ພໍ່ທຳຮ້າຍຮ່າງກາຍລູກສາວ ອາຍຸ 15 ປີ ຈຳຄຸກ 5 ປີ
ລາຍງານຂ່າວຕ່າງປະເທດ ຈາກ ຫວຽດນາມ ວັນທີ 12 ມັງກອນນີ້ ໃຫ້ຮູ້ວ່າ ຫງວຽນແອັງດຶກ, ອາຍຸ 41 ປີ ຖືກດຳເນີນຄະດີ ໃນຂໍ້ຫາໃຊ້ຄວາມຮຸນແຮງທຳຮ້າຍຮ່າງກາຍລູກສາວ ອາຍຸ 15 ປີຈົນສະຫຼົບ.
ວັນທີ 12 ມັງກອນນີ້, ຕຳຫຼວດເມືອງຕຽນຢູ ໄດ້ດຳເນີນຄະດີກັບທ້າວ ດຶກ ໃນຂໍ້ຫາທຳຮ້າຍຮ່າງກາຍລູກສາວຕາມວັກ 2 ມາດຕາ 185 ກົດໝາຍອາຍາ. ລະດັບໂທດຈຳຄຸກແຕ່ 2-5 ປີ. ດຶກເສບຢາເສບຕິດໄດ້ຫຼາຍປີມາແລ້ວ ແລະ ມີຄະດີຕິດຕົວຢູ່ 2 ຄະດີ: ຍັກຍອກສໍ້ໂກງເອົາຊັບສິນ ແລະ ລັກຊັບພົນລະເມືອງ.
ຜ່ານການສອບສວນ ຮູ້ວ່າ ກ່ອນໜ້ານີ້ 14 ປີ ຜົວ-ເມຍ ດຶກ ໄດ້ແຍກທາງກັນ, ລູກສາວອາຍຸ 15 ປີຢູ່ກັບພໍ່ປູ່-ແມ່ຍ່າ. ກ່ອນໜ້ານີ້ 2-3 ປີ ດຶກໄດ້ເອົາລູກໄປຢູ່ນຳ ແລະ ບັງຄັບໃຫ້ອອກໂຮງຮຽນ.
ເມື່ອໃດ ດຶກໃຈຮ້າຍຂຶ້ນມາກໍໃຊ້ແປບນໍ້າຢາງຕີລູກສາວຢ່າງໂຫດຮ້າຍສາມານ ແລະ ຕີເນື່ອງນິດລຽນຕິດແຕ່ວັນທີ 23 – 31 ທັນວາ 2020 ທີ່ຜ່ານມາ, ລູກສາວມີຮອຍບາດແປ້ວ ຢູ່ຕາມຮ່າງກາຍຫຼາຍບ່ອນ. ແຕ່ຖືກຕີໜັກທີ່ສຸດແມ່ນວັນທີ 30 ທັນວາ 2020 ຍ້ອນລູກສາວລັກໄປຫາປູ່ກັບຍ່າ ເມື່ອກັບຄືນມາກໍຖືກ ດຶກຕີ. ດຶກເອົາມີດຕອງເດີຕັດຜົມລູກສາວ, ຕີເຂົ້າກ້ານຄໍ ແລະ ມັດມື ແລ້ວທຳຮ້າຍລູກຈົນສະຫຼົບ. ນ້ອງໄດ້ຮັບການຊ່ວຍເຫຼືອຈາກຍາດພີ່ນ້ອງ ແລະ ນຳສົ່ງໂຮງໝໍທົ່ວໄປ ໃນແຂວງ ບັກນິງ.
ເຈົ້າໜ້າທີ່ກ່ຽວຂ້ອງ ໃຫ້ຮູ້ວ່າ ຜູ້ເຄາະຮ້າຍ ຖືກທຸບຕີຈົນໜັງຂາດ, ນູມເນົ່າທົ່ວໂຕ, ແຂນ ຂາ ແລະ ໜ້າຕາ.
