ຂະຫຍາຍເວລາໃນການຂຶ້ນທະບຽນ ເລກໝາຍໂທລະສັບ ແລະ ຊິມເນັດທົ່ວປະເທດ
ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ໄດ້ອອກແຈ້ງການຂະຫຍາຍເວລາໃນການຂຶ້ນທະບຽນເລກໝາຍໂທລະສັບ ແລະ ຊິມເນັດໃນທົ່ວປະເທດ ເພື່ອເປັນການອຳນວຍຄວາມສະດວກໃຫ້ແກ່ເຂດຫ່າງໄກສອກຫລີກ ແລະ ຜູ້ທີ່ຍັງກະກຽມເອກະສານທີ່ໃຊ້ປະກອບການຂຶ້ນທະບຽນບໍ່ທ່ວງທັນ ເນື່ອງຈາກສະພາບການແຜ່ລະບາດຂອງພະຍາດໂຄວິດ-19 ໂດຍມີລາຍລະອຽດດັ່ງນີ້:
ສືບຕໍ່ຈັດຕັ້ງປະຕິບັດການຂຶ້ນທະບຽນເລກໝາຍໂທລະສັບທຸກລະດົບ (020, 030) ແລະ ຊິມເນັດ ໂດຍແບ່ງອອກເປັນ 3 ໄລຍະຄື: ໄລຍະທີ 1: 1/1/2021-31/5/2021 ສືບຕໍ່ຂຶ້ນທະບຽນເລກໝາຍໂທລະສັບທຸກລະບົບ (020, 030) ແລະ ອິນເຕີເນັດ ສຳລັບເບີທີ່ຍັງບໍ່ທັນໄດ້ຂຶ້ນທະບຽນ, ໃນໄລຍະນີ້ເລກໝາຍໂທລະສັບຈະຍັງສາມາດນໍາໃຊ້ໂທເຂົ້າ-ອອກໄດ້ປົກກະຕິ. ໄລຍະທີ 2: 1/6/2021-30/6/2021 ເລກໝາຍທີ່ຍັງບໍ່ທັນຂຶ້ນທະບຽນທຸກລະບົບ ແລະ ຊິມເນັດ ແມ່ນຍັງສາມາດຮັບໂທລະສັບໄດ້ ແຕ່ບໍ່ສາມາດໂທອອກໄດ້ (ຍົກເວັ້ນເບີສຸກເສີນ) ແລະ ບໍ່ສາມາດຫລິ້ນເນັດໄດ້ ແຕ່ຍັງຈະຮັກສາມູນຄ່າທີ່ຍັງເຫລືອໄວ້ໃນລະບົບ. ໄລຍະທີ 3 ເລີ່ມແຕ່ວັນທີ 1/7/2021 ເລກໝາຍທີ່ຍັງບໍ່ທັນຂຶ້ນທະບຽນທຸກລະບົບ ແລະ ຊິມເນັດ ຈະຖືກປິດການນຳໃຊ້ ບໍ່ສາມາດໂທເຂົ້າ-ອອກ ແລະ ຫລິ້ນເນັດໄດ້, ແຕ່ຜູ້ໃຫ້ບໍລິການໂທລະຄົມມະນາຄົມ ແລະ ອິນເຕີເນັດ ຈະຍັງຮັກສາສິດຄວາມເປັນເຈົ້າຂອງເດີມຂອງເລກໝາຍດັ່ງກ່າວໄວ້ ແລະ ສາມາດເປີດຄືນໃຫ້ເຈົ້າຂອງເລກໝາຍຄືນ ພາຍໃນໄລຍະເວລາ 30 ວັນ ນັບຈາກວັນທີ່ກຳນົດໄວ້ໃນໄລຍະທີ 3 ນີ້.
