ມະຕິຄັ້ງທີ XI ຂອງພັກ ຄືຍອດຕຳລາປົດທຸກ
ໂດຍ: ທິດກໍ່າ
ຕອນບ່າຍຂອງວັນທີ 15 ມັງກອນ 2021 ຜ່ານມາ, ກ່ອນ ສະຫາຍ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ທອງລຸນ ສີສຸລິດ ກ່າວສູນທອນພົດປິດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ, ສະຫາຍ ກິແກ້ວ ໄຂຄຳພິທູນ ໃນຖານະຫົວໜ້າກອງເລຂາກອງປະຊຸມ ໄດ້ຂຶ້ນອ່ານມະຕິກອງປະຊຸມໃຫຍ່ ເຊິ່ງມີເນື້ອໃນສັງເຂບລວມຍອດທີ່ທຸກສະຫາຍຜູ້ແທນຕ້ອງໄດ້ຮັບຮູ້ເປັນເອກະພາບ ທັງຍອມຮັບ ເພື່ອນຳເອົາໄປຈັດຕັ້ງຜັນຂະຫຍາຍໃຫ້ເກີດດອກອອກຜົນໃນ 5 ປີຕໍ່ໜ້າ (2021-2025) ພາຍໃຕ້ຫົວຂໍ້ “ຍົກສູງຄວາມສາມາດນຳພາຂອງພັກ ເພີ່ມທະວີຄວາມສາມັກຄີເປັນປຶກແຜ່ນຂອງປະຊາຊົນໃນຊາດ, ຮັບປະກັນສະຖຽນລະພາບດ້ານການເມືອງຢ່າງໜັກແໜ້ນ, ຜັນຂະຫຍາຍແນວທາງປ່ຽນແປງໃໝ່ສູ່ລວງເລິກ, ສ້າງການຫັນປ່ຽນການພັດທະນາເສດຖະກິດ-ສັງຄົມໄປສູ່ຄຸນນະພາບໃໝ່ຢ່າງແຂງແຮງ, ຍົກລະດັບຄຸນນະພາບຊີວິດຂອງປະຊາຊົນໃຫ້ສູງຂຶ້ນ, ສືບຕໍ່ນຳພາປະເທດຊາດພົ້ນອອກຈາກສະຖານະພາບດ້ອຍພັດທະນາ ແລະ ກ້າວເດີນສູ່ຈຸດໝາຍສັງຄົມນິຍົມ”.
ເພື່ອໃຫ້ຫົວຂໍ້ທີ່ກ່າວມາຂ້າງເທິງໄດ້ຖືກຈັດຕັ້ງປະຕິບັດຢ່າງຈິງຈັງ, ເປັນຮູບປະທຳ ແລະ ເກີດດອກອອກຜົນໃນໄລຍະ 5 ປີຂ້າງໜ້າຈຶ່ງໄດ້ກຳນົດ 6 ເປົ້າໝາຍໃຫຍ່ ເພື່ອເລັ່ງດ່ວນພັດທະນາເສດຖະກິດ-ສັງຄົມໃຫ້ຂະຫຍາຍຕົວຕໍ່ເນື່ອງ ແລະ ວ່ອງໄວ ເປັນຕົ້ນອັນທີໜຶ່ງ: ຕ້ອງເຮັດໃຫ້ເສດຖະກິດແຫ່ງຊາດຂະຫຍາຍຕົວຢ່າງຕໍ່ເນື່ອງ, ມີຄຸນນະພາບ, ໝັ້ນທ່ຽງ ແລະ ຍືນຍົງ ໂດຍຊຸກຍູ້ການເຕີບໂຕເສດຖະກິດແຫ່ງຊາດໃຫ້ບັນລຸ 4% ຕໍ່ປີ. ສອງ: ພັດທະນາຊັບພະຍາກອນມະນຸດໃຫ້ມີຄຸນນະພາບສູງຂຶ້ນ ສາມາດຕອບສະໜອງກັບຄວາມຮຽກຮ້ອງຕ້ອງການໃນການພັດທະນາ, ມີຄວາມສາມາດຄົ້ນຄວ້າ ແລະ ນຳໃຊ້ວິທະຍາສາດ-ເຕັກໂນໂລຊີ ເພື່ອຍົກສູງປະສິດທິພາບ ແລະ ສ້າງມູນຄ່າເພີ່ມການຜະລິດ ແລະ ການບໍລິການ. ສາມ: ຍົກລະດັບຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນໃຫ້ດີຂຶ້ນເທື່ອລະກ້າວ. ສີ່: ປົກປັກຮັກສາສິ່ງແວດລ້ອມໃຫ້ມີຄວາມສົມດູນ ແລະ ຫລຸດຜ່ອນຄວາມສ່ຽງຈາກໄພພິບັດທຳມະຊາດ. ຫ້າ: ສ້າງພື້ນຖານໂຄງລ່າງທີ່ມີຄວາມເຂັ້ມແຂງ, ນຳໃຊ້ທ່າແຮງ, ກາລະໂອກາດຈາກທີ່ຕັ້ງພູມສາດຂອງປະເທດ, ເຂົ້າຮ່ວມຂະບວນການຮ່ວມມື ແລະ ການເຊື່ອມໂຍງກັບພາກພື້ນ ແລະ ສາກົນຢ່າງເປັນເຈົ້າການ. ຫົກ: ຄຸ້ມຄອງບໍລິຫານລັດໃຫ້ມີປະສິດທິພາບ, ສັງຄົມມີຄວາມສະເໝີພາບ, ຍຸຕິທຳ ແລະ ໄດ້ຮັບການປົກປ້ອງຕາມທິດການປົກຄອງດ້ວຍກົດໝາຍທີ່ສັກສິດ ແລະ ເຂັ້ມງວດ.
ທັງໝົດທີ່ກ່າວມານີ້ ແມ່ນລ້ວນແລ້ວແຕ່ເປັນອັນສຸດຍອດຂອງຕຳລາ ເພື່ອນຳເອົາໄປຈັດຕັ້ງປະຕິບັດໃຫ້ເກີດດອກອອກຜົນຢ່າງເປັນຮູບປະທຳໃນໄລຍະ 5 ປີຂ້າງໜ້າ (2021-2025) ເຊິ່ງທັງໝົດຍອດຕຳລານີ້ແມ່ນນອນຢູ່ໃນແຜນພັດທະນາເສດຖະກິດ-ສັງຄົມແຫ່ງລັດ 5 ປີ ຄັ້ງທີ IX ທີ່ໄດ້ສະເໜີຜ່ານກອງປະຊຸມຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ.
ແນວໃດກໍຕາມ, ຍອດຕຳລາທີ່ໄດ້ກາຍເປັນມະຕິດັ່ງກ່າວ ແມ່ນເປັນພຽງທິດສະດີ ຫລືວ່າ ຍັງເປັນນາມມະທຳທີ່ຈະຕ້ອງໄດ້ພິສູດກັນໃນຕອນຈັດຕັ້ງປະຕິບັດໃນໄລຍະ 5 ປີຂ້າງໜ້າ. ກວ່າຈະສຳເລັດຕາມເປົ້າໝາຍທີ່ວາງອອກມັນຕ້ອງອີງໃສ່ຫລາຍເງື່ອນໄຂ ແລະ ຫລາຍປັດໄຈທີ່ຈະມາເອື້ອອຳນວຍໃຫ້ໝາກຜົນແຫ່ງການຈັດຕັ້ງປະຕິບັດ. ອັນສຳຄັນທີ່ສຸດແມ່ນເວົ້າແລ້ວຕ້ອງເຮັດ ແລະ ແມ່ນຄົນເປັນຜູ້ເຮັດ. ບັນຫາອັນຕັດສິນກວ່າໝູ່ແມ່ນອົງຄະນະພັກຢູ່ບ່ອນນັ້ນຕ້ອງເປັນແບບຢ່າງ ແລະ ນຳພາເຮັດຢ່າງຈິງຈັງ, ບໍ່ພາກັນສໍ້ລາດບັງຫລວງ, ຫລີກລ່ຽງແບບແຜນວິທີເຮັດວຽກຕາມຄະເຢີມ ແລະ ຕາມມີຕາມເກີດ. ໃນເງື່ອນໄຂທີ່ສະພາບການຂອງໂລກ ແລະ ພາກພື້ນມີການປ່ຽນແປງທີ່ຄາດເດົາໄດ້ຍາກ ສົມທົບກັບໄພທຳມະຊາດ, ໂຣຄາພະຍາດມາຂົ່ມຂູ່ຄືດັ່ງທຸກວັນນີ້ ພວກເຮົາຍິ່ງຈະໄດ້ຜະເຊີນກັບສິ່ງທ້າທາຍກີດຂວາງກົດໜ່ວງຫລາຍດ້ານ.
ເຖິງຢ່າງໃດກໍດີ, ພວກເຮົາມີຄວາມເຊື່ອໝັ້ນຄະນະບໍລິຫານງານສູນກາງພັກຊຸດໃໝ່ຕ້ອງນຳພາປະເທດຊາດກ້າວສູ່ຄວາມຈະເລີນ ແລະ ອອກຈາກສະຖານະພາບຄວາມທຸກຍາກ ແລະ ດ້ອຍພັດທະນາໄດ້ຢ່າງແນ່ນອນ.
