ນາໆປະເທດເລີ່ມລະງັບນຳເຂົ້າຊີ້ນແຊ່ແຂງຈາກບຣາຊິນ

    ສຳນັກຂ່າວຕ່າງປະເທດ ລາຍງານຈາກນະຄອນຫລວງບຣາຊິລີ ປະເທດບຣາຊິນ ໃນວັນ ທີ 20 ມີນານີ້ວ່າ: ກະ ຊວງກະສິກຳຂອງບຣາຊິນອອກຖະແຫລງການໃນວັນທີ 20 ມີນານີ້ວ່າ: ຢູ່ລະຫວ່າງຕິດຕໍ່ປະສານງານໄປຫາໜ່ວຍ ງານທີ່ກ່ຽວຂ້ອງຂອງລັດຖະບານປັກກິ່ງ, ພາຍຫລັງມີລາຍງານວ່າຈີນສັ່ງລະງັບການນຳເຂົ້າຊີ້ນສັດແຊ່ແຂງຈາກ ບຣາຊິນແບບບໍ່ມີກຳນົດ. ທັງນີ້ ຈີນຖືເປັນຕະຫລາດສົ່ງອອກຊີ້ນສັດແຊ່ແຂງຂະໜາດໃຫຍ່ທີ່ສຸດຂອງບຣາຊິນ ໂດຍຄິດເປັນອັດຕາສ່ວນສູງເຖິງ 1 ໃນ 3 ຂອງມູນຄ່າການສົ່ງອອກສິນຄ້າອາຫານປະເພດດັ່ງກ່າວຂອງບຣາຊິນ ເຊິ່ງສູງເຖິງ 13.900 ລ້ານໂດລາສະຫະລັດ ໃນປີຜ່ານມາ.

ໃນເວລາດຽວກັນ, ຄະນະກຳມາທິການເອີຣົບ (EC) ເຊິ່ງເປັນຝ່າຍບໍລິຫານຂອງສະຫະພາບເອີຣົບ (EU) ອອກ ຖະແຫລງການລະງັບການນຳເຂົ້າຊີ້ນສັດແຊ່ແຂງຈາກບໍລິສັດຢູ່ບຣາຊິນທີ່ພົວພັນເລື່ອງການລັກລອບສົ່ງອອກສິນຄ້າບູດເໜົ່າ ເຊິ່ງລວມທັງບໍລິສັດ ບີອາເອຟ ເອສເອ ຜູ້ສົ່ງອອກຊີ້ນໄກ່ແຊ່ແຂງລາຍໃຫຍ່ທີ່ສຸດຂອງໂລກ ແລະ ເຈບີເອສ ເອສເອ ເຊິ່ງເປັນບໍລິສັດຜະລິດຊີ້ນງົວແຊ່ແຂງລາຍໃຫຍ່ທີ່ສຸດຂອງໂລກ, ຖັດມາແມ່ນ ສ.ເກົາຫລີ ເຊິ່ງປະກາດລະງັບ ການສັ່ງຊື້ຊີ້ນໄກ່ແຊ່ແຂງຈາກບໍລິສັດ ບີອາເອຟຊົ່ວຄາວ ໂດຍປັດຈຸບັນຫລາຍກວ່າ 80% ຂອງຊີ້ນໄກ່ແຊ່ແຂງທີ່ ສ.ເກົາຫລີ ສັ່ງຊື້ຈາກຕ່າງປະເທດໃນແຕ່ລະປີມາຈາກບຣາຊິນ.

ເຖິງຢ່າງໃດກໍຕາມ, ການທີ່ລັດຖະບານຊີເລສັ່ງລະງັບນຳເຂົ້າຊີ້ນສັດແຊ່ແຂງຈາກບຣາຊິນເຊັ່ນກັນ ສ້າງຄວາມບໍ່ພໍໃຈໃຫ້ແກ່ລັດຖະບານບຣາຊິນຫລາຍທີ່ສຸດ ໂດຍທ່ານ ໄບຣໄຣ ມັກກີ ຮອງລັດຖະມົນຕີກະຊວງກະສິກຳຂອງບຣາຊິນ ວິຈານວ່າເປັນການປົກປ້ອງທາງການຄ້າ.

ປະທານາທິບໍດີ ມິເຊວ ເຕເມ ພະຍາຍາມຫລຸດຜ່ອນຄວາມກັງວົນຂອງທຸກຝ່າຍທີ່ກ່ຽວຂ້ອງ ໂດຍຢືນຢັນວ່າສະຖານະການທີ່ເກີດຂຶ້ນສົ່ງຜົນກະທົບຕໍ່ວຽກງານການຜະລິດພຽງ 21 ແຫ່ງຈາກທັງໝົດຫລາຍກວ່າ 4.800 ແຫ່ງຢູ່ບຣາຊິນ. ຂະນະທີ່ຕຳຫລວດໄດ້ຈັບກຸມຜູ້ຖືກສົງໄສຢ່າງໜ້ອຍ 38 ຄົນ ແລະ ກະຊວງກະສິກຳໄດ້ສັ່ງໄລ່ອອກພະນັກງານຫລາຍກວ່າ 30 ຄົນ ຂໍ້ຫາກ່ຽວຂ້ອງກັບການຮັບສິນບົນທີ່ສົ່ງຜົນກະທົບຕໍ່ການກວດສອບມາດຕະຖານຄວາມສະອາດຂອງຊີ້ນສັດແຊ່ແຂງ.