ດຳເນີນຂະດີ ລມຕ ອຸດສະຫະກຳ ແລະ ການຄ້າ ວູຮຸຍຮວ່າງ ພ້ອມພັກພວກ ໃນຂໍ້ຫາລ່ວງລະເມີດຂໍ້ກຳນົດການຄຸ້ມຄອງ, ນຳໃຊ້ ຊັບພະຍາກອນຂອງຊາດ, ສ້າງຄວາມເສຍຫາຍໃຫ້ແກ່ລັດ
ຕອນເຊົ້າຂອງວັນທີ 7 ມັງກອນນີ້, ສານປະຊາຊົນ ນະຄອນຫຼວງ ຮ່າໂນ້ຍ(ສສ ຫວຽດນາມ) ໄດ້ດຳເນີນຄະດີ ເປັນຄັ້ງທຳອິດກັບຜູ້ຕ້ອງຫາ ວູຮຸຍຮວ່າງ ອາຍຸ 67 ປີ, ອະດີດລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມກັບພວກອີກ 9 ຄົນ ໃນຄະດີພິດພາດທີ່ດິນ Sabeco.
ຈ່າສານ ລາຍງານວ່າ: ເຖິງແມ່ນວ່າ ສານຈະດຳເນີນການໄປຢ່າງຖືກຕ້ອງຕາມປະເພນີຂອງສານແລ້ວກໍຕາມ ແຕ່ຜູ້ຕ້ອງຫາຈຳນວນໜຶ່ງເຊັ່ນ: ຫງວຽນຮິວຕີ້ນ ອາຍຸ 63 ປີ, ອະດິດຮອງປະທານຄະນະກຳມະການປະຊາຊົນ ນະຄອນ ໂຮ່ຈິມິນ, ເລວັນແທັງ ອາຍຸ 58 ປີ, ອະດີດຮອງຫົວໜ້າຫ້ອງວ່າການ ນະຄອນ ໂຮ່ຈິມິນ ແລະ ຫງວຽນແທັງເຈືອງ ອາຍຸ 46 ປີ ອະດີດຫົວໜ້າຫ້ອງການເທດສະບານ ຂອງຄະນະກຳມະການປະຊາຊົນ ນະຄອນໂຮ່ຈິມິນ ບໍ່ໄດ້ມີໜ້າໃນສານ.
ນອກຈາກນີ້ ຜູ້ຕາງໜ້າ ບໍລິສັດ ເມລິງ , ຟານວັນຕັວດ ປະທານ ສະພາບໍລິຫານ, ຮັບຜິດຊອບຄຸ້ມຄອງເງິນທຶນຂອງລັດຖະບານ ແລະ ອີກຫຼາຍຄົນທີ່ກ່ຽວຂອງກໍບໍ່ໄດ້ມີໜ້າໃນສານ.
ຜູ້ຕ້ອງຫາ 2 ຄົນຄື ວູຮຸຍຮວ່າງ ແລະ ຟານຈີ້ຢຸງ ຖືກດຳເນີນຄະດີ ໃນຂໍ້ຫາລ່ວງລະເມີດຂໍ້ກຳນົດການຄຸ້ມຄອງ, ນຳໃຊ້ ຊັບພະຍາກອນຂອງຊາດ, ສ້າງຄວາມເສຍຫາຍໃຫ້ແກ່ລັດ, ຖືກຕັດສິນຈຳຄຸກແຕ່ 10-20 ປີ.
ຍັງອີກ 8 ຜູ້ຕ້ອງຫາ ລ້ວນແຕ່ແມ່ນພະນັກງານຂອງລັດ ຊຶ່ງລວມມີ:
- ຫງວຽນຮິວຕີ້ນ, 63 ປີ ຮອງປະທານຄະນະກຳມະການປະຊາຊົນ ນະຄອນ ໂຮ່ຈິມິນ.
- ເລິມຫງວຽນໂຄຍ, 65 ປີ ອະດີດຫົວໜ້າພະແນກແຜນການ ແລະ ການລົງທຶນ.
- ດາວແອັງກຽດ, 63 ປີ ອະດີດຫົວໜ້າພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມ.
- ເລວັນແທັງ, 58 ປີ ອະດີດຮອງຫົວໜ້າຫ້ອງວ່າການ ນະຄອນ ໂຮ່ຈິມິນ.
- ເລກວາງມິງ, 63 ປີ ອະດີດຫົວໜ້າຫ້ອງການ ພັດທະນາພື້ນຖານໂຄງລ່າງ ຂອງພະແນກແຜນການ ແລະ ການລົງທຶນ.
- ຫງວຽນແທັງເຈືອງ, 46 ປີ ອະດີດຫົວໜ້າຫ້ອງການ ເທດສະບານ ຂອງ ຫ້ອງວ່າການ ນະຄອນ ໂຮ່ຈິມິນ.
- ເຈືອງວັນອູດ, 50 ປີ ອະດີດຮອງຫົວໜ້າຫ້ອງການ ຄຸ້ມຄອງທີ່ດິນ ຂອງພະແນກຊັບພະຍາກອນທຳມະຊາດ ແລະ ສິ່ງແວດລ້ອມ.
- ຫງວຽນລານເຈົາ, 45 ປີ ອະດີດວິຊາການຂອງຫ້ອງການຄຸ້ມຄອງທີ່ດິນ ພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມ.
ທັງ 8 ຄົນດັ່ງກ່າວ ແມ່ນມີຄວາມຜິດໃນຂໍ້ຫາ ລ່ວງລະເມີດຂໍ້ກຳນົດກ່ຽວກັບການຄຸ້ມຄອງທີ່ດິນ.
ເມື່ອຜູ້ຕ້ອງຫາ ແລະ ຜູ້ທີ່ມີສ່ວນກ່ຽວຂ້ອງພົວພັນຂາດຫຼາຍຄືແນວນັ້ນ, ສານຈຶ່ງໄດ້ເລື່ອນການດຳເນີນຄະດີອອກໄປກ່ອນ ພ້ອມດຽວກັນນີ້ກໍໄດ້ຮຽກຮ້ອງໃຫ້ບັນດາອົງການຈັດຕັ້ງທີ່ກ່ຽວຂ້ອງ ແລະ ຜູ້ຕ້ອງຫາ ມີໜ້າໃຫ້ຄົບຖ້ວນ ໃນການພິຈາລະນາຄັ້ງໜ້າ.
