3 ແຂວງພາກໃຕ້ ໄດຮັບການສະໜັບສະໜູນຈາກສະຫະພັນກາແດງ ແລະ ຊີກວົງເດືອນແດງສາກົນ ລວມມູນຄ່າ 1.278.574.086 ກີບ.
ໃນວັນທີ 19 -20 ມັງກອນ 2021 ອົງການກາແດງລາວ ໄດ້ຈັດກອງປະຊຸມ ກອງປະຊຸມຖອດຖອນບົດຮຽນ ພາຍໃຕ້ ໂຄງການຊ່ວຍເຫຼືອສຸກເສີນ ຈາກເຫດການໄພນ້ຳຖ້ວມ ໃນປີ 2020 ຢູ່ 3 ແຂວງ ຄື: ສະຫວັນນະເຂດ, ສາລະວັນ ແລະ ເຊກອງ ຂຶ້ນ ທີ່ສະໂມສອນ ຫຼັກ4 ນະຄອນຈຳປາສັກ ແຂວງ ຈຳປາສັກ ໂດຍການເປັນປະທານຂອງທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ, ມີບັນດາເຈົ້າເມືອງ, ຮອງເຈົ້າເມືອງ, ມີພະແນກການ ພ້ອມດ້ວຍພະນັກງານ ທີ່ກ່ຽວຂ້ອງເຂົ້າຮ່ວມ ຈຳນວນ 42 ທ່ານ
ໃນພິທີ ທ່ານ ດຮ. ກາວີພອນ ສຸດທິ ຫົວໜ້າກອງຊ່ວຍເຫຼືອບັນເທົາທຸກ ອົງການກາແດງລາວ ພ້ອມດ້ວຍຜູ້ຮັບຜິດຊອບກິດຈະກຳ ໄດ້ລາຍງານກ່ຽວກັບການຈັດຕັ້ງປະຕິບັດໂຄງການ ຊ່ວຍເຫຼືອປະຊາຊົນທີ່ປະສົບໄພພິບັດນ້ຳຖ້ວມຈາກ ພາຍຸໂນອຶນ ໃນກາງເດືອນ ຕຸລາ 2020 ທີ່ຜ່ານມາ ເຊິ່ງໄດ້ສ້າງຄວາມເສຍຫາຍ ໃນເນື້ອທີ່ທຳການຜະລິດ,
ໄຮ່ນາ-ຮົ້ວສວນ, ທີ່ພັກອາໄສຢ່າງໜັກຫນ່ວງ ສົ່ງຜົນກະທົບທີ່ຮ້າຍແຮງຕໍ່ປະຊາຊົນ 213 ບ້ານ, 17.412 ຫຼັງຄາເຮືອນ, 18.824 ຄອບຄົວ, 106.129ຄົນ, ຍິງ 50.851ຄົນ, ກວມເອົາ 14 ເມືອງ ຂອງ 3 ແຂວງ ຄື: ແຂວງສະຫວັນນະເຂດ, ສາລະວັນ, ເຊກອງ; ຍ້ອນເຫັນໄດ້ຄວາມສຳຄັນດັ່ງກ່າວ ທາງອົງການກາແດງລາວຈຶ່ງໄດ້ໃຫ້ການຊ່ວຍເຫຼືອປະຊາຊົນພາຍໃນ 3 ແຂວງ ເພື່ອເປັນການຊ່ວຍເຫຼືອປະຊາຊົນເຊິ່ງເປັນຕົ້ນໄດ້ສະໜອງນ້ຳສະອາດ 135.000 ລິດ, ສະໜອງຕຸກບັນຈຸນ້ຳ 663 ໜ່ວຍ ໃຫ້ແກ່ປະຊາຊົນ 5 ບ້ານ ຂອງ ເມືອງກະລຶມ, ດາກຈຶງ ແຂວງເຊກອງ ແລະ 3 ບ້ານ ຂອງເມືອງສະໝ້ວຍ ແຂວງສາລະວັນ ເຊິ່ງ ມີ ປະຊາຊົນໄດ້ຮັບຜົນປະໂຫຍດ 727 ຄອບຄົວ; ໂຄສະນາສົ່ງເສີມວຽກງານສຸຂະອະນາໄມສຸກເສີນ ໃຫ້ປະຊາຊົນ 546 ຄອບຄົວ ພາຍໃນ 3 ບ້ານ ຂອງເມືອງ ດາກຈຶງ ແຂວງ ເຊກອງ ແລະ 3 ບ້ານ ຂອງ ເມືອງ ສະໝ້ວຍ ແຂວງ ສາລະວັນ; ລົງແຈກຢາຍເຄື່ອງເຄື່ອງອຸປະໂພກ-ບໍລິໂພກ ບັນເທົາທຸກເບື້ອງຕົ້ນ 3.655 ຄອບຄົວ ພາຍໃນ 6 ເມືອງ(ເຊໂປນ,ສອງຄອນ,ຊົນນະບູລີ,ນອງ,ຈຳພອນ,ພິນ) ຂອງ ແຂວງ ສະຫວັນນະເຂດ, 2 ເມືອງ(ຕະໂອ້ຍ,ສະໝ້ວຍ) ແຂວງ ສາລະວັນ ແລະ 3 ເມືອງ(ດາກຈຶງ,ກະລຶມ,ລະມາມ) ຂອງ ແຂວງ ເຊກອງ; ເຊິ່ງມີປະຊາຊົນໄດ້ຮັບຜົນປະໂຫຍດຈາກໂຄງການດັ່ງກ່າວ 27.115 ຄົນ, ຍິງ 13.578 ຄົນ; ເຊິ່ງໄດ້ເລີ່ມຈັດຕັ້ງປະຕິບັດໂຄງການໃນວັນທີ 1 ພະຈິກ 2020-ວັນທີ 25 ມັງກອນ 2021 ແມ່ນ ສິ້ນສຸດໂຄງການ ເຊິ່ງໄດ້ຮັບການສະໜັບສະໜູນຈາກສະຫະພັນກາແດງ ແລະ ຊີກວົງເດືອນແດງສາກົນ ລວມມູນຄ່າ 1.278.574.086 ກີບ.
