ການຈັດສັນກັ່ນຕອງ ແຮງງານຢູ່ບ້ານເພິ່ນ
ໂດຍ: ວິເສດ ສະແຫວງສຶກສາ
ເລື່ອງທັງໝົດທີ່ຖອດອອກມາສະເໜີໃນຄໍລຳປະຈຳວັນນີ້ ລ້ວນແຕ່ພົວພັນກັບບັນຫາແຮງງານຕ່າງປະເທດຢູ່ບັນດາປະເທດໃກ້ຄຽງເຊັ່ນ: ໄທ, ມາເລເຊຍ ແລະ ສປ ຈີນ ເພື່ອເບິ່ງໄວ້ເປັນບົດຮຽນ ເພາະໃນຍຸກໂລກາພິວັດນີ້ ບໍ່ມີປະເທດໃດສາມາດແຍກປ່ຽນຕົນໃຫ້ຢູ່ໂດດດ່ຽວດຽວດາຍໄດ້. ເຫດການທີ່ເກີດຂຶ້ນໃນບ່ອນໜຶ່ງຍ່ອມສາມາດສົ່ງຜົນກະທົບແບບຕ່ອງໂສ້ສູ່ປະເທດອື່ນ. ຢູ່ໄທ, ຂ່າວສົດຂ່າວຮ້ອນກ່ຽວກັບແຮງງານຕ່າງປະເທດໄດ້ກາຍເປັນຈຸດສົນໃຈຂອງບັນດາປະເທດໃກ້ຄຽງທີ່ມີຄົນໄປອອກແຮງງານ ທັງຖືກ ແລະ ບໍ່ຖືກກົດໝາຍ. ຂ່າວວຽງຈັນທາມ (Vientiane Times) ປະຈຳວັນທີ 1 ເດືອນນີ້ ໄດ້ເວົ້າເຖິງນະໂຍບາຍຜ່ອນຜັນຂອງທາງການໄທຕໍ່ແຮງງານຜິດກົດໝາຍຈາກຕ່າງປະເທດ ແນໃສ່ໃຫ້ແຮງງານເຫລົ່ານີ້ມີໂອກາດປະກອບເອກະສານ ເພື່ອອອກແຮງງານຢ່າງຖືກກົດໝາຍຢູ່ໄທ. ນະໂຍບາຍທີ່ວ່ານີ້ມີຜົນສັກສິດນັບແຕ່ວັນທີ 23 ເດືອນມິຖຸນາປີນີ້ເປັນຕົ້ນມາ. ນະໂຍບາຍຜ່ອນຜັນດັ່ງກ່າວນອນຢູ່ໃນຄຳສັ່ງກ່ຽວກັບການຄວບຄຸມແຮງງານເຄື່ອນທີ່ ກໍຄືແຮງງານຕ່າງປະເທດທີ່ລັກລອບອອກແຮງງານຢູ່ໄທ. ໃນໄລຍະຈັດລະບຽບການໃໝ່ສຳລັບແຮງງານທີ່ຜິດກົດໝາຍນີ້, ໄທຈະຜະເຊີນກັບບັນຫາການຂາດແຄນແຮງງານໃນຂະແໜງການກໍ່ສ້າງ, ໃນຂະແໜງທຸລະກິດຂະໜາດນ້ອຍ ແລະ ຂະໜາດກາງ ກໍຄືແຮງງານຮັບໃຊ້ໃນຄົວເຮືອນ. ມາດຕະການແກ້ໄຂແຮງງານຜິດກົດໝາຍຢູ່ໄທຄັ້ງນີ້ ຕົ້ນຕໍແມ່ນເພື່ອແກ້ໄຂບັນຫາຫາງສຽງສາກົນທີ່ກ່າວຫາໄທກ່ຽວກັບການຄ້າມະນຸດທີ່ຕິດພັນກັບບັນຫາແຮງງານເຖື່ອນຈາກຕ່າງປະເທດ. ມາດຕະການໃໝ່ໃນການຄວບຄຸມແຮງງານໄດ້ກຳນົດໂທດປັບໄໝຜູ້ຈ້າງແຮງງານຕ່າງປະເທດທີ່ຜິດກົດໝາຍເປັນເງິນລະຫວ່າງ 400.000-800.000 ບາດຕໍ່ແຮງງານທີ່ຜິດກົດໝາຍ 1 ຄົນ. ສຳລັບຄົນຕ່າງປະເທດທີ່ລັກລອບອອກແຮງງານນັ້ນກໍຈະໄດ້ຮັບໂທດຖືກປັບໄໝແຕ່ 2.000 ຫາ 100.000 ບາດ ຫລື ຕິດຄຸກສູງສຸດ 5 ປີ. ຢູ່ມາເລເຊຍ, ທາງການຂອງປະເທດກໍເອົາມາດຕະການເດັດຂາດກັບແຮງງານຕ່າງປະເທດທີ່ຜິດກົດໝາຍເຊັ່ນກັນ ໂດຍໄດ້ເລີ່ມປະຕິບັດມາເມື່ອສອງປີກ່ອນໜ້ານີ້. ມາເລເຊຍມີພົນລະເມືອງ 32 ລ້ານຄົນ, ມີແຮງງານຕ່າງປະເທດທີ່ຈົດທະບຽນຢ່າງຖືກຕ້ອງປະມານ 2 ລ້ານຄົນ, ສ່ວນທີ່ອອກແຮງງານໂດຍບໍ່ໄດ້ຮັບອະນຸຍາດ (ຜິດກົດໝາຍ) ນັ້ນມີກວ່າ 1 ລ້ານຄົນ. ຍ້ອນແນວນີ້ເອງ ທາງການຂອງປະເທດນີ້ຈຶ່ງໄດ້ກຳນົດເສັ້ນຕາຍໃສ່ວັນທີ 30 ເດືອນມິຖຸນາຜ່ານມາ ໃຫ້ແຮງງານຕ່າງປະເທດທີ່ເຄື່ອນໄຫວແບບຜິດກົດໝາຍໄປຈົດທະບຽນອອກແຮງງານຢ່າງຖືກຕ້ອງ. ທາງການມາເລເຊຍຄາດວ່າໃນຈຳນວນແຮງງານເຖື່ອນກວ່າ 1 ລ້ານຄົນນັ້ນ ມີ 600 ຄົນທີ່ມີເງື່ອນໄຂສືບຕໍ່ເຮັດວຽກແບບຖືກກົດໝາຍ ເພາະພວກເຂົາເປັນແຮງງານດີ ແລະ ເຂັ້ມວຽກ. ແຕ່ພໍຮອດມື້ກຳນົດເສັ້ນຕາຍແທ້ໆ ພັດມີແຮງງານຕ່າງປະເທດພຽງ 155.000 ຄົນໄປຈົດທະບຽນ. ເປັນອັນວ່າຕໍ່ໄປທາງການມາເລເຊຍຈະໃຊ້ມາດຕະການເດັດຂາດກັບແຮງງານນອກກົດໝາຍດ້ວຍວິທີຈັບກຸມ, ປັບໄໝ ແລະ ເນລະເທດກັບຄືນປະເທດຕົ້ນທາງເທົ່ານັ້ນ. ສ່ວນຢູ່ ສປ ຈີນ ນັ້ນ, ຂ່າວຕ່າງປະເທດໃນທ້າຍເດືອນມິຖຸນາປີນີ້ໃຫ້ຮູ້ວ່າ ທາງການຂອງປະເທດນີ້ໄດ້ເນັ້ນນະໂຍບາຍຈັດສັນກັ່ນຕອງເອົາແຮງງານຕ່າງປະເທດທີ່ມີຄວາມຊຳນານງານໃນຂະແໜງການທີ່ ສປ ຈີນ ມີຄວາມຈຳເປັນສູງ ໂດຍຮູບການອອກໃບອະນຸຍາດເຮັດວຽກແບບໃໝ່. ໃນເມື່ອກ່ອນ, ສປ ຈີນ ມີລະບົບອອກໃບອະນຸຍາດອອກແຮງງານສອງແບບໃຫ້ຄົນຕ່າງປະເທດ ເຊິ່ງໃນປັດຈຸບັນ ໄດ້ໂຮມເຂົ້າເປັນແບບດຽວ ເພື່ອຄວາມເປັນເອກະພາບ, ຮັບປະກັນບໍ່ໃຫ້ມີຊ່ອງຫວ່າງ, ຍົກສູງປະສິດທິພາບໃນການຄຸ້ມຄອງແຮງງານຄຸນນະພາບ. ຂ່າວບອກວ່າ ໃບອະນຸຍາດອອກແຮງງານແບບໃໝ່ນີ້ ໄດ້ມອບໃຫ້ຜູ້ບໍລິຫານລະດັບສູງຂອງບໍລິສັດ BMW ປະຈຳຢູ່ ສປ ຈີນ ເປັນຜູ້ທຳອິດ.
