສຸກໃນ 5 ປີ ຜ່ານມາ.

ພ້ອມທັງເນັ້ນໃຫ້ຂະແໜງສາທາລະນະສຸກ ສືບຕໍ່ພັດທະນາວຽກງານໃຫ້ມີຜົນສຳເລັດຍິ່ງຂຶ້ນ, ເປັນຕົ້ນການຮັກສາມູນເຊື້ອແພດປະຕິບັດໃນການເປັນແພດທີ່ດີ ແລະ ມີນຳໃຊ້ຮັບໃຊ້ປະຊາຊົນຢ່າງແທ້ຈິງ, ເປັນເຈົ້າການເອົາໃຈໃສ່ປະຕິບັດແຜນພັດທະນາແບບຍືນຍົງຂອງວຽງການສາທາກຳນົດໄວ້ ເພື່ອປະກອບສ່ວນເຂົ້າໃນສະພາບແວດລ້ອມເຮັດໃຫ້ປະເທດຊາດຫລຸດພົ້ນອອກຈາກປະເທດດ້ອຍພັດທະນາ ແລະ ພ້ອມກັນນຳເອົາມະຕິກອປະຊຸມໃຫຍ່ຄັ້ງ 11 ຂອງພັກມາຜັນຂະຫຍາຍໃຫ້ເປັນແຜນງານໂຄງການລະອຽດ, ໂດຍສະເພາະ ການຈັດຕັ້ງປະຕິບັດການບໍລິການສຸຂະພາບທົ່ວປວງຊົນ ແລະ ໃຫ້ຮີບຮ້ອນຈັດຕັ້ງປະຕິບັດການແກ້ໄຂການລະບາດພະຍາດ ໂຄວິດ-19  ໃຫ້ເຂັ້ມງວດ ແລະ ຕ້ອງມີອັນຮອງຮັບໄວ້, ເພີ່ມທະວີປະຕິບັດວຽກງານ 5 ດີ 1 ພໍໃຈ ຄື: ການຕ້ອນຮັບດີ, ຄວາມສະອາດດີ, ຄວາມສະດວກດີ, ການປົ່ງມະຕິພະຍາດຊັດເຈນດີ, ປະຕິບັດເຕັກນິກການປິ່ນປົວດີ ແລະ ເຮັດໃຫ້ຄົນເຈັບເພິ່ງພໍໃຈ. ດັ່ງກ່າວໃຫ້ໄດ້ຮັບໝາກຜົນດີ, ຫລີກລ່ຽງຫາງສຽງຈົ່ມວ່າຂອງສັງຄົມ ແລະ ເອົາໃຈໃສ່ຍາດແຍ່ງເອົາການຮ່ວມມືກັບຕ່າງປະເທດ ເປັນຕົ້ນການຍາດແຍ່ງທາງດ້ານເຕັກໂນໂລຊີ ທີ່ທັນສະໄໝ ແລະ ຮ່ວມມືກັບບັນດາປະເທດໃຫ້ກວ້າງຂວາງຫລາຍຂຶ້ນ.