ຜູ້ໃດບໍ່ມັກ ‘ດຶ່ມ’ ໂອກາດ 50% ບໍ່ມີຄວາມກ້າວໜ້າ… ແທ້ບໍ່ ?

ຢູ່ໃນບໍລິສັດຂອງຂ້ອຍ, ຖ້າຜູ້ໃດຫາກຮູ້ຈັກ “ດຶ່ມ” ແດ່ລ້ວນແຕ່ໄດ້ໃກ້ສິດກັບຫົວໜ້າ.

ຫຼາຍຄົນ ‘ນັກດຶ່ມ’ ມັກຈະບັງຄັບກັນດຶ່ມເຫຼົ້າ, ດຶ່ມເບຍ ດ້ວຍການບັງຄັບກັນ ‘ກຳຄໍເສື້ອ’. ຕໍ່ກັບບັນຫານີ້, ພະນັກງານໃນບໍລິສັດແຫ່ງໜຶ່ງເລົ່າວ່າ: “ຂ້ອຍເປັນຫົວໜ້າພະແນກການຕະຫຼາດ ຂອງບໍລິສັດໃຫ່ຍແຫ່ງໜຶ່ງ, ຕ້ອງໄດ້ດຶ່ມເບຍເປັນປະຈຳ, ແຕ່ຂ້ອຍມັກຈະດຶ່ມພຽງແຕ່ 2-3 ປ໋ອງກໍພໍແລ້ວ, ແຕ່ມັກຈະຖືກເພື່ອນໆ ຍຸແຍ່, ຫົວໜ້າຈ້ອງເອົາຄວາມຜິດ ກໍເລີຍຈຳເປັນຕ້ອງໄດ້ດຶ່ມຕໍ່ໄປ”.

ພະນັກງານໃນບໍລິສັດໜຶ່ງອີກ ເລົ່າວ່າ: “ບໍລິສັດເກົ່າຂອງຂ້ອຍ, ໃນແຕ່ລະເທື່ອເມື່ອມີດອງ ພະນັກງານມັກຈະດຶ່ມກັນ, ຖ້າຜູ້ໃດຮູ້ ດຶ່ມ ແດ່ ກໍຈະປ່ຽນກັນໄປຕຳຈອກກັບຫົວໜ້າ, ຫຼັງຈາກນັ້ນບໍ່ດົນ ຫົວໜ້າກໍຈະມາໂຕະຂອງພວກເຂົາຕຳຈອກກັບພວກເຂົາຄືນ, ຫົວໜ້າຈະບໍ່ໄປໂຕະໃດທີ່ລູກນ້ອງບໍ່ໄປຕຳຈອກກັບເພິ່ນ, ເຖິງແມ່ນວ່າໄປ ກໍແບບບໍ່ສະໜິດປານໃດ. ການດຶ່ມ ມັນເປັນການສ້າງສາຍພົວພັນຮັກແພງກັບຫົວໜ້າ ແລະ ເພື່ອນນັກດຶ່ມນຳກັນ. ສ່ວນຜູ້ທີ່ບໍ່ຮູ້ຈັກ ດຶ່ມ 50% ແມ່ນບໍ່ມີຄວາມກ້າວໜ້າໃນໜ້າທີ່ການງານ”.

ພະນັກງານອີກຄົນໜຶ່ງເລົ່າວ່າ: “ໄປງານຕ່າງໆ ຂ້ອຍມັກຈະໄປນັ່ງກັບເພື່ອນໆ ທີ່ດຶ່ມໜ້ອຍ, ຈອກໜຶ່ງ ສອງຈອກ ກໍພໍແລ້ວ, ແລ້ວກໍນັ່ງກິນນໍ້າຊາລົມກັນ. ຂ້ອຍຊັງທີ່ສຸດຜູ້ທີ່ດຶ່ມຫຼາຍ ແລະ ບັງຄັບຄົນອື່ນ ດຶ່ມ ໂດຍສະເພາະແມ່ນໃນງານຕ່າງໆ. ດຶ່ມຈອກໜຶ່ງສອງຈອກ ພໍເປັນພິທີການ, ດຶ່ມບໍ່ໝົດຈອກ ກໍປາກົດວ່າຄົນອື່ນສົ່ງສາຍຕາເບິ່ງເຮົາຄືບໍ່ພໍໃຈ, ຈຶ່ງຈຳເປັນຕ້ອງ ເຮັດເຮັດໃຫ້ໝົດ. ຍ້ອນຂ້ອຍດຶ່ມໜ້ອຍ ຈຶ່ງມີເພື່ອນໜ້ອຍ…”