ບອນລູນສໍາຫລວດອະວະກາດຂອງ KFC ລົງຈອດສຸກເສີນສາເຫດເພາະເກີດອາການຮົ່ວ
ຂ່າວໃຫຍ່ສະເທືອນວົງການ ເມື່ອຊື່ຍີ່ຫໍ້ໄກ່ຈືນລະດັບໂລກເຊັ່ນ KFC ປະສົບຄວາມຫລົ້ມເຫຼວໃນການເດີນທາງດ້ວຍບອນລູນສໍາຫລວດອະວະກາດ ໂດຍບອນລູນຂອງ KFC ວາງແຜນວ່າຈະເດີນທາງຢູ່ເທິງຊັ້ນບັນຍາກາດໂລກເປັນເວລາ 4 ວັນ, ແຕ່ພາຍຫລັງທີ່ສົ່ງຂຶ້ນໄປໄດ້ພຽງ 17 ຊົ່ວໂມງ ຈໍາເປັນຕ້ອງລົງຈອດສຸກເສີນ ເພາະບອນລູນສໍາຫລວດອະວະກາດເກີດອາການຮົ່ວ.
ເຊິ່ງຄວາມຜິດພາດນີ້ ອາດຈະຕົກເປັນຄວາມຮັບຜິດຊອບຂອງບໍລິສັດ World View Enterprises ຢູ່ທີ່ລະບົບເບື້ອງຫຼັງຂອງບອນລູນສໍາຫລວດອະວະກາດທີ່ທາງ KFC ເລືອກໃຊ້ ເຊິ່ງບອນລູນນີ້ມີຊື່ວ່າ: Stratollite ໄດ້ຖືກອອກແບບໃຫ້ລອຍຂຶ້ນໄປສູ່ລະດັບສູງປະມານ 30,5 ກິໂລແມັດ ໂດຍທາງບໍລິສັດ World View Enterprises ຄາດຫວັງຈະໃຫ້ບອນລູນນີ້ສາມາດລອຍຢູ່ເທິງຊັ້ນບັນຍາກາດໂລກໄດ້ດົນເປັນເດືອນ ຫຼື ເປັນປີ ເພື່ອສ້າງເຄືອຂ່າຍການສື່ສານ ຫຼື ເພື່ອການສໍາຫຼວດໂລກ, ແຕ່ເປັນໜ້າເສຍດາຍທີ່ໂຄງການຂອງ KFC ຕ້ອງປະສົບຄວາມຫລົ້ມເຫຼວໃນເວລາພຽງ 17 ຊົ່ວໂມງເທົ່ານັ້ນ.
ແລະ ໃນອາທິດກ່ອນໜ້ານີ້, ບອນລູນຈະຂຶ້ນບິນໃຫ້ KFC ທາງບໍລິສັດ World View Enterprises ໄດ້ປະສົບຜົນສໍາເລັດໃນການນໍາເອົາບອນລູນຂຶ້ນເປັນໄລຍະເວລາ 6 ແລະ 12 ຊົ່ວໂມງ ເພື່ອທົດສອບວ່າລະບົບການເຮັດວຽກຕ່າງໆຂອງບອນລູນສາມາດປະຕິບັດໄດ້ເປັນປົກກະຕິດີ ຫຼື ບໍ່ ໃນລະດັບຄວາມສູງນັ້ນ ບໍ່ວ່າຈະເປັນລະບົບຄວບຄຸມຄວາມສູງ, ລະບົບການສື່ສານ ລວມທັງລະບົບການສ້າງພະລັງງານຈາກແຜງໂຊລ່າເຊລ, ແຕ່ຈາກຄວາມຫລົ້ມເຫຼວຄັ້ງຫຼ້າສຸດ ເປັນເຄື່ອງຢືນຢັນວ່າ: ບອນລູນ Stratollite ຍັງຕ້ອງຜ່ານການທົດສອບອີກຫຼາຍ.
Jane Poynte ຕໍາແໜ່ງຜູ້ບໍລິຫານຂອງບໍລິສັດ World View Enterprises ໄດ້ກ່າວວ່າ: ການທົດສອບລະບົບຕ່າງໆຂອງບອນລູນ Stratollite ໄດ້ສໍາເລັດລົງພາຍໃນເວລາ 2-3 ຊົ່ວໂມງ ພາຍຫຼັງທີ່ຂຶ້ນບິນ ແລະ ເຖິງວ່າການເດີນທາງໃນຄັ້ງນີ້ຈະປະສົບຄວາມຫລົ້ມເຫຼວ, ແຕ່ຖືວ່າມີຜົນສໍາຄັນ ເພາະເປັນຖ້ຽວບິນຍາວນານທີ່ສຸດຂອງ Stratollite ແລະ ໃນເວລານີ້ ທາງບໍລິສັດກໍາລັງກວດສອບຂໍ້ມູນທີ່ລວບລວມຈາກຖ້ຽວບິນຫຼ້າສຸດນີ້ ເພື່ອຄົ້ນຫາຂໍ້ຜິດພາດ ເພື່ອໃຫ້ສາມາດເດີນທາງເທິງຊັ້ນບັນຍາກາດໂລກໄດ້ດົນຂຶ້ນອີກ.
ແນວໃດກໍດີ, ຜູ້ໂດຍສານລະດັບ VIP ຂອງຖ້ຽວບິນນີ້ເຊັ່ນ ເບີເກີໄກ່ກອບສະໄປຊີ ຂອງ KFC ໄດ້ມີໄລຍະເວລາທີ່ດີໃນການບິນຂຶ້ນໄປຊົມວິວສູງເຖິງລະດັບຂອບຊັ້ນບັນຍາກາດໂລກ.
