ມາຮູ້ຈັກກັບ ອັງເດຣ ສຸຄຳທາດ ນັກມວຍ UFC ເຊື້ອຊາດລາວ
ອັງເດຣ ສຸຄຳທາດ (Andre Soukhamthath) ເຊິ່ງເປັນເຊື້ອຊາດລາວ ສັນຊາດສະຫະລັດອາເມລິກາ ອາຍຸ 29 ປີ ເກີດເມື່ອວັນທີ 23/10/1988 ຢູ່ເຂດວູນແຊກເກັດ (Woonsecket) ລັດໂຣດໄອແລນ (Rhode Island) ຂອງສະຫະລັດອາເມລິກາ, ສູງກວ່າ 175 ຊັງຕີແມັດ, ນ້ຳໜັກ 61 ກວ່າກິໂລ.
ອັງເດຣ ເປັນນັກມວຍ UFC 209 ໃນຮູບແບບການຕໍ່ສູ້ກັນຢູ່ສັງວຽນເຫລັກ ແລະ ເນັ້ນແບບທັກສະປ້ອງກັນໂຕ, ອົດທົນ, ວ່ອງໄວ ແລະ ໄຫວພິບເປັນເລີດ.
ຈາກສະຖິຕິການຕໍ່ສູ້ ອັງເດຣ ຊະນະ 11 ຄັ້ງ, ເສຍ 4 ຄັ້ງ ແລະ ໄດ້ແຊ້ມ 1 ຄັ້ງ. ຄັ້ງ ວັນທີ 4 ມີນາ 2017 ນີ້ ອັງເດຣ ໄດ້ເສຍໄຊໃຫ້ ອາວເບີດ ໂມຣາເລສ (Albert Morales) ອາຍຸ 25 ປີ ສັນຊາດ ແລະ ເຊື້ອຊາດສະຫະລັດອາເມລິກາ.
ອັງເດຣ ເລີ່ມຫລິ້ນກິລາໂດຍການເປັນຜູ້ຮັກສາປະຕູບານເຕະມາກ່ອນ ແລະ ຫັນມາເຝິກແອບມວຍຕື່ມໃນເວລາຕໍ່ມາ, ເຖິງວ່າຈະຖືກຄັດຄ້ານຈາກຜູ້ເປັນພໍ່, ແຕ່ສຸດທ້າຍດ້ວຍຄວາມມຸ່ງໝັ້ນ ອັງເດຣ ໄດ້ຫັນມາເອົາດີດ້ານກິລາການຕໍ່ສູ້ ຢ່າງຈິງຈັງ ແລະ ໄດ້ພໍ່ເປັນສ່ວນຮ່ວມໃນການເປັນຄູເຝິກນຳອີກ ແລະ ໃນວັນທີ 5 ສິງຫາ 2017 ນີ້, ອັງເດຣ ຈະຂຶ້ນສັງວຽນຊົກກັບ ອາເລຈວນໂດຣ ເປເຣຊ (Alejandro Perez) ຊາວແມັກຊິກ. ສະນັ້ນ ຂໍເຊີນຊາວລາວຊ່ວຍເຊຍຊ່ວຍລຸ້ນນຳກັນ.
