ຂະແໜງການອຸດສາຫະກໍາຍັງເປັນປັດໄຈສຳຄັນໃນການພັດທະນາເສດຖະກິດລາວເຮົາ

ໃນຮ່າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ທີ່ນຳສະເຫນີໂດຍສະຫາຍ ທອງລຸນ ສີສຸລິດ ກໍາມະການກົມການເມືອງສູນກາງພັກ, ນາຍົກລັດຖະມົນຕີ ຕໍ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ ໃນເຊົ້າວັນທີ 13 ມັງກອນນີ້ ໃຫ້ຮູ້ວ່າ: ໃນໄລຍະ 5 ປີຜ່ານມາ, ເສດຖະກິດແຫ່ງຊາດສືບຕໍ່ຂະຫຍາຍຕົວຢ່າງຕໍ່ເນື່ອງ ເຊິ່ງສະເລ່ຍຄາດວ່າຈະຢູ່ໃນລະດັບ 5,8% ຕໍ່ປີ ແລະ ໃນປີ 2020 ຈະຂະຫຍາຍຕົວປະມານ 3,3%, ແຕ່ເຫັນວ່າອັດຕາການຂະຫຍາຍຕົວດັ່ງກ່າວແມ່ນມີທ່າອ່ຽງຫລຸດລົງຢ່າງຕໍ່ເນື່ອງ, ໃນນີ້ ຂະແໜງກະສິກໍາ ຂະຫຍາຍຕົວສະເລ່ຍ 2,1%, ອຸດສາຫະກໍາ ຂະຫຍາຍຕົວສະເລ່ຍ 9,1%, ການບໍລິການ ຂະຫຍາຍຕົວສະເລ່ຍ 4,8% ແລະ ພາສີອາກອນ ຂະຫຍາຍສະເລ່ຍ 5,2% ຊຶ່ງສັງເກດເຫັນວ່າປັດໄຈທີ່ຊຸກຍູ້ໃຫ້ເສດຖະກິດຂະຫຍາຍຕົວສ່ວນໃຫຍ່ມາຈາກຂະແໜງການອຸດສາຫະກໍາ ໂດຍສະເພາະຂະແໜງພະລັງງານໄຟຟ້າ ແລະ ການກໍ່ສ້າງ, ສໍາລັບຂະແໜງບໍລິການການຂາຍຍົກ-ຂາຍຍ່ອຍ, ການເງິນ ແລະ ປະກັນໄພອື່ນໆນັ້ນກໍມີການຂະຫຍາຍຕົວ ແຕ່ການປະກອບສ່ວນຕໍ່ເສດຖະກິດບໍ່ສູງ.

ໃນຂະນະດຽວກັນ, ການຂະຫຍາຍຕົວຂອງຂະແໜງບໍລິການກໍມີທ່າອ່ຽງຫລຸດລົງ ໂດຍສະເພາະແມ່ນການບໍລິການທີ່ພັກອາໄສ ແລະ ຮ້ານອາຫານທີ່ຕິດພັນກັບການທ່ອງທ່ຽວ ໂດຍລວມແລ້ວໃນຜ່ານມານີ້ ການຂະຫຍາຍຕົວເສດຖະກິດແມ່ນຫລຸດລົງຕາມກະແສລວມຂອງເສດຖະກິດພາກພື້ນ ແລະ ສາກົນທີ່ມີທ່າອ່ຽງຫລຸດລົງ ໂດຍສະເພາະບັນດາປະເທດຄູ່ຄ້າທີ່ສໍາຄັນ ແລະ ຕໍ່ມາແມ່ນຜົນກະທົບຈາກໄພພິບັດທໍາມະຊາດ ແລະ ການລະບາດພະຍາດໂຄວິດ-19.

ສະຫາຍ ນາຍົກລັດຖະມົນຕີ ຍົກໃຫ້ເຫັນວ່າ: ປັດໄຈສໍາຄັນອີກອັນໜຶ່ງ ແມ່ນການຫັນມາອາໄສການຜະລິດ ແລະ ການສົ່ງອອກສິນຄ້ານອກຂະແໜງຊັບພະຍາກອນທໍາມະຊາດ, ຫລຸດຜ່ອນການຂຸດຄົ້ນແຮ່ທາດ ແລະ ການສົ່ງອອກໄມ້, ຫັນມາສົ່ງເສີມການຜະລິດອຸດສາຫະກໍາປຸງແຕ່ງກະສິກໍາ, ຊິ້ນສ່ວນເຄື່ອງເອເລັກໂຕຣນິກ, ເຄື່ອງໄຟຟ້າ ແລະ ການບໍລິການທີ່ຕິດພັນກັບການທ່ອງທ່ຽວຫລາຍຂຶ້ນ. ຄຽງຄູ່ກັນນັ້ນ, ລັດຖະບານໄດ້ເຂັ້ມງວດການປະຕິບັດລະບຽບກົດໝາຍ ເປັນຕົ້ນເຂັ້ມງວດການສົ່ງອອກໄມ້ເຖື່ອນ ເຊິ່ງເຮັດໃຫ້ເສດຖະກິດຂອງລາວມີການຂະຫຍາຍຕົວຊ້າລົງເລັກນ້ອຍ, ແຕ່ເປັນການເຕີບໂຕທີ່ມີຄຸນນະພາບຫລາຍຂຶ້ນ ແລະ ເປັນການຫັນເຂົ້າສູ່ຖານການຜະລິດຕົວຈິງ ເພື່ອສ້າງພື້ນຖານທີ່ໜັກແໜ້ນໃຫ້ແກ່ການເຕີບໂຕໃນຕໍ່ໜ້າ.

ສະຫາຍນາຍົກ ຢໍ້າວ່າ: ໃນຜ່ານມາ ເຖິງວ່າປະເທດເຮົາຈະຜະເຊີນກັບຄວາມຫຍຸ້ງຍາກຕ່າງໆອັນໜັກໜ່ວງກໍຕາມ, ແຕ່ກໍຍັງສາມາດປະຄອງຕົວ ແລະ ຜ່ານບັນດາຄວາມຫຍຸ້ງຍາກໃນລະດັບດີສົມຄວນ, ຮັບປະກັນການຜະລິດ ແລະ ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນ. ບັນດາໂຄງການລົງທຶນຂະໜາດໃຫຍ່ໃນຫລາຍຂົງເຂດຍັງສືບຕໍ່ໄດ້ຮັບການຈັດຕັ້ງປະຕິບັດ ເປັນຕົ້ນໂຄງການກໍ່ສ້າງທາງລົດໄຟ ລາວ-ຈີນ, ໂຄງການກໍ່ສ້າງທາງດ່ວນນະຄອນຫລວງວຽງຈັນ-ວັງວຽງ, ໂຄງການພະລັງງານ-ບໍ່ແຮ່, ໂຄງການພັດທະນາເຂດເສດຖະກິດພິເສດ ແລະ ໂຄງການພັດທະນາການທ່ອງທ່ຽວ ແລະ ຜົນສໍາເລັດອັນພົ້ນເດັ່ນແມ່ນພວກເຮົາສາມາດບັນລຸຄາດໝາຍທີ່ສໍາຄັນໃນການນໍາພາປະເທດຊາດຫລຸດພົ້ນອອກຈາກສະຖານະພາບດ້ອຍພັດທະນາ, ສັງຄົມມີຄວາມສະຫງົບ, ມີສະຖຽນລະພາບຢ່າງໜັກແໜ້ນ ແລະ ອັດຕາຄວາມທຸກຍາກມີທ່າອ່ຽງຫລຸດລົງ.