ເກີດເຫດລະເບີດຢູ່ສະໜາມບິນເຢເມນ ມີຜູ້ເສຍຊີວິດແລ້ວ 16 ຄົນ
ວັນທີ 30 ທັນວາ 2020 ສຳນັກຂ່າວ AP ລາຍງານເຫດລະເບີດພາຍໃນອາຄານຂອງສະໜາມບິນທາງຕອນໃຕ້ຂອງເມືອງ Aden ປະເທດເຢເມນ ຂະນະທີ່ເຮືອບິນຂອງຄະນະລັດຖະມົນຕີທີ່ກັບຈາກການຢ້ຽມຢາມຊາອຸດິອາຣະເບຍລົງຈອດ ແລະ ກຳລັງຍ່າງລົງຈາກເຮືອບິນ. ເບື້ອງຕົ້ນຜູ້ໂດຍສານໃນເຮືອບິນທັງໝົດປອດໄພ, ແຕ່ມີລາຍງານຜູ້ເສຍຊີວິດພາຍໃນສະໜາມບິນຢ່າງໜ້ອຍ 16 ຄົນ, ບາດເຈັບອີກ 60 ຄົນ.
ລັດຖະມົນຕີດ້ານການສື່ສານ Naguib al-Awg ກ່າວຕໍ່ນັກຂ່າວວ່າ: ໄດ້ຍິນສຽງລະເບີດດັງຂຶ້ນ 2 ຄັ້ງ ແລະ ໃຫ້ຄວາມເຫັນວ່າ: ເປັນການໂຈມຕີຈາກໂດຣນ ໂດຍມຸ່ງເປົ້າໃສ່ຄະນະລັດຖະມົນຕີ ເນື່ອງຈາກເຮືອບິນມີກຳນົດເດີນທາງມາເຖິງກ່ອນໜ້ານີ້, ແຕ່ເກີດຄວາມຊັກຊ້າ ຈຶ່ງບໍ່ໄດ້ແລ່ນເຂົ້າໄປໃນອາຄານທີ່ເປັນຈຸດເກີດເຫດ.
ເຢເມນຢູ່ສະພາບສົງຄາມກາງເມືອງມາແຕ່ປີ 2014 ລະຫວ່າງກຸ່ມກະບົດຮູທິກັບກອງກຳລັງຂອງປະ ທານາທິບໍດີ ອັບດູ ຣັບບູ ມານຊູ ຮາດີ ໂດຍມີກອງທັບຈາກປະເທດອາຣັບນຳ ໂດຍຊາອຸດິອາຣະເບຍເຂົ້າ ຊ່ວຍເຫລືອເບື້ອງປະທານາທິບໍດີ ຮາດີ.
