ທາງຮ້າຍມີສະຕິ ທາງດີຈົ່ງລະວັງ

ໂດຍ: ມຶກບໍ່ແຫ້ງ

ບໍ່ມີໃຜປະເສດດອກວ່າທາງດີນັ້ນ ຈະນຳມາເຊິ່ງອຳນວຍຄວາມສະດວກ ວ່ອງໄວ ແຕ່ໃນຄວາມດີຂອງມັນນັ້ນ ກໍອາດມີບາງອັນທີ່ຄວນລະວັງແດ່.

ນັບວ່າເປັນຄວາມປະເອີບໃຈອັນນຶ່ງທີ່ ສປປລາວ ຫາກໍເປີດນຳໃຊ້ທາງດ່ວນແຫ່ງທຳອິດຂອງປະເທດ ໃນເດືອນ ທັນວາ 2020 ແຕ່ ນະຄອນຫຼວງວຽງຈັນ ຫາ ວັງວຽງ ເຊິ່ງຄາດການວ່າຈະສາມາດກະຕຸ້ນການເຕີບໂຕທາງດ້ານ ເສດຖະກິດ ຫຼາຍສົມຄວນໂດຍສະເພາະ ຂະແໜງການທ່ອງທ່ຽວ, ການຂົນສົ່ງ ແລະ ອື່ນໆ.

ເຖິງວ່າການປະກາດນຳໃຊ້ ທາງດ່ວນນັ້ນ ເປັນຊ່ວງທີ່ການລະບາດຂອງພະຍາດໂຄວິດ 19 ຍັງບໍ່ຖົດຖອຍລົງ ໂດຍສະເພາະ ບັນດາປະເທດອ້ອມແອ້ມເຮົາ ແຕ່ຍັງໂຊກດີທີ່ປະເທດເຮົາ ຍັງສາມາດເດີນທາງໄປມາຫາສູ່ກັນ ພາຍໃນປະເທດໄດ້ ແລະ ບວກກັບໃນຊ່ວງເວລາທີ່ ໃກ້ຮອດ ມື້ພັກປີໃໝ່ສາກົນນັ້ນ ເຮັດໃຫ້ການເດີນທາງ ເທີງທາງດ່ວນ ກາຍເປັນການເລື່ອງທີ່ຕື່ນຕາ ຕື່ນໃຈ ບໍ່ແມ່ນໜ້ອຍ ໂດຍເຫັນໄດ້ຄວາມວ່ອງໄວ ຄືຈາກ 3-4 ຊົ່ວໂມງໃນເມື່ອກ່ອນ ດຽວນີ້ ໃຊ້ເວລາພຽງ 1 ຊົ່ວໂມງ ຫຼື ຊົ່ວໂມງປາຍເທົ່ານັ້ນ ຈາກນະຄອນຫຼວງວຽງຈັນ ຫາ ວັງວຽງ.

ຄຽງຄູ່ກັບ ຄວາມສະດວກສະບາຍດັ່ງກ່າວນັ້ນ ກໍມີບາງອັນທີ່ ພວກເຮົາຄວນລະມັດລະວັງຕື່ມ ໂດຍສະເພາະ ຄວາມປອດໄພ. ເມື່ອຫຼາຍສິບປີກ່ອນ ນັກຂຽນມືເອກຂອງລາວ “ດວງຈຳປາ” ເພິ່ນໄດ້ບັນລະຍາຍໃນກາບກອນ ບົດໜຶ່ງຂອງເພິ່ນທີ່ມີຫົວຂໍ້ວ່າ “ລະວັງທາງດີ” ເຊິ່ງມີເນື້ອໃນສຳຄັນຢູ່ບ່ອນວ່າ ທາງດີນັ້ນ ມັກເກີດອຸບັດຕິເຫດ ກວ່າທາງຂີ້ຮ້າຍ ເພາະ ໃຜໆກໍມັກຂັບຂີ່ດ້ວຍຄວາມເພີດເພີນໃຈ ຂັບໄວຕາມໃຈມັກ ເລີຍຂາດສະຕິ ກໍໃຫ້ເກີດ ອຸບັດຕິເຫດຕາມມາ.

ເຊິ່ງຜູ້ຂຽນກໍຄິດວ່າ ຄຳເຕືອນສະຕິດັ່ງກ່າວນັ້ນ ຍັງໃຊ້ໄດ້ກັບພວກເຮົາໃນຍຸກນີ້ ໂດຍສະເພາະການນຳໃຊ້ທາງດ່ວນ. ຕາມການລາຍງານຂອງກະຊວງໂຍທາທິການ ແລະຂົນສົ່ງນັ້ນ ຜູ້ຂັບຂີ່ ໃນປະເທດເຮົາ ມີພຽງປະມານ 30% ເທົ່ານັ້ນ ທີ່ເສັງຜ່ານການຂັບຂີ່ ແລະໄດ້ໃບຂັບຂີ່ທີ່ຖືກຕ້ອງ. ຖ້າຕົວເລກນີ້ຖືກຕ້ອງແທ້ ນັ້ນພວກເຮົາກໍສາມາດ ຈິນຕະນາການໄດ້ເລີຍວ່າ ໃນລົດທີ່ແລ່ນເທີງທາງດ່ວນນັ້ນ 100 ຄັນໃດ ມີພຽງ 30 ຄັນເທົ່ານັ້ນ ທີ່ມີໃບຂັບຂີ່ ທີ່ຜ່ານການສອບເສັງທີ່ຖືກຕ້ອງ.

ນັ້ນກໍໝາຍຄວາມວ່າ 70% ແມ່ນອາດມີຄວາມຊຳນານໃນການຂັບຂີ່ ແຕ່ກໍບໍ່ໄດ້ຮູ້ກົດຈາລະຈອນ, ປ້າຍສັນຍານຕ່າງໆ ຕາມທ້ອງຖະໜົນຢ່າງເຕັມສ່ວນ ອັນກໍໃຫ້ເກີດມີຄວາມສ່ຽງສູງຕໍ່ຕົນເອງ ແລະຜູ້ອື່ນໃນການຂັບຂີ່. ພ້ອມນັ້ນ ອັດຕາການດື່ມສິ່ງມືນເມົາ ແລ້ວຂັບຂີ່ ຍັງເປັນສາເຫດສຳຄັນໃນການເກີດອຸບັດຕິເຫດຢູ່ປະເທດເຮົາ, ດັ່ງນັ້ນ ພວກເຮົາ ລອງຄິດເບິ່ງດຸວ່າ ຖ້າຄົນເມົາແລ້ວ ຂັບລົດເທິງທາງດ່ວນ ຈະມີຄວາມອັນຕະລາຍສໍ່າໃດ ໃນເມື່ອຕ່າງຝ່າຍຕ່າງເລັ່ງໄວ ໃຫ້ສົມຊື່ທາງ “ດ່ວນ”.

ພ້ອມນັ້ນ ພວກເຮົາຈະຕ້ອງໄດ້ປັບນິໄສ ທີ່ເປັນຄວາມລື້ງເຄີຍຫຼາຍອັນຈະເຮັດບໍ່ໄດ້ອີກແລ້ວ ເທີງທາງດ່ວນ. ອັນໜຶ່ງນັ້ນ ທີ່ເຈົ້າໜ້າທີ່ຫາກໍອອກມາແຈ້ງ ກໍຄື “ຫ້ອງນໍ້າແຄມທາງ” ທີ່ຜູ້ຂຽນເຄີຍແລກປ່ຽນນຳ ທ່ານຜູ້ ອ່ານເມື່ອປີກ່ອນໆ ແຕ່ເທີງທາງດ່ວນ ເຮັດແບບນັ້ນບໍ່ໄດ້ອີກແລ້ວ ຜູ້ໃດ ຊິຈອດລົດ ແລ້ວຢືນຖ່າຍເບົາແຄມທາງ ເພາະສ່ຽງໃນການເກີດອຸບັດຕິເຫດ.

ນອກນັ້ນ ກໍຍັງມີຄວາມປອດໄພອື່ນໆ ທີ່ເຊື່ອວ່າທາງພາກສ່ວນທີ່ກ່ຽວຂ້ອງເພິ່ນເລັ່ງແກ້ໄຂ ເຊັ່ນ ການປ່ອຍສັດລ້ຽງ ຫຼື ຍານພາຫະນະ ທີ່ບໍ່ແທດເໝາະເຂົ້າມາທາງດ່ວນ ທີ່ສ່ຽງໃນການເກີດອຸບັດຕິເຫດ ບໍ່ໜ້ອຍເຊັ່ນກັນ ເພາະນັບຕັ້ງແຕ່ເປີດນຳໃຊ້ມາບໍ່ຮອດເດືອນກໍມີຫຼາຍກໍລະນີແລ້ວ.

ນອກຈາກທີ່ຜູ້ຂຽນກ່າວມານີ້ແລ້ວ ກໍອາດຍັງມີຫຼາຍບັນຫາທີ່ຄວນລະມັດລະວັງຕື່ມ ເພື່ອຮັບປະກັນວ່າ ທາງດ່ວນນີ້ ໃຫ້ມີທັງຄວາມວ່ອງໄວ ແລະຄວາມປອດໄພ.