ຊາວອິນເດຍນັບລ້ານຮ່ວມລ້າງບາບ ຢູ່ແມ່ນ້ຳຄົງຄາ ບໍ່ຢ້ານໂຄວິດ
ຊາວຮິນດູຫລາຍຊີວິດມາລວມຕົວກັນຢູ່ເມືອງ Haridwar ປະເທດອິນເດຍ ເພື່ອຍ່າງລົງແມ່ນ້ຳຄົງຄາ ເຊິ່ງຖືເປັນແມ່ນ້ຳສັກສິດຂອງຊາວຮິນດູ ໃນວັນທີ 14 ມັງກອນ ເຊິ່ງເປັນມື້ທຳອິດຂອງພິທີອາບນ້ຳຊຳລະລ້າງບາບມະຫາກຸມພະເມລາ ທ່າມກາງຄວາມໜາວເຢັນ ແລະ ວິກິດພະຍາດລະບາດໃຫຍ່ ເຊິ່ງອິນເດຍມີຜູ້ຕິດເຊື້ອ 10 ລ້ານກວ່າຄົນ ສູງສຸດອັນດັບ 2 ຂອງໂລກ ແລະ ມີຜູ້ເສຍຊີວິດແລ້ວ 150.000 ກວ່າຄົນ. ຜູ້ຮ່ວມພິທີສ່ວນຫລາຍ ເຊິ່ງມີອາຍຸແຕ່ 3 ປີ ຈົນເຖິງ 80 ປີ ຕ່າງບໍ່ໃສ່ຜ້າປິດປາກ-ດັງ ແລະ ບໍ່ມີການເວັ້ນໄລຍະຫ່າງທາງສັງຄົມ.
ຕຳຫລວດອາວຸໂສຄົນໜຶ່ງ ລະບຸວ່າ: ໃນວັນທີ 14 ມັງກອນ ມີປະຊາຊົນມາເຮັດພິທີລ້າງບາບປະມານ 5 ແສນ – 1 ລ້ານຄົນ ເຊິ່ງເຈົ້າໜ້າທີ່ພະຍາຍາມເຕືອນໃຫ້ປະຊາຊົນໃສ່ຜ້າປິດປາກ-ດັງແລ້ວ, ແຕ່ບໍ່ເປັນຜົນ. ເຖິງວ່າຜູ້ຈັດງານຈະດຳເນີນມາດຕະການປ້ອງກັນພະຍາດລະບາດຢ່າງຄົບຖ້ວນ ແລະ ເຊື່ອວ່າເຈົ້າແມ່ຄົງຄາຈະຊ່ວຍຄຸ້ມຄອງຊາວຮິນດູເຫລົ່ານີ້.
