ນໍ້າກັດຢໍລະປາ ໂຄງການຕົວແບບຂອງການທ່ອງທ່ຽວແບບຍືນຍົງ

ໃນໂອກາດເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນ ປະຕິວັດລາວ ໃນວັນທີ 13 ມັງກອນນີ້, ທ່ານ ສົມເພັດ ມ້າວປະເສີດ ປະທານບໍລິສັດພັດທະນາແຫລ່ງທ່ອງທ່ຽວທໍາມະຊາດ ນໍ້າກັດຢໍລະປາ ໄດ້ປະກອບຄຳເຫັນຕໍ່ກອງປະຊຸມໃນຫົວຂໍ້: “ການພັດທະນາການທ່ອງທ່ຽວແບບຍືນຍົງ”. ທ່ານກ່າວວ່າ:  ຍ້ອນເຫັນໄດ້ຄວາມສໍາຄັນຂອງການພັດທະນາການທ່ອງທ່ຽວທໍາມະຊາດແບບຍືນຍົງ, ພັກ ຈຶ່ງໄດ້ກໍານົດແນວທາງໄວ້ວ່າ: “ພັດທະນາຂະແໜງທ່ອງທ່ຽວໃຫ້ກາຍເປັນອຸດສາຫະກໍາທີ່ຄົບວົງຈອນ, ເປັນທ່າແຮງຂອງພື້ນຖານເສດຖະກິດແຫ່ງຊາດ ດ້ວຍການສົ່ງເສີມການທ່ອງທ່ຽວວັດທະນະທໍາ, ທໍາມະຊາດ ແລະ ປະຫວັດສາດ, ສ້າງເສດຖະກິດແຫ່ງຊາດໃຫ້ເຕີບໃຫຍ່ເຂັ້ມແຂງແຮງຕໍ່ເນື່ອງຕາມທິດຍືນຍົງ ມີຄວາມກົມກຽວກັບສັງຄົມ ແລະ ສິ່ງແວດລ້ອມ”. ແນວທາງດັ່ງກ່າວໄດ້ເປັນໄມ້ງັດສໍາຄັນໃນການຊຸກຍູ້ສົ່ງເສີມໃຫ້ພາກທຸລະກິດຫັນມາລົງທຶນເຂົ້າໃສ່ທຸລະກິດທີ່ສ້າງຖານລາຍຮັບຍືນຍົງໃຫ້ທ້ອງຖິ່ນ ແລະ ປະເທດຊາດ ໂດຍສະເພາະການພັດທະນາການທ່ອງທ່ຽວທໍາມະຊາດແບບອະນຸລັກຕາມທິດສີຂຽວ ແລະ ຍືນຍົງ. ດັ່ງນັ້ນ ບໍລິສັດພັດທະນາແຫລ່ງທ່ອງທ່ຽວທໍາມະຊາດພວກເຮົາ ຈຶ່ງໄດ້ສະເໜີຂໍອະນຸຍາດລົງທຶນພັດທະນາສະຖານທີ່ທ່ອງທ່ຽວທໍາມະຊາດແບບຕິດພັນກັບການປົກປັກຮັກສາສິ່ງແວດລ້ອມ ແລະ ການອະນຸລັກຮັກສາວິຖີການດໍາລົງຊີວິດຂອງເຜົ່າຕ່າງໆ ແບບປະຊາຊົນມີສ່ວນຮ່ວມ ເປັນຕົ້ນໃນເຂດພື້ນທີ່ອ່າງໂຕ່ງຂອງສາຍນໍ້າກັດ ເມືອງໄຊ ແຂວງອຸດົມໄຊ ເຊິ່ງເປັນໂຄງການລິເລີ່ມທຳອິດ ແລະ ກໍເຫັນວ່າມີຜົນສຳເລັດເປັນຢ່າງດີຕະຫລອດມາຄື: ບໍລິສັດໄດ້ມີການລົງທຶນຢ່າງຫລວງຫລາຍເຂົ້າໃນການພັດທະນາໂຄງການໃຫ້ກາຍເປັນຮູບປະທໍາ, ພັດທະນາພື້ນຖານໂຄງລ່າງການທ່ອງທ່ຽວທີ່ມີຊື່ສຽງໃຫ້ແຂວງອຸດົມໄຊ ກໍຄື ສປປ ລາວເຮົາ ແລະ ໄດ້ຮັບຄວາມນິຍົມຊົມຊອບ ຈາກແຂກພາຍໃນ ແລະ ຕ່າງປະເທດເປັນຢ່າງດີ ເຊິ່ງໃນແຕ່ລະປີໄດ້ມີແຂກເຂົ້າມາໃຊ້ບໍລິການເພີ່ມຂຶ້ນເລື້ອຍໆ; ພ້ອມໄດ້ປະສານສົມທົບກັບອົງການປົກຄອງ ແລະ ປະຊາຊົນທ້ອງຖິ່ນປະກອບສ່ວນເຂົ້າໃນການອະນຸລັກ-ຟື້ນຟູຊັບພະຍາກອນປ່າໄມ້ ແລະ ຊີວະນາໆພັນໃນເຂດອ່າງໂຕ່ງຂອງສາຍນໍ້າກັດ ປ່າສະຫງວນແຫ່ງຊາດ ແລະ ອັນພົ້ນເດັ່ນ ແມ່ນສາມາດຫລຸດຜ່ອນການບຸກລຸກທໍາລາຍທໍາມະຊາດ ເຮັດໃຫ້ປ່າໄມ້ມີຄວາມອຸດົມສົມບູນ, ສັດບົກ, ສັດນໍ້າ ແລະ ຊີວະນາໆພັນກໍມີຈໍານວນເພີ່ມຂຶ້ນເລື້ອຍໆ; ປະກອບສ່ວນໃນການອະນຸລັກວັດທະນະທໍາ, ວິຖີຊິວິດ, ຮີດຄອງປະເພນີຂອງປະຊາຊົນບັນດາເຜົ່າໃນທ້ອງຖິ່ນ ໂດຍສະເພາະເຜົ່າກຶມມຸໃນເຂດໂຄງການ ດ້ວຍການສ້າງບ້ານຊົນເຜົ່າ, ຮັກສາການນຸ່ງຖື ແລະ ເຊື່ອມສານວິຖີການດໍາລົງຊີວິດໃຫ້ຕິດພັນກັບໂຄງການຢ່າງກົມກຽວ.

ທ່ານ ສົມເພັດ ມ້າວປະເສີດ ໃຫ້ຮູ້ຕື່ມວ່າ: ໂຄງການດັ່ງກ່າວ ຍັງສາມາດສ້າງວຽກເຮັດງານທໍາໃຫ້ປະຊາຊົນໃນພື້ນທີ່ໂຄງການໄດ້ຫລາຍຮ້ອຍຄົນ, ຊ່ວຍໃຫ້ເຂົາເຈົ້າຫັນປ່ຽນຈາກການອາໄສຫາກິນຕາມທໍາມະຊາດ ກາຍເປັນບຸກຄະລາກອນທີ່ມີຄຸນນະພາບໃນວິຊາສະເພາະດ້ານຕ່າງໆ ທີ່ຕິດພັນກັບການບໍລິການການທ່ອງທ່ຽວເປັນຈໍານວນຫລວງຫລາຍ ແລະ ປະກອບສ່ວນສ້າງຜະລິດຕະພັນການທ່ອງທ່ຽວທີ່ມີຄຸນນະພາບ ເຊິ່ງຈະກາຍເປັນຜະລິດຕະພັນສົ່ງອອກກັບທີ່ທີ່ມີຄວາມຍືນຍົງ, ສາມາດສ້າງລາຍຮັບທາງກົງ ແລະ ທາງອ້ອມແກ່ປະຊາຊົນ, ອົງການປົກຄອງແຂວງ ກໍຄືປະເທດຊາດຂອງເຮົາໃນໄລຍະຍາວ.