ອຸຕຸເຕືອນໃຫ້ລະວັງອາກາດຈະໜາວເຢັນລົງ 2 ຫາ 4 ອົງສາ ໃນໄລຍະວັນທີ 21-27 ທັນວານີ້

ກົມອຸຕຸນິຍົມ ແລະ ອຸທົກກະສາດ ເຕືອນວ່າ: ໃນໄລຍະວັນທີ 21-27 ທັນວານີ້ອາກາດຈະຫນາວເຢັນລົງແຕ່ 2-4 ອົງສາ ເນື່ອງຈາກວ່າໃນລະຫ່ວາງວັນທີ 21-24 ທັນວາ ມວນອາກາດເຢັນຈາກປະເທດຈີນຈະມີກຳລັງແຮງເພີ່ມຂຶ້ນແຜ່ລົງມາປົກຄຸມຢູ່ທົ່ວທຸກພາກຂອງປະເທດເຮົາ ດ້ວຍກຳລັງປານກາງຫາແຮງ, ສົມທົບກັບລົມຕາເວັນອອກສ່ຽງເໜືອມີກໍາລັງແຮງພັດປົກຄຸມເປັນສ່ວນໃຫຍ່ ເຊິ່ງຈະເຮັດໃຫ້ອາກາດໜາວເຢັນລົງຫລາຍ ໂດຍສະເພາະຢູ່ແຂວງພາກເໜືອ, ເຂດພູສູງ ແລະ ພູດອຍເຊັ່ນ: ໄຊສົມບູນ ແລະ ເຂດພູພຽງບໍລິເວນ, ພ້ອມມີໝອກໜາປົກຫຸ້ມຢູ່ທົ່ວໄປໃນຕອນກາງຄືນຫາຕອນເຊົ້າ, ສ່ວນພາກກາງ ແລະ ພາກໃຕ້ອາກາດໜາວເຢັນ ພ້ອມມີໝອກບາງປົກຫຸ້ມຢູ່ທົ່ວໄປ ແລະ ມີລົມພັດແຮງເປັນບາງໂອກາດຢູ່ບາງທ້ອງຖິ່ນ.

ໄລຍະວັນທີ 24-27 ທັນວາ, ຄວາມກົດດັນສູງຂອງອາກາດເຢັນຍັງປົກຄຸມຢູ່ທົ່ວທຸກພາກຂອງປະເທດດ້ວຍກຳລັງປານກາງ, ສົມທົບກັບລົມຕາເວັນອອກ-ຕາເວັນອອກສ່ຽງເໜືອພັດປົກຄຸມ ຈະເຮັດໃຫ້ອາກາດເຢັນພ້ອມມີໝອກບາງປົກຫຸ້ມໃນຕອນເຊົ້າ ແລະ ຕອນບ່າຍອາກາດຈະອຸ່ນຂຶ້ນຢູ່ທົ່ວໄປ. ດັ່ງນັ້ນ, ຈຶ່ງແຈ້ງເຕືອນເຖິງປະຊາຊົນ, ອຳນາດການປົກຄອງ ແລະ ອົງການຈັດຕັ້ງທຸກພາກສ່ວນຈົ່ງມີສະຕິກຽມພ້ອມຮັບມືກັບສະພາບການປ່ຽນແປງຂອງອາກາດໜາວດັ່ງກ່າວ ຊຶ່ງອາດຈະມີຜົນກະທົບຕໍ່ສຸຂະພາບ ໂດຍສະເພາະແມ່ນເດັກນ້ອຍ ແລະ ຜູ້ເຖົ້າຂໍໃຫ້ນຸ່ງຫົ່ມໃຫ້ອົບອຸ່ນຢູ່ສະເໜີ, ພ້ອມໃຫ້ເອົາໃຈໃສ່ຕິດຕາມຂ່າວພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດເປັນປະຈຳ.