ພັດທະນາເສດຖະກິດ ລຶບລ້າງຄວາມທຸກຍາກໃຫ້ຊົນເຜົ່າສ່ວນໜ້ອຍ

ລາຍງານຂ່າວຈາກ ຫວຽດນາມ ວັນທີ 22 ທັນວານີ້  ໃຫ້ຮູ້ວ່າ ໂຄງການພັດທະນາຂອງສະຫະປະຊາຊາດ ໄດ້ສົມທົບກັບຄະນະກຳມະການຊົນເຜົ່າ ແລະ ສະຖານທູດ ອອສຕາລີ ປະຈຳຢູ່ຮ່າໂນ້ຍ ສສ ຫວຽດນາມ ໄດ້ຈັດກອງປະຊຸມສຳມະນາໃຫ້ຄຳປຶກສາກ່ຽວກັບບັນຫາ “ຮູບແບບການພັດທະນາເສດຖະກິດ-ສັງຄົມ ແລະ ຫຼຸດຜ່ອນຄວາມທຸກຍາກແອບບຫຼາຍທິດທາງໃຫ້ເຜົ່າຊົນສ່ວນໜ້ອຍ” ແລະ ເປີດໂຕໂຄງການ “ພັດທະນາເສດຖະກິດ-ສັງຄົມ ແລະ ຫຼຸດຜ່ອນຄວາມທຸກຍາກດ້ວຍຫຼາຍທິດທາງໃນຫວຽດນາມ 2020-2025”

ໂຄງການໃຫ້ຄຳປຶກສາດ້ານນະໂຍບາຍ ແລະ ສະໜັບສະໜູນດ້ານເຕັກນິກໃຫ້ຄະນະກຳມະການຊົນເຜົ່າ ແລະ ບັນດາແຂວງທີ່ເຂົ້າຮ່ວມປະຕິບັດຈຸດໝາຍແຫ່ງຊາດໃນການພັດທະນາເສດຖະກິດ-ສັງຄົມໃນເຂດຊົນເຜົ່າສ່ວນໜ້ອຍ ແລະ ເຂດພູດອຍໃນໄລຍະປີ 2021-2030 ບັນດາຕາແສງທຸກຍາກໃຫ້ຫຼູດລົງ 50% ໃນປີ 2025 ແລະ ໂດຍພື້ນຖານແມ່ນບໍ່ໃຫ້ມີຕາແສງທີ່ທຸກຍາກອີກໃນປີ 2030. ໂຄງການດັ່ງກ່າວຈະຈັດຕັ້ງປະຕິບັດເປັນສອງໄລຍະ: ໄລຍະທີ 1(ເດືອນມີຖຸນາ 2020 ຫາ ເດືອນທັນວາ 2021) ແລະ ໄລຍະທີ່ 2 ຈະເປີດກວ້າງໂຄງການອອກໄປສູ່ແຂວງອື່ນໆ(ວັນທີ 1 ກຸມພາ 2022 ຫາ ເດືອນທັນວາ 2025) ດ້ວຍງົບປະມານ 1.908,338 ໂດລາ, ໃນນັ້ນ ໄລຍະທີ 1  737.938 USD.

ໃນກອງປະຊຸມແມ່ຍິງຊົນເຜົ່າສ່ວນໜ້ອຍທີ່ມາຈາກແຕ່ລະແຂວງເຊັ່ນ: ບັກການ, ດັກນົງ, ລາວກາຍ ແລະ ເຊີນລາ ຍັງໄດ້ແບ່ງປັນບົດຮຽນກ່ຽວກັບການເສີມຂະຫຍາຍກຳລັງແຮງຂອງແມ່ຍິງຊົນເຜົ່າສ່ວນໜ້ອຍ, ວິທີການຊ່ວຍເຫຼືອໃຫ້ພວກເຂົາຫຼຸດພົ້ນອອກຈາກຄວາມທຸກຍາກ.