ລາວມີຜູ້ຕິດເຊື້ອເຮສໄອວີ ເກືອບ 15.000 ຄົນ

ໃນໂອກາດສະເຫລີມສະຫລອງວັນສາກົນຕ້ານເອດ ວັນທີ 1 ທັນວາ ຂຶ້ນໃນວັນທີ 22 ທັນວາ ຢູ່ນະຄອນຫລວງວຽງຈັນ, ທ່ານ ພູທອນ ສູນທະລັກ ຫົວໜ້າສູນຕ້ານເອດ ແລະ ພະຍາດຕິດຕໍ່ທາງເພດສຳພັນ ໃຫ້ຮູ້ວ່າ: ໃນຜ່ານມາ ປະເທດເຮົາກໍໄດ້ສຸມໃສ່ຈັດຕັ້ງປະຕິບັດວຽກງານສະກັດກັ້ນ ແລະ ຕ້ານເຊື້ອເຮສໄອວີ ແລະ ພະຍາດຕິດຕໍ່ທາງເພດສຳພັນຄື: ແຕ່ປີ 1990- 2020 ທົ່ວປະເທດມີຜູ້ຕິດເຊື້ອເຮສໄອວີ 14.915 ຄົນ, ເປັນພະຍາດເອດ  6.014 ຄົນ ແລະ ເສຍຊີວິດ 4.801 ຄົນ, ມາຮອດປັດຈຸບັນມີຜູ້ມາລົງທະບຽນກິນຢາ 12.860 ຄົນ ແລະ ມີ ໜ້າກິນຢາ 7.920 ຄົນ, ເຊິ່ງການຕິດເຊື້ອສ່ວນຫຼາຍແມ່ນທາງເພດສຳພັນ ໂດຍກຸ່ມທີ່ມີຄວາມສ່ຽງສູງຄື: ກຸ່ມສາວບໍລິການ, ຊາຍມີເພດສຳພັນກັບຊາຍ , ກຸ່ມສັກຢາເສບຕິດເຂົ້າທາງເສັ້ນເລືອດ, ຊຶ່ງໄລ່ມາຮອດປີ 2020ນີ້ ກຸ່ມປະຊາກອນທົ່ວໄປອາຍຸ 15-49 ປີ ມີຜູ້ຕິດເຊື້ອເທົ່າກັບ 0,3%,  ສາວບໍລິການ 1% ຊາຍມີເພດສຳພັນກັບຊາຍ 2,5% ແລະ ກະເທີຍ 3,3%.

ມາຮອດປີ 2020 ການຈັດຕັ້ງປະຕິບັດວຽກສະກັດກັ້ນ ແລະ ຕ້ານເຊື້ອພະຍາດດັ່ງກ່າວ ມີຄວາມຄືບໜ້າຫຼາຍ ເປັນຕົ້ນດ້ານການປິ່ນປົວ, ການດູແລ ເບິ່ງແຍງ ແລະ ຊ່ວຍເຫຼືອຜູ້ຕິດເຊື້ອ ເຊິ່ງປັດຈຸບັນທົ່ວປະເທດມີສະຖານທີ່ໃຫ້ຄຳປືກສາ ແລະ ກວດເລືອດ 189 ແຫ່ງ, ມີສະຖານທີ່ປິ່ນປົວດ້ວຍຢາຕ້ານເຊື້ອເຮສໄອວີ  11 ແຫ່ງໃນ 8 ແຂວງ ມີຈຸດແຈກຢາຍຢາຢູ່ 2 ແຂວງ ແລະ ຈະຂະຫຍາຍການປົກຄຸມໃຫ້ໄດ້ທົ່ວປະເທດໃນປີ 2021.