ກອງປະຊຸມຄະນະກຳມາທິການຮ່ວມມືລາວ-ຈີນປະຈຳປີ 2017
ກອງປະຊຸມຄະນະກຳມາທິການຮ່ວມມືລາວ-ຈີນປະຈຳປີ 2017 ໄດ້ຈັດຂຶ້ນໃນວັນທີ 6 ກໍລະກົດນີ້ທີ່ຫໍປະຊຸມແຫ່ງຊາດ, ນະຄອນຫລວງວຽງຈັນ, ໂດຍການເປັນປະທານຂອງທ່ານນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ, ທັງເປັນປະທານຄະນະກໍາມາທິການຮ່ວມມືລາວ-ຈີນ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນຈຳນວນຫລາຍ ເພື່ອສະຫລຸບຕີລາຄາການຈັດຕັ້ງປະຕິບັດວຽກງານການຮ່ວມມືດ້ານເສດຖະກິດ-ເຕັກນິກ ລະຫວ່າງລາວ-ຈີນໃນໄລຍະຜ່ານມາ, ໂດຍສະເພາະແມ່ນແນໃສ່ການປະຕິບັດວຽກງານໃນໜຶ່ງປີຜ່ານມາ, ພ້ອມທັງປຶກສາຫາລື ແລະ ສະເໜີທິດທາງແຜນການຮ່ວມມືໃນຕໍ່ໜ້າ.
ກອງປະຊຸມໄດ້ຮັບຟັງການສະເໜີບັນດາໂຄງການຍຸດທະສາດຮ່ວມມືລາວ-ຈີນຮອດປີ 2020, ພ້ອມທັງເຜີຍແຜ່ພາລະບົດບາດຂອງຄະນະກຳມາທິການຮ່ວມມືລາວ-ຈີນ ເພື່ອໃຫ້ກຳແໜ້ນນະໂຍບາຍ, ຈຸດພິເສດ, ຂັ້ນຕອນໂຄງການຊ່ວຍເຫລືອຈາກ ສປຈີນ ໃຫ້ເລິກເຊິ່ງກວ່າເກົ່າ ເພື່ອປະກອບສ່ວນເຂົ້າໃນການເສີມຂະຫຍາຍການພົວພັນຮ່ວມມືເສດຖະກິດ-ການຄ້າ ແລະ ເຕັກນິກຂອງສອງປະເທດລາວ-ຈີນໃຫ້ຂະຫຍາຍຕົວ ແລະ ມີປະສິດທິພາບສູງ.
ປັດຈຸບັນ, ສປຈີນ ເປັນອັນດັບໜຶ່ງໃນການລົງທຶນຢູ່ລາວ, ຊຶ່ງມີຫລາຍກວ່າ 765 ໂຄງການ, ລວມມີມູນຄ່າຫລາຍກວ່າ 7 ຕື້ໂດລາສະຫະລັດ (ບໍ່ລວມໂຄງການທາງລົດໄຟລາວ-ຈີນ), ໃນຂະແໜງບໍ່ແຮ່, ພະລັງງານໄຟຟ້າ, ກະສິກຳ, ບໍລິການ ແລະ ອື່ນໆ ແລະ ປີ 2016 ຜ່ານມາ, ມູນຄ່າການຄ້າສອງຝ່າຍບັນລຸໄດ້ 2,34 ຕື້ໂດລາສະຫະລັດ, ໃນນີ້ມູນຄ່າສິນຄ້າຂອງລາວສົ່ງອອກໄປຈີນມີ 1,35 ຕື້ໂດລາສະຫະລັດ ແລະ ສິນຄ້າຈີນເຂົ້າມາລາວຫລາຍກວ່າ 990 ລ້ານໂດລາສະຫະລັດ, ອັດຕາເພີ່ມຂຶ້ນຂອງການສົ່ງອອກ-ນຳເຂົ້າຜະລິດຕະພັນດ້ານກະສິກຳເພີ່ມຂຶ້ນ 40%, ໃນນັ້ນການສົ່ງອອກເຂົ້າສານໄປຈີນເພີ່ມຂຶ້ນ 19% ແລະ ສປຈີນ ຖືເປັນຄູ່ຄ້າອັນດັບສອງຂອງລາວ.
