UNWTO ລະບຸ ໂຄວິດ-19 ເຮັດໃຫ້ປີ 2020 ເປັນປີຮ້າຍແຮງທີ່ສຸດຂອງປະຫວັດສາດອຸດສາຫະກຳການທ່ອງທ່ຽວ
ວັນທີ 28 ມັງກອນ 2021, ລາຍງານປະຈຳປີຂອງອົງການການທ່ອງທ່ຽວໂລກແຫ່ງສະຫະປະຊາຊາດ (UNWTO) ທີ່ເຜີຍແຜ່ລະບຸວ່າ: ການແຜ່ລະບາດຂອງໂຄວິດ-19 ສົ່ງຜົນກະທົບຮ້າຍແຮງຕໍ່ອຸດສາຫະກຳທ່ອງທ່ຽວລະຫວ່າງປະເທດ ໃນປີ 2020 ເຮັດໃຫ້ຈຳນວນນັກທ່ອງທ່ຽວຕ່າງປະເທດຫລຸດລົງ 74%.
ລາຍງານລະບຸວ່າ: ນັກທ່ອງທ່ຽວຕ່າງປະເທດຫລຸດລົງປະມານ 1.000 ລ້ານຄັ້ງທົ່ວໂລກໃນປີ 2020 ເມື່ອທຽບໃສ່ປີ 2019 ເປັນຜົນມາຈາກຂໍ້ຈຳກັດການເດີນທາງທີ່ບັງຄັບໃຊ້ໃນເກືອບທຸກປະເທດທົ່ວໂລກ ເພື່ອຄວບຄຸມການລະບາດໃຫຍ່.
UNWTO ຄາດຄະເນວ່າ: ການຫລຸດລົງຂອງຈຳນວນນັກທ່ອງທ່ຽວຈະນຳໄປສູ່ການສູນເສຍລາຍໄດ້ 1,3 ຕື້ໂດລາສະຫະລັດ ຫລື 11 ເທົ່າຂອງຄວາມສູນເສຍທີ່ເກີດຈາກວິກິດເສດຖະກິດປີ 2009 ເຮັດໃຫ້ຖືກກຳນົດວ່າເປັນ “ປີຮ້າຍແຮງທີ່ສຸດໃນປະຫວັດສາດ” ຂອງອຸດສາຫະກຳທ່ອງທ່ຽວ.
ການລະບາດໃຫຍ່ສົ່ງຜົນກະທົບຕໍ່ທຸກພາກພື້ນທົ່ວໂລກ ໂດຍຈຳນວນນັກທ່ອງທ່ຽວຕ່າງປະເທດໃນພາກພື້ນອາຊີ ແລະ ປາຊີຟິກຫລຸດລົງ 84%, ຢູ່ຕາເວັນອອກກາງ ແລະ ອາຟຣິກາຫລຸດລົງ 75%. ຂະນະທີ່ຢູ່ເອີຣົບຫລຸດລົງ 70% ເຖິງວ່າຈະຟື້ນຕົວເລັກໜ້ອຍໃນຊ່ວງລະດູຮ້ອນ. ສ່ວນທະວີບອາເມລິກາຫລຸດລົງ 69%.
ທ່ານ ຊູຣັບ ໂປໂລລິຄັດວິວລີ ເລຂາທິການ UNWTO ເຕືອນວ່າ: ປີ 2021 ຈະເປັນທີ່ຍາກລຳບາກເຊັ່ນກັນ ໂດຍທ່ານກ່າວວ່າ: ເຖິງວ່າຄວາມເປັນໄປໄດ້ສູງທີ່ການເດີນທາງລະຫວ່າງປະເທດຈະເປັນໄປຢ່າງປອດໄພໃນປີນີ້, ແຕ່ເຮົາຄວນເນັ້ນໜັກວ່າ: ວິກິດຄັ້ງນີ້ຍັງບໍ່ສິ້ນສຸດລົງງ່າຍໆ ການເປັນນ້ຳໜຶ່ງໃຈດຽວ, ການຮ່ວມມື ແລະ ການໃຊ້ເຕັກໂນໂລຊີດິຈິຕອນຂອງມາດຕະການຫລຸດຄວາມສ່ຽງຈາກໂຄວິດ-19 ທີ່ກ່ຽວຂ້ອງກັບການເດີນທາງເຊັ່ນ: ການທົດສອບ, ການຕິດຕາມ ແລະ ການສັກວັກຊີນ ຈະເປັນຮາກຖານສຳຄັນຂອງການເດີນທາງທີ່ປອດໄພ ແລະ ການກຽມຄວາມພ້ອມສຳລັບການຟື້ນຕົວຂອງອຸດສາຫະກຳທ່ອງທ່ຽວທັນທີທີ່ປັດໄຈຕ່າງໆເອື້ອອຳນວຍ.
ນອກຈາກນີ້, ຄະນະຜູ້ຊ່ຽວຊານຂອງ UNWTO ຍັງຄາດຄະເນຜົນໄດ້ຮັບທີ່ຫລາກຫລາຍສຳລັບປີ 2021 ໂດຍປະມານ 45% ຄາດວ່າປີ 2021 ຈະເປັນປີທີ່ດີຂຶ້ນ, 25% ຄາດວ່າຈະໃກ້ຄຽງກັບປີກ່ອນ ແລະ 30% ຄາດວ່າຈະຮ້າຍແຮງກວ່າ ໂດຍຄະນະຜູ້ຊ່ຽວຊານສ່ວນຫລາຍຊີ້ວ່າ: ການທ່ອງທ່ຽວລະຫວ່າງປະເທດຈະຕ້ອງໃຊ້ເວລາປະມານ 2 ປີເຄິ່ງ ຫາ 4 ປີ ເພື່ອກັບສູ່ລະດັບດຽວກັບປີ 2019.
