ຊາວ ສ.ເກົາຫລີ ວິຈານໜັກ ມຸນແຈອິນ ຂໍ້ຫາຈັດຫາວັກຊີນໂຄວິດ-19 ຊັກຊ້າ
ປະທານາທິບໍດີ ມຸນແຈອິນ ຂອງ ສ.ເກົາຫລີ ຜະເຊີນກະແສກົດດັນຈາກສັງຄົມຕໍ່ແຜນຈັດຫາວັກຊີນຕ້ານພະຍາດໂຄວິດ-19 ທີ່ຊາວ ສ.ເກົາຫລີ ເບິ່ງວ່າຊັກຊ້າເກີນໄປ ທັງທີ່ສະຖານະການແຜ່ລະບາດໃນປະເທດຍັງໜ້າກັງວົນ.
ສື່ ສ.ເກົາຫລີ ວິຈານແຜນຈັດຫາວັກຊີນຕ້ານໂຄວິດ-19 ຂອງລັດຖະບານວ່າອາໄສວັກຊີນທີ່ຜະລິດໃນປະເທດຫລາຍເກີນໄປ ແລະ ໃຊ້ເວລາດົນກວ່າການນຳເຂົ້າວັກຊີນຈາກຕ່າງປະເທດ ເພາະລັດຖະບານຊີ້ວ່າຈະເລີ່ມແຈກຢາຍວັກຊີນໃຫ້ປະຊາຊົນໄດ້ໃນເດືອນກຸມພາປີໜ້າ.
ຜົນສຳຫລວດຄວາມຄິດເຫັນປະຊາຊົນຈາກບໍລິສັດ Realmeter ພົບວ່າ: ຊາວ ສ.ເກົາຫລີ 6 ໃນ 10 ຄົນເຊື່ອວ່າຈັດຫາວັກຊີນເປັນເລື່ອງຮີບດ່ວນ ແລະ ການແຈກຢາຍວັກຊີນໃຫ້ປະຊາຊົນຄວນເລີ່ມໃຫ້ໄວທີ່ສຸດເທົ່າທີ່ຈະເປັນໄປໄດ້ ໂດຍສະເພາະເມື່ອພິຈາລະນາເຖິງຈຳນວນຜູ້ຕິດເຊື້ອທີ່ກຳລັງເພີ່ມສູງຂຶ້ນຢ່າງວ່ອງໄວ.
ທຳນຽບປະທານາທິບໍດີ ສ.ເກົາຫລີ ຕອບກັບວ່າ: ໂຄງການສັກວັກຊີນໃຫ້ປະຊາຊົນ “ບໍ່ໄດ້ຊັກຊ້າ” ຕາມທີ່ສື່ ແລະ ສາທາລະນະວິຈານ, ສ່ວນໜ່ວຍງານດ້ານສາທາລະນະສຸກສະແດງຄວາມກັງວົນວ່າ: ຊາວ ສ.ເກົາຫລີ ກຳລັງເບິ່ງການສັກວັກຊີນຕ້ານໂຄວິດ-19 ເປັນການແຂ່ງຂັນກັບນາໆຊາດ ທັງທີ່ທາງການຄວນຮັບຮອງວ່າວັກຊີນທີ່ນຳມາແຈກໃຫ້ປະຊາຊົນນັ້ນປອດໄພແທ້ໆ.
