ອີລອນ ມັສ ຂຶ້ນເປັນ ບຸກຄົນລວຍທີ່ສຸດໃນໂລກ
ອີລອນ ມັສ ຢູ່ຕຳແໜ່ງລວຍທີ່ສຸດໃນໂລກ ມີຊັບສິນຫລາຍກວ່າ 185.000 ລ້ານໂດລາ ແຊງ ເຈບ ເບໂຊສ ທີ່ມີມູນຄ່າຊັບສິນ 184.000 ລ້ານໂດລາ.
ເວັບໄຊ CNBC ລາຍງານວ່າ: ອີລອນ ມັສ ຜູ້ສ້າງຕັ້ງບໍລິສັດເທສລາ (Tesla) ຜູ້ຜະລິດ ແລະ ຈຳໜ່າຍລົດຍົນໄຟຟ້າ ແລະ ສະເປສເອັກ (SpaceX) ມີຊັບສິນຫລາຍກວ່າ ເຈບ ເບໂຊສ ຜູ້ສ້າງຕັ້ງອາເມຊອນ ບໍລິສັດຂາຍຍ່ອຍຊັ້ນນຳສັນຊາດອາເມລິກາ ເຮັດໃຫ້ເປັນບຸກຄົນຮັ່ງມີທີ່ສຸດໃນໂລກ.
ລາຍງານຂ່າວລະບຸວ່າ: ອີລອນ ມັສ ມີມູນຄ່າຊັບສິນ ໄລ່ຮອດວັນທີ 7 ມັງກອນ ມູນຄ່າຫລາຍກວ່າ 185.000 ລ້ານໂດລາ. ຂະນະທີ່ ເຈບ ເບໂຊສ ມີມູນຄ່າຊັບສິນ 184.000 ລ້ານໂດລາ.
CNBC ລະບຸວ່າ: ອີລອນ ມັສ ຮັ່ງມີໃນເວລາທີ່ໄວ ຫລັງຈາກຕົ້ນປີຜ່ານມາ ອີລອນ ມັສ ຫາກໍຕິດກຸ່ມບຸກຄົນຮັ່ງມີທີ່ສຸດ 50 ອັນດັບທຳອິດ ດ້ວຍມູນຄ່າຊັບສິນ 27.000 ລ້ານໂດລາ ກ່ອນຈະເລື່ອນຂຶ້ນມາຢູ່ອັນດັບ 7 ໃນເດືອນກໍລະກົດ ແລະ ອັນດັບສອງໃນເດືອນພະຈິກ.
ເຫດຜົນທີ່ເຮັດໃຫ້ ອີລອນ ມັສ ມີມູນຄ່າຊັບສິນເພີ່ມຂຶ້ນໃນເວລາທີ່ໄວ ຄືລາຄາຫຸ້ນຂອງບໍລິສັດເທສລາ ເພີ່ມຂຶ້ນ 9 ເທົ່າ ຫລື 900% ຈາກປີຜ່ານມາ ເຊິ່ງ ອີລອນ ມັສ ຖືຫຸ້ນໃນເທສລາ 20%.
