ເຈົ້າໜ້າທີ່ກັກຕົວ ແຮງງານລາວ ລັກລອບຂ້າມຂອງມາຈາກຝັ່ງໄທ ຜ່ານເມືອງສັງທອງ

ອີງຕາມການລາຍງານຂອງໜັງສືພີມ ວຽງຈັນທາຍ ໃຫ້ຮູ້ວ່າ: ວັນທີ 6 ມັງກອນ 2021 ທີ່ຜ່ານມາ  ເຈົ້າໜ້າທີ່ເມືອງສັງທອງ ນະຄອນຫລວງວຽງຈັນ ໄດ້ກວດພົບແຮງງານລາວຈຳນວນ 13 ຄົນ (ຍິງ 8 ຄົນ) ທີ່ໄປເຮັດວຽກຢູ່ປະເທດໄທ ໄດ້ລັກລອບຂ້າມແມ່ນ້ຳຂອງເຂົ້າມາເມືອງສັງທອງ ແລະ ໄດ້ນຳຕົວທັງໝົດໄປກັກຕົວຢູ່ສູນກັກກັນຫຼັກ 27 ເປັນທີ່ຮຽບຮ້ອຍແລ້ວ.

ທ່ານ ພັທ ສີວິໄລ ຫົວໜ້າກອງບັນຊາການ ປກສເມືອງສັງທອງໄດ້ກ່າວຕື່ມວ່າ: ເມືອງສັງທອງອາດຈະເປັນເມືອງທີ່ອາດຈະມີການລັກລອບເຂົ້າມາປະເທດລາວ ຍ້ອນມີແມ່ນ້ຳຂອງທີ່ແຄບ ໂດຍສະເພາະໃນລະດູແລ້ງຢູ່ບາງບ່ອນແມ່ນສາມາດຍ່າງຂ້າມໄດ້ເລີຍ. ສະເພາະເມືອງສັງທອງມີ 13 ບ້ານທີ່ຕັ້ງຢູ່ລຽບຝັ່ງແມ່ນໍ້າຂອງອັນເປັນຊາຍແດນລາວ-ໄທ ເຖິງຢ່າງໃດກໍຕາມ ຄະນະສະເພາະກິດເມືອງໝັ້ນໃຈວ່າ ການລັກລອບຂ້າມມາຈະບໍ່ສາມາດລອດສາຍຕາໄປໄດ້ ເນື່ອງຈາກມີການຈັດເວນຍາມເຂັ້ມງວດຕະຫລອດ 24 ຊົ່ວໂມງ.