ລັດຖະມົນຕີ ວູຮຸຍຮວ່າງ ຫວຽດນາມ ຖືກຟ້ອງຂຶ້ນສານ ວັນທີ 7 ມັງກອນ 2021

ການດຳເນີນຄະດີກັບ ລັດຖະມົນຕີ ກະຊວງອຸດສາຫະກຳ ແລະ ການຄ້າຂອງຫວຽດນາມ ວູຮຸຍຮວ່າງ  ຖືກຟ້ອງຂຶ້ນສານເບີກຄວາມ ໃນວັນທີ 7 ມັງກອນທີ່ຈະມາເຖິງ ພ້ອມກັບພວກອີກ 4 ຄົນ.

ວູຮຸຍຮວ່າງ ເປັນລັດຖະມົນຕີ ກະຊວງອຸດສາຫະກຳ-ການຄ້າຂອງຫວຽດນາມ ເມື່ອເດືອນ ສິງຫາ 2007, ໄດ້ຈັດສັນເອົາທີ່ດິນ 2-4-6 ຢູ່ຄຸ້ມ ຮາຍບາຈຶງ ນະຄອນໂຮ່ຈິມິນ ໃຫ້ກັບບໍລິສັດ Sabeco ຊຶ່ງເປັນບໍລິສັດຂອງລັດ ຂຶ້ນກັບຄວາມຮັບຜິດຊອບຂອງກະຊວງອຸດສາຫະກຳ-ການຄ້າ.

ບໍລິສັດດັ່ງກ່າວບໍ່ໄດ້ຂຶ້ນທະບຽນເປັນ ນິຕິບຸກຄົນຕາມກົດໝາຍ ແຕ່ ທ່ານ ວູຮຸຍຮວ່າງ ໄດ້ຮັບຮູ້ ແລະ ອະນຸຍາດໃຫ້ບໍລິສັດດຳເນີນທຸລະກິດ ແລະ ສ້າງຕັ້ງບໍລິສັດ Sabeco Pearl ຂຶ້ນ ໃນເນື້ອທີ່ 6.000 ມ² ຊຶ່ງບໍ່ຖືກຕ້ອງຕາມກົດໝາຍ. ດິນຕອນນີ້ມີມູນຄ່າ 3.000 ຕື້ດົງ ແຕ່ຖືກບຸກຄົນຢຶດເອົາໄປ ເຮັດໃຫ້ລັດເສຍຫາຍເຖິງ 2,713 ຕື້ດົງ.

ສ່ວນຮອງລັດຖະມົນຕີກະຊວງອຸດສາຫະກຳ-ການຄ້າ ຖືກໂທດທາງອາຍາ ແຕ່ຜູ້ກ່ຽວໄດ້ຫຼົບໜີກ່ອນ ຈຶ່ງໄດ້ແຍກອອກເພື່ອດຳເນີນຄະດີສະເພາະ.