ວັກຊີນໂຄວິດ-19 ຂອງ Oxford ແລະ AstraZeneca ໄດ້ຮັບອະນຸມັດນຳໃຊ້ຢູ່ອັງກິດເປັນປະເທດທຳອິດໃນໂລກ
ວັນທີ 30 ທັນວາ, ລັດຖະບານອັງກິດໄດ້ອະນຸມັດການນຳໃຊ້ວັກຊີນໂຄວິດ-19 ທີ່ພັດທະນາ ແລະ ຜະລິດໂດຍມະຫາວິທະຍາໄລ Oxford ແລະ ບໍລິສັດ AstraZeneca ໃນອັງກິດແລ້ວ ໂດຍລະບຸວ່າ: ເປັນໄປຕາມຄຳແນະນຳຂອງສຳນັກງານເບິ່ງແຍງຢາ ແລະ ຜະລິດຕະພັນສຸຂະພາບຂອງອັງກິດ (MHRA) ເຊິ່ງໄດ້ທົດລອງທາງຄລີນິກຢ່າງເຂັ້ມງວດ ແລະ ວິເຄາະຂໍ້ມູນໂດຍຜູ້ຊ່ຽວຊານ ແລະ ມີຜົນສະຫລຸບວ່າ: ວັກຊີນດັ່ງກ່າວໄດ້ມາດຕະຖານດ້ານຄວາມປອດໄພ, ຄຸນນະພາບ ແລະ ມີປະສິດທິພາບຕາມທີ່ກຳນົດ. ຖືເປັນວັກຊີນຊະນິດທີ 2 ທີ່ໄດ້ຮັບອະນຸມັດໃຫ້ນຳໃຊ້ຢູ່ອັງກິດຕໍ່ຈາກວັກຊີນຂອງ Pfizer/BioNTech.
ທ່ານ ແມດ ແຮນຄ໊ອກ ລັດຖະມົນຕີສາທາລະນະສຸກອັງກິດ ລະບຸວ່າ: ວັກຊີນຈະເລີ່ມແຈກຢາຍໄດ້ໃນວັນທີ 4 ມັງກອນ 2021 ແລະ ຈະເລັ່ງແຈກຢາຍວັກຊີນໃນ 2-3 ອາທິດທຳອິດຂອງປີ 2021. ເຖິງຢ່າງໃດກໍຕາມ, ຜູ້ໄດ້ຮັບວັກຊີນທຸກຄົນຈະໄດ້ຮັບວັກຊີນໂດສທີ 2 ຫລັງຈາກການຮັບວັກຊີນໂດສທຳອິດບໍ່ເກີນ 12 ອາທິດ.
ວັກຊີນ Oxford ແລະ AstraZeneca ເກີດຈາກການນຳເອົາໄວຣັສທີ່ເຮັດໃຫ້ເກີດໄຂ້ຫວັດທົ່ວໄປໃນລີງຊິມແປນຊີມາດັດແປງພັນທຸກຳ ເພື່ອໃຫ້ບໍ່ສາມາດຂະຫຍາຍຕົວໃນມະນຸດ ແລະ ມີພິມຂຽວຂອງສ່ວນໜາມໂປຣຕິນ ຈາກເຊື້ອໄວຣັສ ເຊິ່ງເມື່ອເຂົ້າໄປໃນຮ່າງກາຍມະນຸດແລ້ວຈະມີການສ້າງໜາມໂປຣຕິນເພື່ອກະຕຸ້ນລະບົບພູມຄຸ້ມກັນໃຫ້ສ້າງແອນຕິບໍດີ ແລະ ໃຫ້ທີ-ເຊລ ເຊິ່ງເປັນເຊລພູມຕ້ານທານມາທຳລາຍເຊລທີ່ຕິດເຊື້ອ ເຊິ່ງຖ້າໃນອະນາຄົດລະບົບພູມຄຸ້ມກັນພົບກັບໄວຣັສສ້າງພະຍາດໂຄວິດ-19 ຈະສາມາດຈັດການກັບເຊື້ອໄວຣັສໄດ້ທັນທີ.
