ທ່ານຮອງນາຍົກລັດຖະມົນຕີ ສອນໄຊ ສີພັນດອນ ໂອ້ລົມພະນັກງານຫຼັກແຫຼ່ງແຂວງເຊກອງ

ວັນທີ 24 ມັງກອນນີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະການລົງທຶນ ໄດ້ພົບປະໂອ້ລົມຄະນະພັກ-ພະນັກງານຫຼັກແຫຼ່ງແຂວງເຊກອງ ເພື່່ອເນັ້ນເອົາໃຈໃສ່ນຳພາ-ຊີ້ນໍາທຸກຂົງເຂດວຽກງານໃຫ້ເຂັ້ມແຂງ , ຖືເອົາວຽກງານສຶກສາອົບຮົມການເມືອງ-ນໍາພາແນວຄິດໃຫ້ພະນັກງານສະມາຊິກພັກ ແລະ ປະຊາຊົນບັນດາເຜົ່າເປັນສໍາຄັນ ເພື່ອໃຫ້ເຂົາເຈົ້າເຂົ້າໃຈຢ່າງເລິກເຊິ່ງຕໍ່ແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມຂອງລັດ ໂດຍສອດຫ້ອຍກັບວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ເພື່ອເຮັດໃຫ້ແຂວງມີສະຖຽນພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍຢ່າງໜັກແໜ້ນ, ພ້ອມເປັນເຈົ້າການພັດທະນາພື້ນຖານໂຄງລ່າງ ໂດຍສະເພາະການຜະລິດກະສິກໍາ (ປູກຝັງ-ລ້ຽງສັດ) ໃຫ້ກາຍເປັນທ່າແຮງຂອງທ້ອງຖິ່ນ ແລະ ເປັນສິນຄ້າທີ່ຕະຫຼາດມີຄວາມຕ້ອງການ, ດ້ວຍການນໍາໃຊ້ເຕັກນິກວິທະຍາສາດແບບໃໝ່ ເຂົ້າມາຊ່ວຍໃຫ້ໄດ້ຜົນຜະລິດທີ່ມີຄຸນນະ, ຊ່ວຍພັດທະນາເສດຖະກິດຂອງແຂວງໃຫ້ເຕີບໃຫຍ່ຂະຫຍາຍຕົວ, ປະຊາຊົນມີລາຍຮັບສູງຂຶ້ນ.

ໃນໂອກາດນີ້ທ່ານເຈົ້າແຂວງກໍໄດ້ລາຍງານສະພາບການ ພັດທະນາເສດຖະກິດ-ສັງຄົມໃຫ້ທ່ານຮອງນາຍົກຊາບວ່າ: ໃນປີ 2020 ຜ່ານມານີ້ ອັດຕາການຂະຫຍາຍຕົວຂອງເສດຖະກິດບັນລຸໄດ້ 4,3%, ໃນນີ້ຂະແໜງກະສິກໍາເພີ່ມຂຶ້ນ 6,65% ກວມເອົາ 40,94% ຂະແໜງອຸດສາຫະກໍາເພີ່ມຂຶ້ນ 4% ກວມເອົາ 23,21% ແລະການບໍລິການເພີ່ມຂຶ້ນ 1,92% ກວມເອົາ 35,85% ຂອງ GDP.ລາຍໄດ້ ສະເລ່ຍໃສ່ຫົວຄົນບັນລຸ 13,99 ລ້ານກີບ ຫຼື ເທົ່າກັບ 1.728 ໂດລາຕໍ່ຄົນຕໍ່ປີ, ສ່ວນການລົງທຶນມີມູນຄ່າທັງໝົດ 1.542 ຕື້ກ່ວາກີບ ໃນນັ້ນຫຼາຍກວ່າໝູ່ແມ່ນການລົງທຶນສິນເຊື່ອຂອງທະນາຄານ 1.144ກວມເອົາ 74,21% ຂອງການລົງທຶນທັງໝົດ.