ໄທຮັບມືໂຄວິດ ຢ່າຕົກມ້າຕາຍວັກຊີນ
ໄທ ເຖິງວ່າຢູ່ໃນກຸ່ມທີ່ຮັບມືໂຄວິດ-19 ໄດ້ດີ ແລະ ມີຄວາມສາມາດໃນການແກ້ໄຂ, ຈົນເກີດກໍລະນີສະມຸດສາຄອນ ໃນແງ່ຂອງຜູ້ຕິດເຊື້ອຖືວ່າຍັງບໍ່ຮຸນແຮງເທົ່າປະເທດໃນເອີຣົບ, ແຕ່ໃນທາງຂອງວັກຊີນໂຄວິດ-19 ຖືວ່າໄທຢູ່ອັນດັບທ້າຍໆ. ດັ່ງນັ້ນ ລັດຖະບານຈຳເປັນຕ້ອງເລັ່ງຫາວັກຊີນເພີ່ມຕື່ມ.
ວິກິດການແຜ່ລະບາດຂອງໂຄວິດ-19 ທີ່ຍັງທຳລາຍໄປທົ່ວໂລກ ສົ່ງຜົນໃຫ້ຊ່ວງເວລາປີເກົ່າຂຶ້ນໃໝ່ 2021 ເກີດຄວາມກັງວົນ ແທນທີ່ຈະມີການສະເຫລີມສະຫລອງກາຍເປັນຊ່ວງແຫ່ງຂອງການປັບຕົວ. ຜົນກະທົບຮຸນແຮງເກີດຂຶ້ນໃນທຸກມິຕິ ທັງເສດຖະກິດ, ສັງຄົມ ແລະ ການເມືອງ ໃນແບບທີ່ບໍ່ເຄີຍເກີດຂຶ້ນມາກ່ອນ ນັບແຕ່ຄັ້ງທຳອິດທີ່ພົບໃນປະເທດຈີນ ການກະຈາຍໄປຢ່າງວ່ອງໄວ ຫລາຍປະເທດຕ້ອງລັອກດາວຫລາຍເດືອນ ແນ່ອນກິດຈະກຳທາງເສດຖະກິດຫລຸດລົງ ກະທົບການເຕີບໃຫຍ່ເປັນປະຫວັດສາດ.
ລັດຖະບານແຕ່ລະປະເທດລ້ວນໃຊ້ມາດຕະການກະຕຸ້ນເສດຖະກິດໃຫ້ເກີດແຮງຂັບເຄື່ອນ, ເອກະຊົນຕ້ອງຫາທາງຮັກສາກິດຈະການເພື່ອຖ້າຈັງຫວະການຟື້ນຕົວໃນປີ 2021 ອາດມີຄວາມຄາດຫວັງ, ແຕ່ສະຖານະການຫລ້າສຸດອາດຈະຕ້ອງຖ້າຮອດປີ 2022. ຫລາຍສຳນັກເບິ່ງວ່າ: ປີ 2021 ຍັງເປັນຊ່ວງຟື້ນໄຂ້. ດັ່ງນັ້ນ ມີໂອກາດສູງທີ່ເສດຖະກິດຈະກັບມາຟື້ນຕົວເທົ່າລະດັບກ່ອນໂຄວິດ ຕ້ອງຖ້າຮອດປີ 2022 ໂດຍກອງທຶນການເງິນສາກົນ (IMF) ຄາດການວ່າ: ປີນີ້ເສດຖະກິດໂລກຍັງຕິດລົບ 4,4%.
ປັດໄຈຍັງຢູ່ໃນຄວາມບໍ່ແນ່ນອນ ແບ່ງເປັນເຂດເສດຖະກິດພັດທະນາແລ້ວ ຍັງມີການລັອກດາວຮອບໃໝ່ເພື່ອສະກັດກັ້ນການຕິດເຊື້ອ, ສ່ວນເຂດເສດຖະກິດປະເທດກຳລັງພັດທະນາທ່າອ່ຽງກະຈາຍວັກຊີນໄດ້ຊັກຊ້າ ບັນທອນການຟື້ນຕົວກິດຈະກຳເສດຖະກິດ, ແຕ່ຖ້າວັກຊີນທົ່ວໂລກເລີ່ມໃຊ້ໄດ້ນັບແຕ່ມື້ນີ້ໄປທົ່ວໂລກ ເຖິງຈະເຮັດໃຫ້ເສດຖະກິດໂລກມີຄວາມຫວັງ ວັກຊີນຈຶ່ງເປັນຕົວແປສຳຄັນ. ປັດຈຸບັນບາງປະເທດເລີ່ມສັກແລ້ວ ຄືໃນອາຊຽນ ສິງກະໂປໄດ້ເລີ່ມເຂັມທຳອິດແລ້ວ ຫລາຍປະເທດວາງແຜນໃນເດືອນມັງກອນ-ມີນາ 2021.
ປະເທດໄທ ເຊິ່ງໜີວົງຈອນໂຄວິດບໍ່ພົ້ນ ເຖິງວ່າຢູ່ໃນກຸ່ມທີ່ປ້ອງກັນ ແລະ ຮັບມືໂຄວິດໄດ້ດີ ແລະ ມີຄວາມສາມາດໃນການແກ້ໄຂ ຈົນເກີດກໍລະນີສະມຸດສາຄອນ ເຊິ່ງຖ້າເບິ່ງຕົວເລກຜູ້ຕິດເຊື້ອ ແລະ ຈຳນວນຜູ້ເສຍຊີວິດຖືວ່າຍັງບໍ່ຮຸນແຮງເທົ່າປະເທດໃນເອີຣົບ, ແຕ່ຖ້າເບິ່ງດ້ານການໃຊ້ວັກຊີນຕ້ອງບອກວ່າຢູ່ອັນດັບທ້າຍໆ ເຊິ່ງເຫັນວ່າພາກລັດຕ້ອງຈິງຈັງຕໍ່ການກຳນົດມື້ທີ່ຄົນໄທໄດ້ໃຊ້ວັກຊີນ, ຖ້າຢ້ອນເບິ່ງຄຳກ່າວຂອງນາຍົກລັດຖະມົນຕີໃນການຖະແຫລງຜ່ານໂທລະພາບໃນວັນທີ 22 ທັນວາ 2020 ລະບຸພຽງວ່າຈະເລັ່ງຈັດຫາ ແລະ ພັດທະນາວັກຊີນໃຫ້ພ້ອມນຳໃຊ້ໄວທີ່ສຸດເທົ່າທີ່ຈະເລັ່ງໄດ້. ນາຍົກລັດຖະມົນຕີ ຍັງບໍ່ສາມາດລະບຸເດືອນທີ່ແນ່ນອນ, ໄລຍະເວລາທີ່ຄືບໜ້າໃນການໄດ້ຮັບວັກຊີນຈາກແອສຕຣາຊິເນກ້າ ຍັງເປັນລາຍງານເກົ່າຄືເດືອນມິຖຸນາ 2021.
ເຫັນວ່າລັດຖະບານຈຳເປັນຕ້ອງຫາຫົນທາງເພີ່ມໃນການຈັດຊື້ວັກຊີນ. ຫົວໜ້າສູນຊ່ຽວຊານສະເພາະທາງດ້ານໄວຣັສວິທະຍາ ຄລີນິກພາກວິຊາກຸມາລະເວດສາດ ຄະນະແພດສາດ ຈຸລາລົງກອນມະຫາວິທະຍາໄລ ອອກມາຕັ້ງຂໍ້ສັງເກດວ່າ: ລັດຖະບານຄວນຈະນຳໄປພິຈາລະນາວ່າໄທຍັງຊັກຊ້າໃນເລື່ອງວັກຊີນ ເພາະອາດຈະມຸ່ງຢູ່ກັບວັກຊີນໄວຣັສ ເວກເຕີຂອງ AstraZeneca ເພື່ອລາຍດຽວ ທີ່ຍັງທົດລອງບໍ່ສຳເລັດ ແລະ ຍັງບໍ່ມີປະເທດໃດຂຶ້ນທະບຽນ, ລັດຖະບານຈຶ່ງບໍ່ຄວນຢຶດຖືຢູ່ກັບວັກຊີນບໍລິສັດໃດບໍລິສັດໜຶ່ງ ເພາະປັດຈຸບັນມີວັກຊີນໃຫ້ເລືອກຫລາຍບໍລິສັດ ທັງອາເມລິກາ, ເອີຣົບ ແລະ ຈີນ.
