ລັດເຊຍຕິຕຽນ ໄບເດັນ ຢ່າງຮຸນແຮງ
ຜູ້ຊະນະການເລືອກຕັ້ງປະທານາທິບໍດີ ສະຫະລັດ ໂຈໄບເດັນ ບໍ່ທັນໄດ້ນັ່ງໃນທຳນຽບຂາວ ເປັນປະທານາທິບໍດີເທື່ອ ແຕ່ຖືກຝ່າຍລັດເຊຍ ຝາກຄຳຕຳນິຕິຕຽນໄປຫາຢ່າງຮຸນແຮງ.
ສຳນັກຂ່າວ Bloomberg ລາຍງານ ເມື່ອວັນທີ 24 ທັນວານີ້ວ່າ ຮອງລັດຖະມົນຕີກະຊວງການຕ່າງປະເທດ ລັດເຊຍ Sergei Ryabkov ກ່າວວ່າ: ມົສໂກ ບໍ່ໄດ້ມີຄວາມຫວັງໃນແງ່ດີຫຍັງທັງໝົດນຳສາຍພົວພັນກັບ ສະຫະລັດເລີຍ ເພາະເປັນສັດຕູທີ່ສຸດໆ ຂອງລັດເຊຍ ພາຍໃຕ້ລັດຖະບານຂອງ ໂຈໄບເດັນ ແລະ ຈະບໍ່ປະນິປະນອມແຕ່ຝ່າຍດຽວ ເພື່ອບູລະນະສາຍສຳພັນລະຫວ່າງກັນ.
ໃນຂະນະນີ້ ລັດເຊຍຍັງບໍ່ທັນມີທ່າທີການພົວພັນໃດໆ ກັບຄະນະຮັບຜິດຊອບລັດຖະບານຊຸດໃໝ່ ຂອງໂຈໄບເດັນ. ທ່ານ Ryabkov ກ່າວວ່າ: ພວກເຮົາຈະບໍ່ເປັນຜູ້ເລີ່ມຕົ້ນກ່ອນ ແລ້ວແຕ່ຝ່າຍ ອາເມລິກາ ຈະຕັດສິນໃຈແນວໃດ, ເມື່ອໃດ ແລະ ວິທີການສ້າງສາຍພົວພັນແບບໃດກ່ອນ. ວັນທີ 23 ທັນວານີ້ ທ່ານ ກ່າວຢໍ້າວ່າ: ສ່ວນພວກເຮົາແມ່ນຈະເລີ່ມເຮັດແຕ່ສິ່ງຫຍຸ້ງຍາກ ແລະ ເຮັດໃຫ້ຫຍຸ້ງຍາກຂຶ້ນໄປຊັກໄຊ້.
ທ່ານ Ryabkov ກ່າວອີກວ່າ: ສຳລັບລັດຖະບານຂອງ ໂຈໄບເດັນແລ້ວ, ລັດເຊຍຈະພົວພັນຢູ່ສະເພາະໃນກອບ ສົນທະນາທີ່ມີການເລືອກເຟັ້ນ ທີ່ທັງສອງຝ່າຍໃຫ້ຄວາມສົນໃຈເທົ່ານັ້ນ. ພວກເຮົາບໍ່ໄດ້ລ້ຽງຄວາມຫວັງຫຍັງຫຼາຍໄວ້ກັບລັດຖະບານຊຸດໃໝ່ຂອງ ໂຈໄບເດັນ.
