ແຄປຊູນຂົນເດັກນ້ອຍປ່ວຍໜັກຜະລິດຈາກເຕັກໂນໂລຊີຟໍມູລາວັນ
ບໍລິສັດວິລລຽມ ແອດວານຊ໌ ເອັນຈິເນຍຣິງ ໃນສະຫະຣາຊາອານາຈັກ ຜູ້ຄິດຄົ້ນວິໄຈເຕັກໂນໂລຊີການແຂ່ງລົດສູດໜຶ່ງໃຫ້ກັບທີມວິລລຽມ ຟໍມູລາວັນ ປະດິດແຄປຊູນຂົນສົ່ງເດັກນ້ອຍທີ່ປ່ວຍໜັກ ໂດຍໃຊ້ເຕັກໂນໂລຊີດຽວກັບການສ້າງລົດແຂ່ງຟໍມູລາວັນ ເຊິ່ງຈະຊ່ວຍເຄື່ອນຍ້າຍເດັກນ້ອຍທີ່ປ່ວຍໃນຂັ້ນວິກິດໄດ້ຢ່າງວ່ອງໄວ, ປອດໄພ ແລະ ມີໂອກາດລອດຊີວິດເພີ່ມສູງຂຶ້ນ.
ແຄປຊູນຂົນສົ່ງເດັກນ້ອຍດັ່ງກ່າວມີຊື່ເອີ້ນວ່າ ເບບບີ້ພອດ 20 (Babypod 20) ເຮັດຈາກວັດສະດຸກາກບອນໄຟເບີຊີ່ງ ມີນໍ້າໜັກເບົາພຽງ 9 ກິໂລກຣາມ ແຕ່ມີຄວາມທົນທານແຂງແກ່ນ ໂດຍສາມາດໃຊ້ກັບການເຄື່ອນຍ້າຍເດັກນ້ອຍທາງລົດໂຮງໝໍ, ເຮລິກອບແຕ ຫຼື ລົດຍົນທໍາມະດາກໍໄດ້ ໂດຍບໍ່ຕ້ອງໃຊ້ພະລັງງານໄຟຟ້າຈາກພາຍນອກ.
ເບບີ້ພອດ 20 ມີຝາປິດໃສເລື່ອນໄດ້ ສາມາດຮັກສາລະດັບອຸນຫະພູມທີ່ເໝາະສົມຕໍ່ເດັກນ້ອຍໃຫ້ຄົງທີ່ຕະຫຼອດເວລາ ພາຍໃນຜະລິດດ້ວຍວັດສະດຸນຸ້ມໜາ ເພື່ອປ້ອງກັນເດັກນ້ອຍຈາກແຮງສັ່ນສະເທືອ ແລະ ສຽງລົບກວນ. ໂຄງສ້າງພາຍນອກຍັງທົນທານຕໍ່ແຮງຕຳເຖິງ 20G ໃນກໍລະນີທີ່ເກີດອຸປະຕິເຫດຂຶ້ນກັບພາຫະນະທີ່ເຄື່ອນຍ້າຍແຄປຊູນນີ້ຢູ່ນຳ.
ທາງບໍລິສັດວິລລຽມ ແອດວານຊ໌ ເອັນຈີເນຍຣິງ ໄດ້ພັດທະນາແຄປຊູນຂົນສົ່ງເດັກນ້ອຍນີ້ຮ່ວມກັບບໍລິສັດ AHT ເຊິ່ງເປັນຜູ້ພັດທະນາທາງການແພດທີ່ໃຊ້ເຄື່ອນຍ້າຍເດັກນ້ອຍມາກ່ອນໜ້ານີ້ຫຼາຍປີ ທີ່ແກ້ບັນຫາທີ່ເກີດຂຶ້ນຈາກການເຄື່ອນຍ້າຍເດັກນ້ອຍປ່ວຍ ເຊິ່ງປົກກະຕິຕ້ອງຢູ່ໃນຕູ້ອົບທີ່ມີຂະໜາດໃຫຍ່ ແລະ ນໍ້າໜັກຫຼາຍ ທັງຍາກຕໍ່ການຫາພາຫະນະຂົນສົ່ງທີ່ເໝາະສົມ.
ເບບີ້ພອດ 20 ມີລາຄາເກືອບ 5.000 ປອນ ໂດຍປັດຈຸບັນເລີ່ມມີການນໍາໄປໃຊ້ຢູ່ໂຮງໝໍເດັກຂອງນະຄອນຫຼວງລອນດອນແລ້ວ.
ເມື່ອປີ 2010 ບໍລິສັດ ວິລລຽມ ແອດວານຊ໌ ເອັນຈິເນຍຣິງ ໄດ້ປະກາດວ່າຈະນໍາເຕັກໂນໂລຊີທີ່ຄິດຄົ້ນເພື່ອລົດແຂ່ງຟໍມູລາວັນ ມາປະຍຸກໃຊ້ໃນດ້ານຕ່າງໆ ທີ່ກວ້າງຂວາງຂຶ້ນໄປກວ່າການແຂ່ງຂັນຄວາມໄວ ເນື່ອງຈາກໃນແຕ່ລະປີໄດ້ລົງທຶນໃນການຜະລິດລົດແຂ່ງ 100 ລ້ານປອນ ພຽງເພື່ອຄວ້າໄຊຊະນະໃຫ້ກັບທີມແຂ່ງລົດຂອງຕົນເທົ່ານັ້ນ.
ແນວໃດກໍຕາມ ຫລັກການຄິດຄົ້ນວັດສະດຸນໍ້າໜັກເບົາ ແລະ ການອອກແບບຮູບຊົງທີ່ມີປະສິດທິພາບຕາມຫຼັກອາກາດ (Aerodynamics ) ທີ່ໃຊ້ກັບລົດແຂ່ງຟໍມູລາວັນນັ້ນ ສາມາດນໍາໄປໃຊ້ກັບອຸດສາຫະກໍາ ຫຼື ໂຄງການຂອງພາກທຸລະກິດອື່ນໆໄດ້ຢ່າງຫລວງຫຼາຍ, ແຕ່ສ່ວນຫຼາຍນໍາໄປປະຍຸກໃຊ້ກັບການອອກແບບລົດຍົນເຊັ່ນ: ຊູເປີຄາຣ໌ລຸ້ນໄຮບຣິດຂອງຈາກົວຣ໌ ຫຼື ລົດສະປອດໄຟຟ້າ RapidE ຂອງ ແອສຕັນ ມາຣ໌ຕິນ.
ລາຍຮັບຈາກການນໍາເຕັກໂນໂລຊີຟໍມູລາວັນ ໄປປະຍຸກໃຊ້ໃນອຸດສາຫະກໍາອື່ນໆ ສາມາດຫາເງິນໃຫ້ ວິລລຽມ ແອດວານຊ໌ ເອັນຈິເນຍຣິງ ເກືອບ 37 ລ້ານປອນ ໃນປີຜ່ານມາ ເຊິ່ງລາຍຮັບຈາກສ່ວນນີ້ຈະນໍາກັບໄປເປັນເງິນທຶນ ເພື່ອສະໜັບສະໜູນທີມແຂ່ງລົດ ວິລລຽມ ຟໍມູລາວັນ ຕໍ່ໄປ.
