ຍີ່ປຸ່ນໃຫ້ການຊ່ວຍເຫລືອລາວ ເກືອບ 2 ລ້ານໂດລາ ສ້າງຄວາມເຂັ້ມແຂງຕ້ານການກໍ່ການຮ້າຍ

ພິທີມອບ-ຮັບ ທຶນຊ່ວຍເຫລືອລ້າຈຳນວນ 200 ລ້ານເຢນ ຫລື ປະມານ 1,92 ລ້ານໂດລາສະຫະລັດໃຫ້ລາວເຮົານຳໃຊ້ເຂົ້າໃນການສ້າງຄວາມເຂັ້ມແຂງຕ້ານການກໍ່ການຮ້າຍໄດ້ມີຂຶ້ນໃນວັນທີ 20 ມັງກອນນີ້, ລະຫ່ວາງທ່ານ ທາເກວະກະ ເຄໂຊ ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ,ແລະ ທ່ານ ວິໄລ ຫລ້າຄຳຟອງ ລັດຖະມົນຕີ ກະຊວງປ້ອງກັນຄວາມສະຫງົບ. ພາຍໃຕ້ໂຄງການເພື່ອສົ່ງເສີມການພັດທະນາເສດຖະກິດ-ສັງຄົມ ຂອງ ຍີ່ປຸ່ນ ໃຫ້ແກ່ ສປປ ລາວ. (ໃນຂົງເຂດປ້ອງກັນຄວາມສະຫງົບ).ຊຶ່ງປະກອບມີ ລົດລາດຕະເວນ,  ເຄື່ອງ X-Ray ແລະ ລົດອະເນກປະສົງອື່ນໆອີກໂດຍຈະໄດ້ສົ່ງມອບໃຫ້ກ່ອນ.

ທ່ານ ທາເກວະກະ ເຄໂຊ ກ່າວໃນພິທີວ່າ: “ພວກເຮົາມີຄວາມຍິນດີ ທີ່ໄດ້ມອບເຄື່ອງຊ່ວຍເຫລືອຕ້ານການກໍ່ການຮ້າຍໃນວາລະຄົບຮອບ 60 ປີ ແຫ່ງການສ້າງຕັ້ງກອງກຳລັງປ້ອງກັນຄວາມສະຫງົບຂອງ ສປປ ລາວ. ຂ້າພະເຈົ້າເຊື່ອໝັ້ນວ່າ ຄວາມສະຫງົບສຸກ ແລະ ການພັດທະນາ ຈະຊ່ວຍນຳພາພວກເຮົາໄປສູ່ສັນຕິພາບ ແລະ ຄວາມຈະເລີນຮຸ່ງເຮືອງໃນທົ່ວພາກພື້ນ.”