ເສດຖະກິດຫວຽດນາມເຕີບໃຫຍ່ຕໍ່າສຸດໃນຮອບ 30 ປີ ແຕ່ສູງສຸດໃນໂລກ
ລັດຖະບານຫວຽດນາມ ເປີດເຜີຍໃນວັນທີ 27 ທັນວາວ່າ: ເສດຖະກິດຫວຽດນາມໃນປີ 2020 ເກີດການຂະຫຍາຍຕົວຊ້າລົງສູ່ລະດັບອ່ອນແອທີ່ສຸດ ຢ່າງໜ້ອຍໃນຮອບ 3 ທົດສະວັດ ເນື່ອງຈາກໄດ້ຮັບຜົນກະທົບຈາກໂຄວິດ-19 ແລະ ເສດຖະກິດໂລກທີ່ຊຸດໂຊມ.
ສຳນັກງານສະຖິຕິແຫ່ງຊາດຫວຽດນາມ (GSO) ອອກຖະແຫລງການລະບຸວ່າ: ເສດຖະກິດຂອງປະເທດຂະຫຍາຍຕົວ 2,91% ໃນປີນີ້ ຫລັງຈາກລວມຍອດຜະລິດຕະພັນພາຍໃນ (GDP) ຂອງປະເທດເຕີບໃຫຍ່ສູງກວ່າ 7% ເປັນເວລາ 2 ປີຕິດຕໍ່ກັນ.
ປະເທດມີທ່າອ່ຽງເກີນດູນການຄ້າ 19,06 ພັນລ້ານໂດລາໃນປີນີ້, ຂະນະທີ່ມູນຄ່າການບໍລິໂພກໃນປະເທດ ສະເລ່ຍເພີ່ມຂຶ້ນ 3,23%.
“ນີ້ຄືລະດັບການເຕີບໃຫຍ່ຂອງ GDP ຕໍ່າທີ່ສຸດໃນຮອບຫລາຍທົດສະວັດ ທ່າມກາງຜົນກະທົບດ້ານລົບຂອງການແຜ່ລະບາດໂຄວິດ-19 ຖືເປັນຜົນສຳເລັດຂອງຫວຽດນາມທີ່ຍັງມີອັດຕາການເຕີບໃຫຍ່ທາງເສດຖະກິດສູງສຸດໃນໂລກ” GSO ລະບຸ ແລະ ກ່າວວ່າ: ຫວຽດນາມຕໍ່ສູ້ກັບການແຜ່ລະບາດຂອງໂຄວິດ-19 ໄດ້ສຳເລັດ. ຂະນະດຽວກັນ ເສດຖະກິດຂອງປະເທດເປີດກວ້າງ ເຊິ່ງການແຜ່ລະບາດຂອງໂຄວິດຢູ່ພາຍໃຕ້ການຄວບຄຸມຂອງຫວຽດນາມບໍ່ຫລາຍກໍໜ້ອຍ.
ເຖິງຢ່າງໃດກໍຕາມ, ມາດຕະການກັກກັນ ແລະ ຕິດຕາມການແຜ່ລະບາດຢ່າງເຂັ້ມງວດ ເຮັດໃຫ້ກິດຈະກຳທາງເສດຖະກິດຂອງຫວຽດນາມຟື້ນຕົວໄວກວ່າປະເທດສ່ວນຫລາຍໃນອາຊີ ເຊິ່ງຫລ້າສຸດ ຫວຽດນາມມີຜູ້ຕິດເຊື້ອໂຄວິດ-19 ທັງໝົດ 1.440 ຄົນ ແລະ ເສຍຊີວິດ 35 ຄົນ.
