ປີ 2020 ສ.ເກົາຫລີ ມີປະຊາກອນເກີດໃໝ່ໜ້ອຍກວ່າປະຊາກອນທີ່ເສຍຊີວິດ ເປັນຄັ້ງທຳອິດ ທ່າມກາງມາດຕະການລັດ “ແຈກເງິນ” ກະຕຸ້ນໃຫ້ຄົນມີລູກ
ຖືເປັນສັນຍານເຕືອນທີ່ສຳຄັນຂອງ ສ.ເກົາຫລີ ເຊິ່ງເປັນປະເທດທີ່ມີອັດຕາການເກີດຂອງປະຊາກອນຕໍ່າສຸດໃນໂລກ ເມື່ອຈຳນວນປະຊາກອນທີ່ເສຍຊີວິດຢູ່ ສ.ເກົາຫລີ ໃນໄລຍະປີ 2020 ຜ່ານມາ ມີຈຳນວນສູງກວ່າຈຳນວນປະຊາກອນທີ່ເກີດໃໝ່ເປັນຄັ້ງທຳອິດ ໂດຍປີຜ່ານມາມີເດັກນ້ອຍເກີດໃໝ່ພຽງ 275.800 ຄົນ, ແຕ່ມີປະຊາກອນເສຍຊີວິດ 307.764 ຄົນ. ນອກຈາກນີ້ ຈຳນວນເດັກເກີດໃໝ່ດັ່ງກ່າວຍັງຕໍ່າກວ່າຈຳນວນເດັກເກີດໃໝ່ໃນປີ 2019 ເຖິງ 10%.
ໜັງສືພິມ South China Morning Post ຂອງຮົງກົງລາຍງານຂໍ້ມູນຈາກທາງການເກົາຫລີ ລະບຸວ່າ: ນັບແຕ່ປີ 2015-2019 ມີຄູ່ຮັກທີ່ແຕ່ງດອງໃໝ່ເປັນຄັ້ງທຳອິດເກືອບ 1 ລ້ານຄູ່ ແລະ ກວ່າ 40% ຂອງຄູ່ຮັກເຫລົ່ານີ້ບໍ່ມີລູກ.
ການປ່ຽນແປງຈຳນວນປະຊາກອນໃນລັກສະນະນີ້ ສ້າງຄວາມເຄັ່ງຕຶງໃນປະເທດ ໂດຍນອກຈາກແຮງກົດດັນດ້ານງົບປະມານທີ່ເພີ່ມຂຶ້ນຈາກຄວາມຕ້ອງການລະບົບບໍລິການສຸຂະພາບ ແລະ ເງິນບຳນານທີ່ສູງຂຶ້ນແລ້ວ, ຈຳນວນປະຊາກອນໄວໜຸ່ມສາວທີ່ຫລຸດລົງຍັງນຳໄປສູ່ການຂາດເຂີນແຮງງານ ເຊິ່ງເປັນຜົນກະທົບໂດຍກົງຕໍ່ເສດຖະກິດ.
ໃນເດືອນຜ່ານມາ, ປະທານາທິບໍດີ ມຸນແຈອິນ ໄດ້ເປີດຫລາຍນະໂຍບາຍເພື່ອແກ້ໄຂອັດຕາການເກີດທີ່ຕໍ່າ ເຊິ່ງລວມທັງການໃຫ້ເງິນເປັນແຮງຈູງໃຈແກ່ຄອບຄົວ ໂດຍນັບແຕ່ປີ 2022 ເດັກທຸກຄົນທີ່ເກີດມາຈະໄດ້ເງິນໂບນັດ 2 ລ້ານວອນ ເພື່ອຊ່ວຍເຫລືອຄ່າໃຊ້ຈ່າຍກ່ອນເກີດ. ນອກຈາກນີ້ ຍັງມີເງິນແຕ່ລະເດືອນທີ່ຈ່າຍໃຫ້ອີກ ເດືອນລະ 3 ແສນວອນ ຈົນກວ່າເດັກຈະອາຍຸຄົບ 1 ປີ ແລະ ເງິນແຕ່ລະເດືອນນີ້ຈະເພີ່ມເປັນ 5 ແສນວອນ ໃນປີ 2025.
ສຳນັກຂ່າວ BBC ລາຍງານວ່າ: ໂດຍສ່ວນຫລາຍແລ້ວ ຜູ້ຍິງຢູ່ ສ.ເກົາຫລີ ຕ້ອງສູ້ຊົນໃຫ້ເກີດຄວາມສົມດູນລະຫວ່າງການເຮັດວຽກ ແລະ ຄວາມຕ້ອງການອື່ນໃນຊີວິດ. ນອກຈາກນີ້ ລາຄາອະສັງຫາລິມະຊັບທີ່ເພີ່ມສູງຍັງເປັນອີກປັດໄຈສຳຄັນທີ່ບໍ່ສົ່ງເສີມໃຫ້ຄູ່ຮັກມີລູກ.
South China Morning Post ຍັງລາຍງານຜົນການສຳຫລວດເມື່ອປີ 2019 ຂອງສະຖາບັນສຸຂະພາບ ແລະ ສັງຄົມແຫ່ງ ສ.ເກົາຫລີ ທີ່ມີການສຳຫລວດບຸກຄົນອາຍຸລະຫວ່າງ 19-49 ປີ ເຊິ່ງພົບວ່າໃນບັນດາຜູ້ຕອບແບບສອບຖາມທີ່ແຕ່ງດອງແລ້ວ ຄວາມບໍ່ໝັ້ນຄົງທາງເສດຖະກິດ ແລະ ການລ້ຽງດູລູກເປັນສາເຫດໃຫຍ່ທີ່ສຸດຂອງການບໍ່ມີລູກ ໂດຍໄດ້ຄະແນນ 37,4% ແລະ 25,3% ຂອງຜູ້ຕອບແບບສອບຖາມ ຕາມລຳດັບ, ຖັດມາແມ່ນສາເຫດກ່ຽວກັບການຈັດສັນບ່ອນຢູ່ອາໄສທີ່ບໍ່ພຽງພໍ ແລະ ຄວາມບໍ່ເພິ່ງພໍໃຈຕໍ່ບໍລິການເບິ່ງແຍງເດັກ.
