IMF ປັບເພີ່ມຄາດການເສດຖະກິດໂລກປີນີ້ເຕີບໃຫຍ່ 5,5%
ກອງທຶນການເງິນສາກົນ (IMF) ເປີດເຜີຍລາຍງານທ່າອ່ຽງເສດຖະກິດໂລກ (WEO) ໃນວັນທີ 26 ມັງກອນ ໂດຍຄາດວ່າເສດຖະກິດໂລກຫລຸດລົງ 3,5% ໃນປີ 2020 ເຊິ່ງດີກວ່າຕົວເລກຄາດຄະເນໃນເດືອນຕຸລາປີຜ່ານມາ ທີ່ລະບຸວ່າເສດຖະກິດໂລກຫລຸດລົງ 4,4%.
ນອກຈາກນີ້, IMF ປັບເພີ່ມຕົວເລກຄາດຄະເນການຂະຫຍາຍຕົວຂອງເສດຖະກິດໂລກໃນປີ 2021 ສູ່ລະດັບ 5,5% ເຊິ່ງສູງກວ່າການຄາດຄະເນກ່ອນໜ້ານີ້ວ່າຈະຂະຫຍາຍຕົວ 5,2% ແລະ ຄາດຄະເນວ່າເສດຖະກິດໂລກຈະຂະຫຍາຍຕົວ 4,2% ໃນປີ 2022.
IMF ລະບຸວ່າ: ການອະນຸມັດວັກຊີນຕ້ານໂຄວິດ-19 ຈຳນວນເພີ່ມຂຶ້ນ ແລະ ການສັກວັກຊີນໃນວົງກວ້າງໃນປະເທດຕ່າງໆໃນເດືອນທັນວາປີຜ່ານມາ ໄດ້ຊ່ວຍໜູນຄວາມຫວັງທີ່ຈະເຫັນການຢຸດຕິການແຜ່ລະບາດຂອງໄວຣັສໂຄວິດ-19. ຂະນະທີ່ການອອກມາດຕະການກະຕຸ້ນເສດຖະກິດຈາກອາເມລິກາ, ຍີ່ປຸ່ນ ແລະ ປະເທດເສດຖະກິດຂະໜາດໃຫຍ່ ໄດ້ເປັນປັດໄຈຟື້ນຟູເສດຖະກິດໂລກ.
ເຖິງຢ່າງໃດກໍດີ, IMF ເຕືອນວ່າ: ເສດຖະກິດໂລກຍັງຜະເຊີນຄວາມບໍ່ແນ່ນອນທ່າມກາງການແຜ່ລະບາດຮອບໃໝ່ ແລະ ການກາຍພັນຂອງໄວຣັສໂຄວິດ-19.
ທັງນີ້, IMF ໄດ້ຫລຸດການຄາດຄະເນ GDP ສຳລັບເຂດໃຊ້ເງິນເອີໂຣໃນປີ 2020 ລົງ 1% ເນື່ອງຈາກປະເມີນວ່າພາກພື້ນນີ້ໄດ້ຮັບຜົນກະທົບຢ່າງຮຸນແຮງຈາກສະຖານະການໂຄວິດ-19, ສ່ວນປີ 2021 ຄາດວ່າຈະເຕີບໃຫຍ່ 4,2%.
ຂະນະທີ່ເຢຍລະມັນ, ຝຣັ່ງ, ອິຕາລີ ແລະ ສະເປນ ເຊິ່ງເປັນ 4 ປະເທດເສດຖະກິດໃຫຍ່ທີ່ສຸດໃນເຂດໃຊ້ເງິນເອີໂຣນັ້ນ, IMF ຍັງເຫັນການຄາດຄະເນການເຕີບໃຫຍ່ທີ່ຫລຸດລົງໃນປີ 2021.
ໃນທາງກົງກັນຂ້າມ, IMF ໄດ້ເພີ່ມຄາດຄະເນ GDP ຂອງອາເມລິກາ ໂດຍ IMF ຄາດຄະເນວ່າ: ເສດຖະກິດອາເມລິກາຈະຂະຫຍາຍຕົວ 5,1% ໃນປີນີ້ ຈາກທີ່ເຄີຍຄາດວ່າຈະຂະຫຍາຍຕົວ 3,1% ໂດຍໄດ້ແຮງໜຸນຈາກມາດຕະການກະຕຸ້ນເສດຖະກິດຈຳນວນ 900.000 ລ້ານໂດລາ ຂອງລັດຖະບານອາເມລິກາ ພາຍໃຕ້ອະດີດປະທານາທິບໍດີ ໂດນັລ ທຣຳ ແລະ ຖ້າມາດຕະການກະຕຸ້ນເສດຖະກິດຈຳນວນ 1,9 ຕື້ໂດລາ ຂອງປະທານາທິບໍດີ ໂຈ ໄບເດນ ຜ່ານການອະນຸມັດຂອງສະພາຄອງເກຣດ ຈະສົ່ງຜົນໃຫ້ເສດຖະກິດອາເມລິກາມີການຂະຫຍາຍຕົວເພີ່ມຂຶ້ນ.
ສ່ວນເສດຖະກິດຈີນຄາດວ່າຈະຂະຫຍາຍຕົວ 8,1% ໃນປີນີ້ ແລະ 5,6% ໃນປີໜ້າ ຈາກທີ່ເຄີຍຄາດຄະເນໃນລະດັບ 8,2% ແລະ 5,8% ຕາມລຳດັບ. ສ່ວນເສດຖະກິດອິນເດຍ, IMF ຄາດວ່າຈະຂະຫຍາຍຕົວ 11,5% ໃນປີນີ້ ຈາກທີ່ເຄີຍຄາດຄະເນໃນລະດັບ 8,8%.
