WHO ກຽມພິຈາລະນາອະນຸມັດໃຫ້ວັກຊີນຕ້ານໂຄວິດ-19 ຈາກ Moderna ເປັນກໍລະນີສຸກເສີນ
ວັນທີ 24 ມັງກອນ 2021, ອົງການອະນາໄມໂລກ (WHO) ກຽມພິຈາລະນາການອະນຸມັດນຳໃຊ້ວັກຊີນຕ້ານໂຄວິດ-19 ຈາກ Moderna ເປັນກໍລະນີສຸກເສີນ ໃນວັນທີ 26 ມັງກອນນີ້ ໂດຍວັກຊີນ mRNA-1273 ນີ້ຖືເປັນວັກຊີນຊະນິດທີ 2 ຕໍ່ຈາກວັກຊີນ BNT162b2 ຂອງ Pfizer-BioNTech ທີ່ໄດ້ຮັບການຂຶ້ນທະບຽນຮັບຮອງຈາກ WHO ໄປແລ້ວເມື່ອທ້າຍປີ 2020.
ໂດຍວັກຊີນຂອງ Moderna ຢູ່ລະຫວ່າງການທົດສອບໃນມະນຸດໄລຍະທີ 3 ມີປະສິດທິພາບໃນການຕ້ານໂຄວິດ-19 ຢູ່ທີ່ 94,5% ຈະຕ້ອງສັກທັງໝົດ 2 ໂດສ ຫ່າງກັນ 4 ອາທິດ ສາມາດຈັດເກັບໄດ້ດົນປະມານ 30 ວັນພາຍໃນອຸນຫະພູມຕູ້ເຢັນ ແລະ ເກັບໄດ້ດົນ 6 ເດືອນຖ້າແຊ່ແຂງໃນອຸນຫະພູມ -20 ອົງສາ. ເບື້ອງຕົ້ນໄດ້ຮັບການອະນຸມັດໃຫ້ນຳໃຊ້ກໍລະນີສຸກເສີນແລ້ວຢູ່ອາເມລິກາ, ການາດາ, ອິດສະລາແອນ, ສະຫະພາບເອີຣົບ ແລະ ອັງກິດ.
ໂຄວິດ-19 ແຜ່ລະບາດມາດົນກວ່າ 1 ປີ, ມີຜູ້ຕິດເຊື້ອສະສົມແລ້ວ 98.693.047 ຄົນທົ່ວໂລກ, ປິ່ນປົວເຊົາ 71.366.968 ຄົນ ຫລື ປະມານ 72% ຂອງຜູ້ຕິດເຊື້ອທັງໝົດ, ເສຍຊີວິດແລ້ວ 2.118.697 ຄົນ ອັດຕາການເສຍຊີວິດປະມານ 2,2% ໂດຍອາເມລິກາຍັງເປັນປະເທດທີ່ມີຜູ້ຕິດເຊື້ອສະສົມຫລາຍທີ່ສຸດ (24.990.360), ຮອງລົງມາແມ່ນອິນເດຍ (10.639.684), ບຣາຊິລ (8.816.254), ຣັດເຊຍ (3.658.447) ແລະ ອັງກິດ (3.627.746) ພົບຜູ້ຕິດເຊື້ອແລ້ວຢ່າງໜ້ອຍ 186 ຈາກ 193 ປະເທດທົ່ວໂລກ.
