ສະຫາຍເລຂາທິການໃຫຍ່ ທອງລຸນ ສີສຸລິດ ສົນທະນາທາງໂທລະສັບກັບ ສະຫາຍເລຂາທິການໃຫຍ່ ສປ ຈີນ

ໃນຕອນຄໍ່າວັນທີ 21 ມັງກອນນີ້, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປປ ລາວ ໄດ້ສົນທະນາທາງໂທລະສັບກັບ ສະຫາຍ ສີ ຈິ້ນຜິງ ເລຂາທິການໃຫຍ່ຄະນະກໍາມະການສູນກາງພັກກອມມູນິດຈີນ ເປັນຄັ້ງທໍາອິດ ພາຍຫຼັງສໍາເລັດການດໍາເນີນກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI ຂອງຕົນ ແລະ ເປັນໂອກາດແຈ້ງຜົນສໍາເລັດຂອງກອງປະຊຸມໃຫຍ່ດັ່ງກ່າວ, ພ້ອມໄດ້ສະແດງຄວາມຂອບໃຈຢ່າງສູງມາຍັງຄະນະກໍາມະການສູນກາງພັກກອມມູນິດຈີນ ກໍຄື ສະຫາຍເລຂາທິການໃຫຍ່ ສີ ຈິ້ນຜິງ ທີ່ໄດ້ສົ່ງຄໍາອວຍພອນ ແລະ ຊົມເຊີຍກອງປະຊຸມໃຫຍ່ຄັ້ງນີ້ ໂດຍສະເພາະແມ່ນໄດ້ສະແດງຄວາມຊົມເຊີຍ ສະຫາຍ ທອງລຸນ ສີສຸລິດ ທີ່ໄດ້ຮັບເລືອກຕັ້ງເປັນເລຂາທິການໃຫຍ່ ຄະນະບໍລິຫານງານສູນກາງພັກ ປປ ລາວ ສະໄໝທີ XI ແລະ ໄດ້ສະແດງຄວາມເຊື່ອໝັ້ນວ່າ ຄະນະບໍລິຫານງານສູນກາງພັກຊຸດໃໝ່ ທີ່ມີສະຫາຍເລຂາທິການໃຫຍ່ ທອງລຸນ ສີສຸລິດ ເປັນຜູ້ນໍານັ້ນ, ປະຊາຊົນລາວຈະສາມາດສືບຕໍ່ພາລະກິດການປົກປັກຮັກສາ ແລະ ສ້າງສາພັດທະນາປະເທດຊາດ ແລະ ຍາດໄດ້ຜົນສໍາເລັດອັນໃຫຍ່ຫຼວງກວ່າເກົ່າ ຕາມມະຕິກອງປະຊຸມໃຫຍ່ ຄັ້ງທີ XI ໄດ້ກໍານົດໄວ້.

ໃນການສົນທະນາ, ການນໍາສູງສຸດຂອງສອງພັກ ລາວ-ຈີນ ໄດ້ຕີລາຄາສູງຕໍ່ການພົວພັນຮ່ວມມືສອງຝ່າຍໃນໄລຍະຜ່ານມາ ແລະ ໄດ້ແລກປ່ຽນຄວາມຄິດເຫັນກ່ຽວກັບທິດທາງເສີມຂະຫຍາຍສາຍພົວພັນຮ່ວມມືສອງຝ່າຍໃນຕໍ່ໜ້າ ໂດຍຖືເອົາການຈັດຕັ້ງປະຕິບັດແຜນແມ່ບົດວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ ເປັນແຜນປະຕິບັດງານຕົວຈິງ ເພື່ອສືບຕໍ່ລົງເລິກການຮ່ວມມືສອງຝ່າຍໃນສະພາບການໃໝ່ໃຫ້ມີປະສິດທິຜົນ ແລະ ຄຸນນະພາບສູງຂຶ້ນກວ່າເກົ່າ ໂດຍສະເພາະແມ່ນການຮ່ວມມືກັນຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ທີ່ພວມແຜ່ລະບາດຢູ່ປະເທດຕ່າງໆໃນໂລກປັດຈຸບັນ.

ໃນໂອກາດນີ້, ສະຫາຍເລຂາທິການໃຫຍ່ ທອງລຸນ ສີສຸລິດ ໄດ້ສະແດງຄວາມຂອບໃຈເປັນຢ່າງສູງຕໍ່ພັກ, ລັດຖະບານຈີນ ທີ່ໄດ້ໃຫ້ການຊ່ວຍເຫຼືອທາງດ້ານອຸປະກອນການແພດ ແລະ ວັກແຊັງປ້ອງກັນພະຍາດໂຄວິດ-19 ຕະຫຼອດໄລຍະທີ່ຜ່ານມາ ເຊິ່ງເປັນການປະກອບສ່ວນສໍາຄັນໃນການຄວບຄຸມ ແລະ ຕ້ານພະຍາດດັ່ງກ່າວໄດ້ມີປະສິດທິຜົນ.

ພ້ອມນີ້ການນໍາສູງສຸດຂອງສອງຝ່າຍ ຍັງໄດ້ເອກະພາບກັນໃນການກໍານົດເອົາປີ 2021 ເປັນປີມິດຕະພາບ ລາວ-ຈີນ ເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ຈີນ ຄົບຮອບ 60 ປີ (25 ເມສາ 1961-25 ເມສາ 2021); ຂະນະດຽວກັນ ສະຫາຍເລຂາທິການໃຫຍ່ ທອງລຸນ ສີສຸລິດ ໄດ້ອວຍພອນໃຫ້ປະຊາຊົນຈີນ ພາຍໃຕ້ການນໍາພາອັນເດັດດ່ຽວຂອງພັກກອມມູນິດຈີນ ຈົ່ງປະສົບຜົນສໍາເລັດໃໝ່ໃຫຍ່ຫຼວງກວ່າເກົ່າໃນພາລະກິດສ້າງສັງຄົມນິຍົມທີ່ທັນສະໄໝຮອບດ້ານ, ບັນລຸເປົ້າໝາຍ “100 ປີສອງເຫດການ” ໃນຕໍ່ໜ້າ ແລະ ອວຍພອນໃຫ້ສະຫາຍເລຂາທິການໃຫຍ່ ສີ ຈິ້ນຜິງ, ການນໍາຂັ້ນສູງ ພັກ-ລັດ ແລະ ປະຊາຊົນຈີນ ໃນໂອກາດບຸນປີໃໝ່ປະຈຳຊາດຂອງຈີນທີ່ຈະມາເຖິງນີ້ໃຫ້ເຕັມໄປດ້ວຍຄວາມສຸກສົມບູນທຸກປະການ.