ຄົນຍີ່ປຸ່ນ ກັບບັນຫາ “ຜູ້ສືບທອດ”

ໂດຍ: ມຶກບໍ່ແຫ້ງ

ເຖິງວ່າຍີ່ປຸ່ນ ຈະໄດ້ຊື່ວ່າປະເທດທີ່ພັດທະນາແລ້ວ, ປະຊາຊົນມີຄຸນນະພາບຊີ ວິດທີ່ດີ ມີອາຍຸສະເລ່ຍຍືນຍາວທີ່ສຸດໃນໂລກແຕ່ຍີ່ປຸ່ນຍັງມີບັນຫາທີ່ໃຫ້ກັງວົນບໍ່ໜ້ອຍຕໍ່ ການຮັກສາມາດຖານຊີວິດຂອງຄົນນັ້ນກໍຄືມີຄົນເຖົ້າຫຼາຍແຕ່ໄວໜຸ່ມພັດບໍ່ຢາກແຕ່ງ ງານ ແລ້ວມີລູກ!

ອີງຕາມສະຖິຕິຂອງເວທີທີ່ປຶກສາເສດຖະກິດໂລກໃຫ້ຮູ້ວ່າ ປັດຈຸບັນ ປະຊາ ກອນຍີ່ປຸ່ນມີ 127,1 ລ້ານຄົນ ເຊິ່ງຫຼຸດລົງ 0,7% ໃນລະຫວ່າງປີ 2010-2015. ພ້ອມນັ້ນ ອົງການສະຫະປະຊາຊາດ ກໍຍັງຄາດຄະເນວ່າ ຮອດປີ 2100 ປະຊາກອນ ຍີ່ປຸ່ນຈະຍັງເຫຼືອພຽງແຕ່ 83 ລ້ານຄົນ ໂດຍໃນນັ້ນ ມີປະຊາກອນທີ່ມີອາຍຸກາຍ 65 ລ້ານຄົນ ກວມເອົາ 35%.

ຈາກຕົວເລກດັ່ງກ່າວ ເຮັດໃຫ້ຍີ່ປຸ່ນເອງກໍມີຄວາມກັງວົນວ່າ ເມື່ອຜູ້ສູງອາຍຸເພີ່ມຂຶ້ນ ແຕ່ຜູ້ສືບທອດພັດຫຼຸດລົງ ນັ້ນມັນເປັນອັນຕະລາຍຫຼາຍຕໍ່ລະບົບສະຫວັດດີການ ຂອງປະເທດດັ່ງກ່າວ ເພາະມີໄວໜຸ່ມຜູ້ເຮັດວຽກເພື່ອຈ່າຍເງິນເບ້ຍລ້ຽງແກ່ຜູ້ສູງອາຍຸນັ້ນຫຼຸດໜ້ອຍຖອຍລົງນັບມື້.

ຄັນຊັ້ນເຮົາມາເບິ່ງສາເຫດຂອງຄົນເຖົ້າເພີ່ມ ຄົນໜຸ່ມພັດຫຼຸດໃນຍີ່ປຸ່ນນັ້ນ ມັນແມ່ນຍ້ອນຫຍັງ? ເມື່ອຜ່ານມານີ້ ຜູ້ຂຽນໄດ້ອ່ານພໍ້ບົດຄວາມໜຶ່ງຂອງສຳນັກຂ່າວ ບີສເນັສ໌ ອິນຊາຍເດີ Business Insider ໂດຍພາດຫົວຂໍ້ຂ່າວວ່າ: ວິທີການແກ້ໄຂບັນຫາເລື່ອງເທິງຕຽງຂອງຍີ່ປຸ່ນ! ໂດຍໄດ້ສະເໜີວ່າ ບັນຫາໜຶ່ງທີ່ເຮັດໃຫ້ປະຊາກອນ ຍີ່ປຸ່ນຫຼຸດລົງ ກໍຄືຄົນໜຸ່ມບໍ່ຢາກສ້າງຄອບຄົວ ເພາະສະພາບແວດລ້ອມອ້ອມຂ້າງບີບບັງຄັບ ໂດຍສະເພາະຄ່າຄອງຊີບສູງ, ການເຮັດວຽກໜັກ (ໂດຍສະເລ່ຍປະມານ 12-16 ຊົ່ວໂມງ) ຕໍ່ມື້ ເລີຍເຮັດໃຫ້ບໍ່ມີເວລາຊອກຫາຄູ່ຄອງຂອງຕົນ ເຊິ່ງມີຂໍ້ມູນວ່າ ຄົນຍີ່ປຸ່ນ ອາຍຸ 18-34 ປີ ທີ່ຍັງບໍ່ທັນແຕ່ງງານ ມີເຖິງ 70%, ແມ່ຍິງສ່ວນຫຼາຍກໍບໍ່ໄດ້ມີແຮງຈູງໃຈພໍເທົ່າໃດ ໃນການມີລູກ ເພາະວ່າເຂົາເຈົ້າກໍສາມາດຫາເງິນ ແລະ ເລື່ອງອື່ນໆ ເທົ່າທຽມກັນກັບເພດຊາຍ ເພາະສະນັ້ນ ຈຶ່ງບໍ່ເປັນເລື່ອງແປກປະຫຼາດວ່າ ແມ່ຍິງຍີ່ປຸ່ນ ອາຍຸ 18-34 ປີ ຈຳນວນ 60% ບໍ່ມີການພົວພັນ ແບບບ່າວ-ສາວ.

ເຖິງຢ່າງໃດກໍຕາມ ມັນເປັນເລື່ອງທີ່ໜ້າສົນໃຈ ເມື່ອທ່ານ ຊິນໂຊ ອາເບ (Shinzo Abe) ນາຍົກລັດຖະມົນຕີຍີ່ປຸ່ນ ທີ່ນຳສະເໜີວິທີໃນການແກ້ໄຂບັນຫາເລື່ອງເທິງຕຽງ ທີ່ຂ້ອນຂ້າງມີບັນຫາ ເຊິ່ງກໍເປັນສາເຫດສຳຄັນໃນການເຮັດໃຫ້ປະຊາກອນ ພາຍໃນປະເທດຫຼຸດລົງ ໂດຍທ່ານນາຍົກໄດ້ນຳໃຊ້ 2 ວິທີຄື: 1. ສ້າງໂອກາດໃຫ້ແກ່ແມ່ຍິງ ໃຫ້ເລີ່ມສ້າງ “ຄອບຄົວ” ໄວຂຶ້ນ ໂດຍຈັດງານນັດພົບປະຄູ່ບ່າວສາວ, ຈັດການສຳມະນາໃຫ້ແກ່ຜູ້ຊາຍ ໃນການຮຽນເບິ່ງແຍງລູກນ້ອຍ ແລະສົ່ງເສີມໃຫ້ບັນດາບໍລິສັດຕ່າງໆ ໃຫ້ເວລາພັກແກ່ພະນັກງານຫຼາຍຂຶ້ນ ແລະ 2. ປ່ຽນທັດສະນະຄະຕິ ທີ່ເປັນວັດທະນະທຳຂອງຄົນຍີ່ປຸ່ນ ໃນການເຮັດວຽກໜັກ ເພາະພາຍຫຼັງສົງຄາມໂລກຄັ້ງທີ ສອງເປັນຕົ້ນມາ ຄົນຍີ່ປຸ່ນຖືວ່າການເຮັດວຽກໜັກນັ້ນ ຖືເປັນອົງປະກອບທີ່ສຳຄັນ ທີ່ເຮັດໃຫ້ບໍລິສັດ ເບິ່ງແຍງຊີວິດຂອງເຂົາເຈົ້າ ແລະຄົນຍີ່ປຸ່ນຈະຍອມເສຍສະຫຼະເວລາເກືອບທັງໝົດຂອງພວກເຂົາເພື່ອວຽກ.

ມັນເປັນເລື່ອງໜ້າຄິດຄືກັນວ່າ ຫຼາຍປະເທດໃນໂລກທີ່ເອີ້ນວ່າ ພັດທະນາແລ້ວ ຕ່າງກໍປະສົບກັບປະຊາກອນຫຼຸດລົງດັ່ງ : ແອສປາຍ, ອີຕາລີ ແລະອື່ນໆ ແມ່ນແຕ່ ສິງກະໂປ, ສປຈີນ ແລະ ສ.ເກົາຫຼີ ກໍມີປະຊາກອນຜູ້ທີ່ມີອາຍຸກາຍ 65 ປີຂຶ້ນເມືອ ເພີ່ມສູງຂຶ້ນ ແຕ່ໃນໂລກກຳລັງພັດທະນາດັ່ງປະເທດເຮົາ ພັດມີແນວໂນ້ມວ່າ ປະຊາ ກອນເພີ່ມສູງຂຶ້ນ ແຕ່ກໍປາກົດວ່າ ມາຮອດປັດຈຸບັນ ຄົນລາວເຮົາກໍມີທ່າອ່ຽງ ການສ້າງຄອບຄົວຕອນອາຍຸຫຼາຍຂຶ້ນ ແລະມີລູກໜ້ອຍລົງ ຖ້າທຽບໃສ່ເມື່ອຫຼາຍປີກ່ອນ, ເພາະ ສະນັ້ນ ຖ້າປະເທດເຮົາມີແນວໂນ້ມດັ່ງກັບຫຼາຍປະເທດທີ່ພັດທະນາແລ້ວ, ພວກເຮົາກໍຄວນຄິດເລື່ອງນີ້ໄວ້ແຕ່ຫົວທີ ເພື່ອຈະມີວິທີຄັກກວ່າຍີ່ປຸ່ນອີກ.