Pfizer ແລະ Moderna ກຳລັງທົດລອງເບິ່ງວ່າວັກຊີນສາມາດປ້ອງກັນໂຄວິດ-19 ກາຍພັນທີ່ກຳລັງລະບາດຢູ່ອັງກິດໄດ້ ຫລື ບໍ່
Pfizer-BioNTech ແລະ Moderna ຜູ້ພັດທະນາວັກຊີນຕ້ານໂຄວິດ-19 ໃນລະດັບແນວໜ້າຂອງໂລກ ເປີດເຜີຍວ່າ: ກຳລັງຢູ່ລະຫວ່າງການທົດລອງເພື່ອເບິ່ງວ່າ: ວັກຊີນໂຄວິດ-19 ຂອງຕົນ ມີປະສິດທິພາບພຽງພໍໃນການປ້ອງກັນການແຜ່ລະບາດຂອງໂຄວິດ-19 ສາຍພັນໃໝ່ທີ່ກຳລັງລະບາດໜັກຢູ່ອັງກິດ ແລະ ມີອັນຕະລາຍຈາກຄວາມສາມາດໃນການແຜ່ເຊື້ອໄດ້ສູງເຖິງ 70%.
ທ່ານ ດຣ. ອູກູ ຊາຮິນ CEO ຂອງ BioNTech ກ່າວວ່າ: ທາງບໍລິສັດໝັ້ນໃຈວ່າວັກຊີນຕ້ານໂຄວິດ-19 ທີ່ພັດທະນາຮ່ວມກັບ Pfizer ຈະຍັງມີປະສິດທິພາບໃນການຕໍ່ຕ້ານເຊື້ອໄວຣັສສາຍພັນໃໝ່ນີ້ ເຊິ່ງຕາມຫລັກການທາງວິທະຍາສາດມີທ່າອ່ຽງສູງທີ່ການກະຕຸ້ນພູມຄຸ້ມກັນຈາກວັກຊີນຂອງທາງບໍລິສັດ ຈະສາມາດຮັບມືການແຜ່ລະບາດຂອງໄວຣັສທີ່ກາຍພັນນີ້ໄດ້.
ໂດຍຫົນທາງດຽວທີ່ຈະຮູ້ວ່າວັກຊີນນັ້ນມີປະສິດທິພາບ ຫລື ບໍ່ຄື: ຜົນການທົດລອງ ເຊິ່ງຄາດວ່າຕ້ອງໃຊ້ເວລາປະມານ 2 ອາທິດ. ຂະນະທີ່ທ່ານ ດຣ. ອູກູ ໝັ້ນໃຈວ່າ: ຖ້າຕ້ອງຜະລິດວັກຊີນຊະນິດໃໝ່ ຈະສາມາດຜະລິດໄດ້ພ້ອມນຳໃຊ້ພາຍໃນເວລາ 6 ອາທິດ.
ຂະນະທີ່ Pfizer ບໍລິສັດຢາຍັກໃຫຍ່ຂອງອາເມລິກາ ລະບຸວ່າ: ໄດ້ເລີ່ມສ້າງຂໍ້ມູນເພື່ອເບິ່ງວ່າຕົວຢ່າງເລືອດຈາກຜູ້ທີ່ໄດ້ຮັບວັກຊີນນັ້ນສາມາດຕໍ່ຕ້ານໄວຣັສສາຍພັນໃໝ່ນີ້ໄດ້ ຫລື ບໍ່.
ສ່ວນ Moderna ຜູ້ພັດທະນາວັກຊີນໂຄວິດ-19 ທີ່ໄດ້ຮັບການອະນຸມັດນຳໃຊ້ຢູ່ອາເມລິກາ ເປັນຊະນິດທີ 2 ລະບຸວ່າ: ຈາກຂໍ້ມູນທີ່ມີຢູ່ຕອນນີ້ບົ່ງບອກວ່າ: ວັກຊີນຂອງ Moderna ນັ້ນສາມາດກະຕຸ້ນພູມຄຸ້ມກັນທີ່ຈະຕ້ານທານໂຄວິດ-19 ສາຍພັນໃໝ່ທີ່ກຳລັງແຜ່ລະບາດຢູ່ອັງກິດໄດ້, ແຕ່ຈະຕ້ອງມີການທົດລອງເພີ່ມຕື່ມ ເພື່ອຢືນຢັນຜົນໃນອີກບໍ່ເທົ່າໃດອາທິດຂ້າງໜ້າ.
ສຳລັບສະຖານະການການລະບາດຂອງໂຄວິດ-19 ສາຍພັນໃໝ່ຢູ່ອັງກິດນັ້ນພົບວ່າ: ມີການແຜ່ກະຈາຍຢ່າງວ່ອງໄວ ແລະ ມີຜູ້ຕິດເຊື້ອໃນນະຄອນຫລວງລອນດອນ ລວມທັງພື້ນທີ່ທາງຕາເວັນອອກສຽງໃຕ້ຂອງອັງກິດ ສົ່ງຜົນໃຫ້ເກີດຄວາມກັງວົນວ່າ: ສະຖານະການການລະບາດອາດຮຸນແຮງຈົນເກີນຄວບຄຸມ ເຊິ່ງມາຮອດຕອນນີ້ມີ 40 ກວ່າປະເທດທົ່ວໂລກທີ່ປິດຊາຍແດນ ແລະ ໂຈະການເດີນທາງເຂົ້າ-ອອກຈາກອັງກິດແລ້ວ.
