5 ສິ່ງທ້າທາຍທົດສອບກຳລັງລໍຖ້າ ໂຈໄບເດັນ

ນັກຂ່າວ Stephen Collinson ໄດ້ຂຽນບົດວິຈານລົງໃນ ຊີເອັນເອັນ ເມື່ອວັນທີ 4 ມັງກອນນັ້ນ ເຂົາຊີ້ໃຫ້ເຫັນວ່າ: ປະທານາທິບໍດີ ໂດນັລທຣຳ ຈະກັບຄືນໄປເປັນປະຊາຊົນຄົນທຳມະດາແລ້ວ, ແຕ່ສິ່ງທີ່ເຂົາປະໄວ້ໃຫ້ ໃນໄລຍະທີ່ເປັນປະທານາທິບໍດີນັ້ນ ຜູ້ສືບຕໍ່ເຊັ່ນ ໄບເດັນ ຕ້ອງປະເຊີນໜ້າກັບສິ່ງທ້າທາຍທົດສອບທີ່ໜັກໜ່ວງ ຊຶ່ງບໍ່ຕ່າງຫຍັງກັບປະທານາທິບໍດີສະຫະລັດ ນັບແຕ່ຊຸມປີ 1930 ເປັນຕົ້ນມາ.

ສິ່ງທ້າທາຍທົດສອບ ທີ່ໜັກໜ່ວງໃນປີ 2021 ທີ່ ໄບເດັນຈະປະເຊີນນັ້ນກໍຄື:

1. ການລະບາດຂອງພະຍາດໂຄວິດ-19: ນີ້ຄືບັນຫາທ້າທາຍທົດສອບທີ່ເປັນໜ້າຢ້ານກົວ, ຊຶ່ງສະຫະລັດຍັງມີການແຜ່ລະບາດ, ຜູ້ຕິດເຊື້ອ ແລະ ຜູ້ເສຍຊີວິດ ເປັນອັນດັບໜຶ່ງຂອງໂລກ, ຊຶ່ງປະທານາທິບໍດີ ໂດນັລທຣຳ ບໍ່ສາມາດແກ້ໄຂໄດ້.
2. ເສດຖະກິດ: ຫຼາຍລ້ານຄົນບໍ່ມີວຽກເຮັດງານທຳ, ການແຜ່ລະບາດຂອງພະຍາດໂຄວິດ-19 ອາດຈະພາເສດຖະກິດຂອງສະຫະລັດ ລົງສູ່ເຫວເລິກ. ໃນສະຖານະການແບບນີ້ ບໍ່ຮູ້ວ່າ ໄບເດັນ ຈະຂັບເຄື່ອນເສດຖະກິດຂອງປະເທດແນວໃດ.
3. ສານສູງ: ທ່ານ ໄບເດັນຕ້ອງລຳບາກຕໍ່ສູ້ກັບສານສູງເພື່ອໃຫ້ໄດ້ມາ ກົດໝາຍໃຊ້ງົບປະມານສະບັບໃໝ່ ເພາະ ຄົນໃນສານສູງລ້ວນແຕ່ແມ່ນຄົນຂອງ ທຣຳ ຈຶ່ງເປັນການຍາກທີ່ ໄບເດັນຈະເອົາຊະນະໄດ້.
4. ພັກເສລີປະຊາທິປະໄຕ: ໄບເດັນຈະຕ້ອງໄດ້ຕໍ່ສູ້ພາຍໃນພັກເອງ ໃນການຈັດຕັ້ງ ແລະ ໂຄງປະກອບສ້າງຂອງລັດຖະບານຊຸດໃໝ່ ໃຫ້ມີຄວາມສະເໝີພາບ ແລະ ຍຸຕິທຳ ລະຫວ່າງ ເຊື້ອຊາດ ຊົນເຜົ່າໃນລັດຖະບານຊຸດໃໝ່ ໃຫ້ໄດ້ໃຈຄົນຜິວສີ ຖ້າບໍ່ດັ່ງນັ້ນກໍຈະເກີດຄວາມວຸ່ນວາຍພາຍໃນພັກ.
5. ໂລກລໍຄອຍ: ໂລກກຳລັງຈ້ອງມອງເບິ່ງວ່າ ໄບເດັນຈະສ້າງບັນຍາກາດຂອງໂລກແນວໃດ, ໂດຍສະເພາະ ແມ່ນ ຢາກກັບຄືນສູ່ຂໍ້ຕົກລົງ ປາຣີ ກ່ຽວກັບດິນຟ້າອາກາດ, ຂໍ້ຕົກລົງ ນິວເຄລຍ ອີຣານ ປີ 2015, ກັບຄືນມາເປັນສະມາຊິກຂອງອົງການອະນາໄມໂລກຄືນໃໝ່… ນອກຈາກນີ້ ໄບເດັນ ຍັງຈະປະເຊີນໜ້າກັບບັນດາປະເທດມະຫາອຳນາດອື່ນໆ ໃນໂລກຕື່ມອີກ.