ກອງປະຊຸມລັດຖະບານທ້າຍສະໄຫມ ພິຈາລະນາຫລາຍບັນຫາສຳຄັນ
ກອງປະຊຸມລັດຖະບານ ຊຸດທີ VIII ເປີດກວ້າງທ້າຍສະໄໝ ໄດ້ຈັດຂຶ້ນ ໃນ ວັນທີ 7-8 ມັງກອນນີ້ ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ, ໂດຍການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ພ້ອມດ້ວຍຄະນະລັດຖະບານ ເຂົ້າຮ່ວມ.
ກອງປະຊຸມ, ໄດ້ພ້ອມກັນຄົ້ນຄວ້າ, ພິຈາລະນາ ຫລາຍບັນຫາສຳຄັນ ຂອງການຈັດຕັ້ງປະຕິບັດວຽກງານຂອງລັດຖະບານ ຊຸດທີ VIII (2016-2020), ສະຫລຸບແຜນພັດ ທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIII (2016-2020) ແລະ ຜ່ານຮ່າງເບື້ອງຕົ້ນ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX (2021-2025), ຄວາມຄືບໜ້າການປັບປຸງກົນໄກການອຳນວຍຄວາມສະດວກ ແລະ ບັນດາຕົວຊີ້ວັດຕ່າງໆ ໃນການດຳເນີນທຸລະກິດຢູ່ ສປປ ລາວ ແລະ ການຈັດຕັ້ງປະຕິບັດຄຳສັ່ງວ່າດ້ວຍ ການປັບປຸງວຽກງານບໍລິການ ການອອກໃບອະ ນຸຍາດລົງທຶນ ແລະ ການອອກໃບອະນຸຍາດດຳເນີນທຸລະກິດ, ຮ່າງແຜນຍຸດທະສາດ ການສົ່ງເສີມຜະ ລິດເປັນສິນຄ້າ ຕິດພັນກັບກົນໄກການເຂົ້າເຖິງຕະຫລາດ ຈໍາໜ່າຍສິນຄ້າ ແລະ ການຄ້າຊາຍແດນ.
ພ້ອມໄດ້ພ້ອມກັນຄົ້ນຄວ້າ, ປະກອບຄຳເຫັນ ຕໍ່ການຈັດຕັ້ງປະຕິບັດຍຸທະສາດຫັນຊັບສິນ ຂອງລັດເປັນທຶນ, ຜົນການຈັດຕັ້ງປະຕິບັດຄໍາສັ່ງ 15/ນຍ ແລະ ການກະ ກຽມ ໃຫ້ແກ່ການຫລຸດພົ້ນອອກຈາກສະຖານະພາບປະເທດດ້ອຍພັດທະນາ (LDCs), ຜົນການແກ້ໄຂບັນຫາຄົນຕ່າງປະເທດ ທີ່ເຄື່ອນໄຫວບໍ່ຖືກຕ້ອງຕາມກົດໝາຍຂອງ ສປປ ລາວ, ການແກ້ໄຂຜົນກະທົບ ແລະ ມາດຕະການເພື່ອຫລຸດ ຜ່ອນຜົນກະທົບຈາກການລະບາດຂອງພະຍາດ COVID-19 ຕໍ່ເສດຖະກິດຂອງລາວ, ພ້ອມທັງຜັນຂະຫຍາຍຜົນ ກອງປະຊຸມຄະນະກຳມະການຮ່ວມມືທະວີພາຄີ ລະຫວ່າງ ລັດຖະບານ ລາວ ແລະ ສສ ຫວຽດນາມ ຄັ້ງທີ 43 ປະຈຳປີ 2020. ຫລັງຈາກນັ້ນ, ບັນດາຄະນະລັດຖະບານ, ເຈົ້າແຂວງ, ຮອງເຈົ້າແຂວງ ພ້ອມດ້ວຍພາກສ່ວນກ່ຽວຂ້ອງຕ່າງໄດ້ພ້ອມກັນ ປະ ກອບຄຳຄິດຄຳເຫັນ ໃສ່ຫລາຍບັນຫາສຳຄັນອື່ນໆອີກ.
ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ເນັ້ນໃຫ້ຜູ້ເຂົ້າຮ່ວມກອງປະຊຸມ ຍົກສູງຄວາມຮັບ ຜິດຊອບ ໃນການລາຍງານໃຫ້ກະທັດຮັດ, ຊັດເຈນ ແລະ ມີຈຸດສຸມ, ໃຫ້ລົງເລິກບັນຫາທີ່ເປັນຂໍ້ຄົງຄ້າງ, ພ້ອມວິເຄາະ ວິໄຈ ສາເຫດ ແລະ ສະເໜີທິດທາງ, ມາດຕະການໃນການແກ້ໄຂໃນ 6 ເດືອນຕົ້ນປີ 2021ໃຫ້ມີຜົນສຳເລັດ.
