ສ.ເກົາຫລີ ຍົກລະດັບມາດຕະການປ້ອງກັນໂຄວິດ-19 ຂັ້ນສູງສຸດ ໃນຄຸກທົ່ວປະເທດ ຫ້າມຢ້ຽມ ຍົກເລີກເຮັດວຽກ ຫລັງພົບນັກໂທດຕິດເຊື້ອໝູ່ 800 ກວ່າຄົນ
ກະຊວງຍຸຕິທຳ ສ.ເກົາຫລີ ປະກາດເພີ່ມລະດັບມາດຕະການຮັກສາໄລຍະຫ່າງພາຍໃນຄຸກທົ່ວປະເທດ ເປັນຂັ້ນສູງສຸດ ເພື່ອປ້ອງກັນການແຜ່ລະບາດຂອງພະຍາດໂຄວິດ-19 ໃນນັກໂທດ ໂດຍມີຜົນບັງຄັບໃຊ້ເປັນເວລາ 2 ອາທິດ ນັບແຕ່ວັນທີ 31 ທັນວາຈົນຮອດວັນທີ 13 ມັງກອນ.
ພາຍໃຕ້ມາດຕະການຮັກສາໄລຍະຫ່າງຂັ້ນສູງສຸດນີ້ ລວມທັງການຫ້າມຢ້ຽມ ແລະ ຍົກເລີກການເຮັດວຽກ ຫລື ກິດຈະກຳໃນຄຸກທັງໝົດ ເພື່ອຫລຸດການຕິດຕໍ່ກັນລະຫວ່າງນັກໂທດ, ບຸກຄົນພາຍນອກ ແລະ ເຈົ້າໜ້າທີ່ໃນຄຸກ. ຂະນະທີ່ຈຳກັດການເຂົ້າພົບຂອງທະນາຍຄວາມ ແລະ ຫລຸດການເຮັດວຽກຂອງເຈົ້າໜ້າທີ່ໃນຄຸກທຸກຄົນ.
ປະກາດດັ່ງກ່າວມີຂຶ້ນຫລັງເກີດກໍລະນີແຜ່ລະບາດໂຄວິດ-19 ທີ່ເຊື່ອມໂຍງກັບສູນກັກກັນດອງບູ ເຊິ່ງເປັນຄຸກທາງຕາເວັນອອກສຽງໃຕ້ຂອງນະຄອນຫລວງເຊອຸນ ໂດຍຫລ້າສຸດ ພົບວ່າມີຜູ້ຕິດເຊື້ອທີ່ກ່ຽວຂ້ອງກັບຄຸກແຫ່ງນີ້ແລ້ວ 807 ຄົນ ສ່ວນຫລາຍເປັນນັກໂທດ ແລະ ອະດີດນັກໂທດ ແລະ ໃນຈຳນວນນີ້ມີ 2 ຄົນ ເສຍຊີວິດແລ້ວ.
ນອກຈາກນີ້, ທາງກະຊວງຍຸຕິທຳຂອງ ສ.ເກົາຫລີ ກຳລັງພິຈາລະນາຍ້າຍນັກໂທດຈາກສູນກັກກັນດອງບູໄປຄຸກແຫ່ງອື່ນໆຫລາຍຂຶ້ນ ເພື່ອຫລຸດຄວາມແອອັດ ເຊິ່ງຕອນນີ້ມີຈຳນວນນັກໂທດຫລາຍກວ່າທີ່ຄຸກຮອງຮັບໄດ້ເຖິງ 116,6%.
ເຊິ່ງກ່ອນໜ້ານີ້ ມີນັກໂທດຫລາຍຮ້ອຍຄົນ ລວມທັງກຸ່ມຜູ້ຕິດເຊື້ອ ຖືກຍ້າຍໄປຄຸກແຫ່ງອື່ນໆທົ່ວປະເທດແລ້ວ. ຂະນະທີ່ທາງກະຊວງກຳລັງພິຈາລະນາປ່ອຍນັກໂທດແບບມີເງື່ອນໄຂ (Parole) ເພີ່ມຂຶ້ນ ໂດຍສະເພາະນັກໂທດທີ່ມີພະຍາດປະຈຳຕົວ ຫລື ຢູ່ໃນກຸ່ມຄວາມປະພຶດດີ.
ຂະນະດຽວກັນ ຈະດຳເນີນການກວດເຊື້ອນັກໂທດ ແລະ ເຈົ້າໜ້າທີ່ໃນຄຸກທຸກຄົນ ເພື່ອປ້ອງກັນກໍລະນີການຕິດເຊື້ອແບບບໍ່ສະແດງອາການ ແລະ ຕັ້ງສູນປິ່ນປົວຜູ້ຕິດເຊື້ອໃນຄຸກ ແລະ ບໍລິເວນອ້ອມຮອບ ສຳລັບການປິ່ນປົວຜູ້ຕິດເຊື້ອທີ່ມີອາການບໍ່ຮຸນແຮງ.
