ລະວັງ ! ນັບແຕ່ມື້ສ້າງທາງດ່ວນວຽງຈັນ-ວັງວຽງ ໄດ້ມີອຸປະຕິເຫດເກີດຂຶ້ນ 30 ຄັ້ງ ເຮັດໃຫ້ມີຜູ້ເສຍຊີວິດ 16 ຄົນ

ລະວັງ ! ນັບແຕ່ມື້ສ້າງທາງດ່ວນ ນະຄອນຫລວງວຽງຈັນ-ວັງວຽງ (ວັນທີ 4 ເມສາ 2018 ຫາວັນທີ 23 ທັນວາ 2020) ມີອຸປະຕິເຫດເກີດຂຶ້ນທັງໝົດ 30 ຄັ້ງ ເຮັດໃຫ້ມີຜູ້ເສຍຊີວິດ 16 ຄົນ ແລະ ສ້າງຜົນເສຍຫາຍເປັນຈຳນວນຫລາຍ, ພາຫະນະເປ່ເພເສຍຫາຍ 60 ຄັນ, ນີ້ແມ່ານຄຳລາຍງານຂອງ ຫົວໜ້າກົມຕຳຫລວດຈະລາຈອນ, ໃນນັ້ນ ສະເພາະຢູ່ເຂດເມືອງນາຊາຍທອງ ນະຄອນຫລວງວຽງຈັນ ມີອຸປະຕິເຫດເກີດຂຶ້ນ 11 ຄັ້ງ ແລະ ມີຜູ້ເສຍຊີວິດ 6 ຄົນ, ສ່ວນ ຢູ່ແຂວງວຽງຈັນຄື: ເຂດເມືອງໂພນໂຮງ ມີອຸປະຕິເຫດເກີດຂຶ້ນ 13 ຄັ້ງ ແລະ ມີຜູ້ເສຍຊີວິດ 8 ຄົນ, ເຂດເມືອງຫີນເຫີບ ເກີດຂຶ້ນ 3 ຄັ້ງ ແລະ ມີຜູ້ເສຍຊີວິດ 1 ຄົນ, ຢູ່ເມືອງວັງວຽງ ເກີດຂຶ້ນ 3 ຄັ້ງ ແລະ ມີຜູ້ເສຍຊີວິດ 1 ຄົນ ແລະ ພຽງສາມມື້ເປີດເສັ້ນທາງດ່ວນດັ່ງກ່າວຄື (ວັນທີ 20-23 ທັນວາ 2020) ມີອຸປະຕິເຫດເກີດຂຶ້ນແລ້ວ 4 ຄັ້ງ.

ຫົວໜ້າກົມຕໍາຫລວດຈະລາຈອນ ໃຫ້ຮູ້ຕື່ມວ່າ: ສາເຫດຫລັກທີ່ພາໃຫ້ເກີດອຸປະຕິເຫດຢູ່ເສັ້ນທາງດັ່ງກ່າວ ແມ່ນໃນຕົວຂອງຜູ້ຂັບຂີ່ເອງທີ່ບໍ່ປະຕິບັດ ແລະ ເຄົາລົບກົດລະບຽບຈະລາຈອນ,ຂັບຂີ່ເກີນຄວາມໄວກຳນົດໄວ້, ຜູ້ຂັບຂີ່ຍັງບໍ່ທັນຮັບຮູ້ ແລະ ເຂົ້າໃຈກ່ຽວກັບຊ່ອງທາງຈະລາຈອນ ແລະ ເກີດຈາກສະພາບແວດລ້ອມ, ທີ່ມີສັດລ້ຽງເລັດລອດເຂົ້າໃນເສັ້ນທາງ.

ຕໍ່ສະພາບດັ່ງກ່າວ, ເຈົ້າໜ້າທີ່ຕຳຫລວດຈະລາຈອນທີ່ປະຈຳຢູ່ເສັ້ນທາງດ່ວນຈະໄດ້ອອກແຮງເຄື່ອນໄຫວເຮັດໜ້າທີ່ກວດກາສາລະເວຢູ່ຕາມທາງດ່ວນ ເມື່ອພົບເຫັນຜູ້ຂັບຂີ່ລະເມີດກົດລະບຽບຈະລາຈອນກໍຈະສັນຍານໃຫ້ ຢຸດຈອດລົດເພື່ອດຳເນີນການສຶກສາອົບຮົມກ່າວເຕືອນ, ຖ້າຜູ້ຂັບຂີ່ຍັງຝ່າຝືນກໍຈະໃຊ້ມາດຕະການປັບໄໝຕາມລະບຽບການ.