ການຫລຸລູກໂດຍບໍ່ຖືກຕ້ອງ

ໃນຍຸກຂອງຄວາມເປັນສ່ວນຕົວຫລາຍ ກວ່າທີ່ຈະຂຶ້ນກັບພໍ່ແມ່ຜູ້ປົກຄອງ ຊາຍໜຸ່ມ ຍົງໜຸ່ມຈໍານວນໜຶ່ງ ກໍເດີນຕາມ ຮ່ອງຮອຍຂອງສັງຄົມທີ່ແຕກຕ່າງທາງດ້ານວັດທະນະທໍາ ແລະ ຮີດຄອງປະເພນີ. ເມື່ອກ່ອນບໍ່ມີທີ່ແມ່ຍິງຕ້ອງເຂົ້າ ຫ້ອງນອນຂອງຜູ້ຊາຍ ແລະ ຜູ້ຊາຍກໍ່ບໍ່ອາດຈະລ່ວງລໍ້າເຂົ້າໃນຫ້ອງນອນຂອງແມ່ຍິງ ເພາະກົດຂອງຮີດຄອງຖືວ່າເປັນ ເລື່ອງທີ່ບໍ່ຈົບບໍ່ງາມ, ຍິ່ງໄປກວ່ານັ້ນ ການທີ່ຍົງຊາຍຈະນອນຮ່ວມຫ້ອງດຽວກັນກໍ່ຍົງເປັນໄປບໍ່ໄດ້.

ມາໃນຍຸກຍິງສາວ ບ່າວແພວຈໍານວນໜຶ່ງຖືການຢູ່ຮ່ວມກັນ ຢູ່ຫ້ອງນອນດຽວກັນ ແລະ ນອນຮ່ວມກັນ ມັນແມ່ນສົດທີ່ບໍ່ມີໃຜຈະສູງມາດຫ້າມປາມເຂົ້າເຈົ້າໄດ້, ມີບາງຄູ່ກໍຢູ່ກັນແບບຄູ່ຜົວຕົວເມຍ ເພາະເຂົາເຈົ້າຖືວ່ານັ້ນແມ່ນສິດທິສ່ວນບຸກຄົນ ແຕ່ເລື່ອງເຫລົ່ານັ້ນກັບກາຍເປັນການສ້າງບັນຫາ ຄືການຖືພາຄາທ້ອງ ທີ່ທັງສອງຄົນຍັງບໍ່ທັນພ້ອມທີ່ຈະໃຫ້ມີພະຍານຮັກ ກໍຄື ລູກ ໃນເມື່ອບໍ່ມີຄວາມພ້ອມ ກໍຕ້ອງທໍາການຫລຸລູກອອກດ້ວຍວິທີການຕ່າງໆ ເຊັ່ນ: ອາດຈະກິນຢາ, ອາດຈະໄປໃຫ້ຄລີນິກເອົາອອກໃຫ້ ຫລື ໃຫ້ຜູ້ອື່ນຊ່ວຍເອົາອອກໃຫ້ ເຊິ່ງເປັນການກະທໍາຜິດຕາມທີ່ປະມວນກົດໝາຍອາຍາໄດ້ກໍານົດ ໄວ້ຄື: ບຸກຄົນໃດ ຫາກໄດ້ທໍາການຫລຸລູກໃຫ້ຜູ້ອື່ນຢ່າງຜິດກົດໝາຍ ຈະຖືກລົງໂທດຕັດອິດສະລະພາບແຕ່ 1 ປີ ຫາ 3 ປີ ແລະ ຈະຖືກປັບໃຫມແຕ່ 5.000.000 ກີບ ຫາ 15.000.000 ກີບ, ໃນກໍລະນີທີ່ຜູ້ກະທໍາຜິດ ຫາກໄດ້ທໍາການຫລຸລູກໃຫ້ຜູ້ອື່ນເປັນອາຈົນ ຫລື ໃນກໍລະນີທີ່ການຫລຸລູກໂດຍບໍ່ຖືກຕ້ອງຕາມກົດໝາຍນັ້ນ ຫາກເຮັດໃຫ້ສຸຂະພາບຂອງແມ່ຊຸດໂຊມ ຫລື ເຮັດໃຫ້ແມ່ເສຍຊີວິດ ຈະຖືກລົງໂທດຕັດອິດສະຫລະພາບ ແຕ່ 5 ປີ ຫາ 7 ປີ ແລະ ຈະຖືກປັບໃຫມແຕ່ 7 ລ້ານກີບ ຫາ 20.000.000 ກີບ, ຜູ້ຍິງໃດ ຫາກໄດ້ທໍາການຫລຸລູກດ້ວຍຕົນເອງ ຫລືໃຊ້ຜູ້ອື່ນເຮັດໃຫ້ ໂດຍບໍ່ຖືກຕ້ອງຕາມກົດໝາຍ ຈະຖືກລົງໂທດຕັດ ອົດສະຫລະພາບແຕ່ 3 ເດືອນ ຫາ 1 ປີ ແລະ ຈະຖືກປັບໃໝແຕ່ 3 ລ້ານກີບ ຫາ 10.000.000 ກີບ ຄວາມພະຍາຍາມ ກໍ່ການກະທໍາຜິດກໍຈະຖືກລົງໂທດ.

ໂດຍ: (ໄມ້ງັດ Vientiane Mai)