ກະຊວງສືກສາດໍາເນີນກອງປະຊຸມຜູ້ບໍລິຫານເປີດກວ້າງ

ກອງປະຊຸມຜູ້ບໍລິຫານເປີດກວ້າງ 6 ເດືອນຕົ້ນປີ 2017 ຂອງກະຊວງສຶກສາທິການ ແລະ ກິລາໄດ້ຈັດຂຶ້ນໃນວັນທີ 4-6 ກໍລະກົດນີ້ທີ່ສະຖາບັນຄົ້ນຄວ້າວິທະຍາສາດການສຶກສາ, ໂດຍການເປັນປະທານຂອງທ່ານລັດຖະມົນຕີກະຊວງສຶກສາທິການ ແລະ ກິລາ ນາງ ແສງເດືອນ ຫລ້າຈັນທະບູນ, ເພື່ອທົບທວນຄືນການຈັດຕັ້ງປະຕິບັດວຽກງານຕ່າງໆໃນຂະແໜງການສຶກສາ ແລະ ກິລາໃນໄລຍະ 6 ເດືອນຜ່ານມາ ແລະ ແຜນວຽກຈຸດສຸມ 6 ເດືອນທ້າຍປີ, ໂດຍສະເພາະຫາລືການກໍານົດຕົວຊີ້ບອກຂອງຂະແໜງການສຶກສາ ແລະ ກິລາໃນໄລຍະໃໝ່, ໂຄງການທົດລອງສໍາລັບການພັດທະນາການສຶກສາຢູ່ເຂດຫ່າງໄກສອກຫລີກ, ການຄຸ້ມຄອງສະຖາບັນການສຶກສາເພື່ອໃຫ້ຫ່າງໄກຈາກແຫລ່ງອະບາຍຍະມຸກຕ່າງໆ. ນອກຈາກນີ້ຍັງໄດ້ຫາລືກ່ຽວກັບການຫັນປ່ຽນວຽກແຜນການລົງທຶນໃນປີ 2018 ເພື່ອປະຕິບັດຕາມຄໍາສັ່ງວ່າດ້ວຍການປະຢັດລາຍຈ່າຍງົບປະມານຂອງລັດ, ທີ່ອາດມີຜົນກະທົບຕໍ່ການກໍ່ສ້າງພື້ນຖານໂຄງລ່າງຂອງຂະແໜງສຶກສາ ແລະ ກິລາ. ພ້ອມທັງຄົ້ນຄວ້າບັນດາມາດຕະການ ແລະ ກົນໄກການຈັດຕັ້ງປະຕິບັດວຽກງານສາມສ້າງໃນຂະແໜງສຶກສາ ແລະ ກິລາ ເພື່ອຮັບປະກັນໃຫ້ບຸກທະລຸລົງເຖິງຮາກຖານຢ່າງມີປະສິດທິຜົນ.