ອາເມລິກາ-ສ.ເກົາຫລີ ຊ້ອມຍິງລູກສອນໄຟ ຮັບມືຈະຫລວດຈາກ ສປປ ເກົາຫລີ
ກອງທັບອາເມລິກາ ແລະ ສ.ເກົາຫລີ ຊ້ອມຍິງລູກສອນໄຟຮ່ວມກັນ, ພາຍຫລັງ ສປປ ເກົາຫລີ ປະກາດຜົນສຳເລັດໃນການທົດລອງຍິງລູກສອນໄຟຂ້າມທະວີບ ໃນລັດສະໝີການຄວບຄຸມເຖິງລັດອະແລສກາ.
+ ສປປ ເກົາຫລີ ຍິງລູກສອນໄຟ ລົງທະເລຍີ່ປຸ່ນອີກ
+ ສປປ ເກົາຫລີ ອ້າງປະສົບຜົນສຳເລັດ ການທົດລອງຍິງລູກສອນໄຟ
ສຳນັກຂ່າວຕ່າງປະເທດລາຍງານຈາກນະຄອນຫລວງເຊອູນ ຂອງ ສ.ເກົາຫລີ ໃນວັນທີ 5 ກໍລະກົດນີ້ວ່າ: ພົນເອກ ວິນແຊນ ບຣູກ ຜູ້ບັນຊາການກອງທັບອາເມລິກາປະຈຳ ສ.ເກົາຫລີ ກ່າວໃນວັນທີ 5 ກໍລະກົດນີ້ວ່າ: ໄດ້ຈັດການຈຳລອງສະຖານະການໃນກໍລະນີເກີດການໂຈມຕີດ້ວຍລູກສອນໄຟຈາກ ສປປ ເກົາຫລີ, ເຖິງວ່າກອງທັບອາເມລິກາປະຕິເສດໃຫ້ຂໍ້ມູນກ່ຽວກັບສະຖານະທີ່ເຝິກແອບຢ່າງຈະແຈ້ງ ໂດຍລະບຸພຽງວ່າຢູ່ແຄມຝັ່ງທະເລຕາເວັນອອກ, ແຕ່ເປີດເຜີຍວ່າໄດ້ນຳເອົາລູກສອນໄຟລະດັບຍຸດທະວິທີ MGM-140 ຮ່ວມການເຝິກແອບ, ສ່ວນກອງທັບ ສ.ເກົາຫລີ ນຳເອົາລູກສອນໄຟ ຮາຍອນມູ-2 ຮ່ວມປະຕິບັດການ ແລະ ລູກສອນໄຟທັງສອງແບບສາມາດໂຈມຕີເປົ້າໝາຍໄດ້ຢ່າງແມ້ນຢຳ, ບົ່ງບອກເຖິງປະສິດທິພາບຂັ້ນສູງຂອງກອງທັບທັງສອງປະເທດໃນການໂຈມຕີເພື່ອຮັບມືຈາກການຮຸກຮານຂອງສັດຕູ.
ການເຄື່ອນໄຫວດັ່ງກ່າວຂອງກອງທັບອາເມລິກາ ແລະ ສ.ເກົາຫລີ ເກີດຂຶ້ນຍັງບໍ່ຮອດ 24 ຊົ່ວໂມງ, ພາຍຫລັງ ສປປ ເກົາຫລີ ປະກາດຜົນສຳເລັດໃນການທົດລອງລູກສອນໄຟ ຮວາຊອງ-14 ໃນວັນທີ 4 ກໍລະກົດ ເຊິ່ງເປັນລູກສອນໄຟຂ້າມທະວີບ (ICBM) ທີ່ມີໄລຍະການຍິງໄກເຖິງລັດອະແລສກາຂອງອາເມລິກາ. ຂະນະທີ່ສຳນັກຂ່າວກາງເກົາຫລີ (KCNA) ລາຍງານວ່າ: ທ່ານ ກິມ ຈອງອິນ ຜູ້ນຳສູງສຸດຂອງປະເທດຕ້ອງການໃຫ້ການທົດລອງ ICBM ໃນເທື່ອນີ້ເປັນຂອງຂວັນວັນຊາດອາເມລິກາ ແລະ ກ່າວອີກວ່າ: ໃນອະນາຄົດ ສປປ ເກົາຫລີ ຄວນເພີ່ມຄວາມຖີ່ໃນການສົ່ງຂອງຂວັນໃຫ້ແກ່ອາເມລິກາ ເພື່ອບໍ່ໃຫ້ອີກຝ່າຍຮູ້ສຶກເບື່ອຈົນເກີນໄປ.
