ເປັນຫຍັງ ! ຄົນ ສ.ເກົາຫລີ ຈຶ່ງນິຍົມເຮັດສັນຍະກຳເພີ່ມຄວາມງາມ ?
ຖ້າເວົ້າເຖິງປະເທດທີ່ເປັນຈຸດສູນກາງສຳຄັນດ້ານຄວາມສວຍຄວາມງາມ ໂດຍສະເພາະການສັນຍະກຳໃບໜ້າແລ້ວ ທຸກໆຄົນຈະຕ້ອງຄິດເຖິງຊື່ຂອງປະເທດ ສ.ເກົາຫລີ ຢ່າງແນ່ນອນ.
ສຳລັບບົດຄວາມນີ້ ພວກເຮົາຈະມາໄຂຄຳຕອບກັນວ່າ: ເພາະເຫດໃດ ປະຊາກອນຂອງເກົາຫລີຈຶ່ງນິຍົມຈະເຮັດສັນຍະກຳ ຈົນກາຍເປັນຈຸດສູນກາງສຳຄັນຂອງວົງການນີ້.
ໂດຍກ່ອນອື່ນ ພວກເຮົາຈະຕ້ອງຮູ້ຈັກວິຖີຊີວິດ ແລະ ຄ່ານິຍົມຂອງຊາວເກົາຫລີໃນອະດີດກັນກ່ອນ. ໃນສະໄໝກ່ອນ ສັງຄົມຂອງຊາວເກົາຫລີເປັນສັງຄົມທີ່ໃຫ້ຄວາມສຳຄັນກ່ຽວກັບຮູບລັກສະນະ ແລະ ຮູບຮ່າງໜ້າຕາພາຍນອກຂອງຄົນ ເນື່ອງຈາກແນວຄິດທີ່ໄດ້ຮັບການປູກຝັງມາເປັນເວລາດົນນານ.
ຊາວເກົາຫລີລ້ວນຖືກຜູກຕິດໄວ້ກັບລຳດັບຊົນຊັ້ນ ແລະ ສະຖານະທາງສັງຄົມຂອງຕົນ, ໃນອະດີດຊາວເກົາຫລີຈະໃຊ້ລັກສະນະທາງພາຍນອກເຊັ່ນ: ຊົງຜົມ, ປິ່ນປັກຜົມ ລວມທັງເສື້ອຜ້າເຄື່ອງແຕ່ງກາຍ ໃນການແບ່ງແຍກສະຖານະຂອງຄົນໃນສັງຄົມ.
ດັ່ງນັ້ນ, ສະພາບສັງຄົມຂອງ ສ.ເກົາຫລີ ໃນປັດຈຸບັນ ຈຶ່ງຂ້ອນຂ້າງຈະໃຫ້ຄວາມສຳຄັນຕໍ່ຮູບຮ່າງ, ໜ້າຕາ ແລະ ຮູບລັກສະນະທາງພາຍນອກເປັນສ່ວນຫລາຍ.
ຖ້າທ່ານເຄີຍເດີນທາງໄປທ່ອງທ່ຽວຢູ່ ສ.ເກົາຫລີ ແລ້ວລອງຍ່າງໄປບໍລິເວນສະຖານີລົດໄຟໃຕ້ດິນ, ທ່ານຈະພົບກັບແວ່ນໃຫຍ່ໆ ຫລື ແວ່ນນ້ອຍໆ ທີ່ຕິດຕັ້ງໄວ້ເປັນຈຳນວນຫລາຍ.
ແວ່ນເຫລົ່ານັ້ນຕິດຕັ້ງໄວ້ ເພື່ອໃຫ້ຄົນທີ່ສັນຈອນໄປມານັ້ນ ໄດ້ສຳຫລວດເສື້ອຜ້າໜ້າຜົມຂອງຕົນເອງ ເຊິ່ງສິ່ງນີ້ເອງທີ່ເຮັດໃຫ້ພວກເຮົາຮູ້ວ່າ ຊາວ ສ.ເກົາຫລີ ໃສ່ໃຈຕໍ່ຮູບຮ່າງພາຍນອກຂອງຕົນເອງຫລາຍໜ້ອຍຊໍ່າໃດ.
ດ້ວຍເຫດນີ້ຈຶ່ງເຮັດໃຫ້ອຸດສາຫະກຳທາງດ້ານຄວາມສວຍຄວາມງາມ ແລະ ການສັນຍະກຳ ໄດ້ຮັບຄວາມນິຍົມຈາກປະຊາກອນຂອງ ສ.ເກົາຫລີ ຈຳນວນຫລາຍ ໂດຍສະເພາະຕໍ່ປະຊາກອນໃນໄວໜຸ່ມສາວ ທີ່ພວກເຂົາມັກຈະເຮັດສັນຍະກຳຈົນເປັນເລື່ອງປົກກະຕິ.
ໃນການເຂົ້າເຮັດວຽກຢູ່ບໍລິສັດຕ່າງໆຂອງ ສ.ເກົາຫລີ ນອກຈາກຈະຕ້ອງພິຈາລະນາຈາກປະຫວັດການສຶກສາ, ປະສົບການໃນການເຮັດວຽກ, ອາຍຸ ລວມທັງເພດແລ້ວ ຮູບຮ່າງໜ້າຕາກໍເປັນອີກໜຶ່ງປັດໄຈສຳຄັນທີ່ບໍລິສັດຕ່າງໆຢູ່ ສ.ເກົາຫລີ ຈະໃຊ້ເປັນມາດຕະຖານໃນການຕັດສິນໃຈຮັບ ຫລື ບໍ່ຮັບບຸກຄົນນັ້ນເຂົ້າມາເຮັດວຽກ.
ແລະ ຮູບຮ່າງໜ້າຕາພາຍນອກ ຍັງເປັນສິ່ງທີ່ສາມາດເລື່ອນສະຖານະທາງສັງຄົມ ແລະ ສ້າງຊື່ສຽງໃຫ້ຕົນເອງ ລວມທັງຄອບຄົວໄດ້ນຳອີກ.
ຈາກປັດໄຈຕ່າງໆທີ່ກ່າວມາທັງໝົດນີ້ ຈຶ່ງເປັນສາເຫດສຳຄັນທີ່ເຮັດໃຫ້ ສ.ເກົາຫລີ ກາຍເປັນປະເທດທີ່ມີການສັນຍະກຳເພີ່ມຄວາມສວຍຄວາມງາມ ເປັນອັນດັບ 1 ຂອງທະວີບອາຊີ ແລະ ເປັນອັນດັບຕົ້ນໆຂອງໂລກ.
