ຍີ່ປຸ່ນພົບຄົນຕິດໂຄວິດຊະນິດກາຍພັນ ທັງທີ່ບໍ່ໄດ້ໄປຕ່າງປະເທດ
ຊາວຍີ່ປຸ່ນຢ່າງໜ້ອຍ 3 ຄົນ ຕິດເຊື້ອໄວຣັສໂຄໂຣນາສາຍພັນໃໝ່ “ຊະນິດກາຍພັນ” ແບບດຽວກັບທີ່ພົບຢູ່ອັງກິດ ທັງທີ່ບໍ່ໄດ້ເດີນທາງອອກນອກປະເທດ ຫລື ໃກ້ຊິດກັບຜູ້ທີ່ຫາກໍກັບມາຈາກຕ່າງປະເທດ.
ສຳນັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກຂອງຍີ່ປຸ່ນອອກຖະແຫລງການ ໃນວັນທີ 18 ມັງກອນ 2021 ເລື່ອງການພົບຜູ້ຕິດເຊື້ອໂຄວິດ-19 ຢູ່ແຂວງຊິຊຸໂອກະ ທາງຕອນກາງຂອງເກາະຮົນຊູ ຈຳນວນ 3 ຄົນ ອາຍຸລະຫວ່າງ 20-60 ປີ ຕິດເຊື້ອໄວຣັສໂຄໂຣນາສາຍພັນໃໝ່ “ຊະນິດກາຍພັນ” ແບບດຽວກັບທີ່ພົບຢູ່ອັງກິດ.
ອີກທັງ ຜູ້ຕິດເຊື້ອທັງສາມຄົນບໍ່ມີປະຫວັດເດີນທາງໄປອັງກິດໃນໄລຍະນີ້ ແລະ ບໍ່ໄດ້ສຳຜັດໃກ້ຊິດກັບບຸກຄົນທີ່ຫາກໍເດີນທາງມາຈາກຕ່າງປະເທດ. ຄະນະແພດຈຶ່ງຕັ້ງສົມມຸດວ່າ: ເປັນການຕິດເຊື້ອຈາກພາຍໃນປະເທດ.
ທັງນີ້, ຜູ້ຊ່ຽວຊານກຳລັງສອບສວນພະຍາດຢ່າງລະອຽດວ່າ: ທັງສາມຄົນຕິດເຊື້ອໄວຣັສໂຄໂຣນາຊະນິດນີ້ໄດ້ແນວໃດ ແລະ ຢືນຢັນວ່າ: ໃນເວລານີ້ ຍັງບໍ່ພົບການແຜ່ກະຈາຍເປັນວົງກວ້າງຂອງເຊື້ອພະຍາດຊະນິດນີ້ຢູ່ແຂວງຊິຊຸໂອກະ. ປັດຈຸບັນ ຍີ່ປຸ່ນມີຜູ້ຕິດເຊື້ອໂຄວິດ-19 ຈາກການຕິດເຊື້ອໄວຣັສໂຄໂຣນາສາຍພັນໃໝ່ຊະນິດກາຍພັນຢ່າງໜ້ອຍ 45 ຄົນ ໂດຍເປັນສາຍພັນແບບດຽວກັບທີ່ພົບຄັ້ງທຳອິດຢູ່ອັງກິດ, ອາຟຣິກາໃຕ້ ແລະ ບຣາຊິລ.
ອີກດ້ານໜຶ່ງ, ຄະນະກຳມາທິການດ້ານວິທະຍາສາດຂອງກະຊວງສາທາລະນະສຸກອາຟຣິກາໃຕ້ ອອກລາຍງານກ່ຽວກັບຄວາມຄືບໜ້າການວິເຄາະເຊື້ອໄວຣັສໂຄໂຣນາສາຍພັນໃໝ່ຊະນິດກາຍພັນທີ່ພົບໃນປະເທດ ໃນຊື່ “510Y.V2” ມີຄຸນສົມບັດແຜ່ເຊື້ອໄດ້ໄວກວ່າປົກກະຕິ 50%, ແຕ່ຍັງບໍ່ພົບຫລັກຖານແນ່ນອນວ່າ: ເຊື້ອໄວຣັສຊະນິດດັ່ງກ່າວຈະກໍ່ໃຫ້ເກີດອາການປ່ວຍທີ່ເປັນອັນຕະລາຍເຖິງແກ່ຊີວິດ ຫລາຍກວ່າເຊື້ອໄວຣັສໂຄໂຣນາສາຍພັນທີ່ແຜ່ລະບາດທົ່ວໂລກນັບແຕ່ຕົ້ນປີຜ່ານມາ.
