ນາຍົກລັດຖະມົນຕີ ເນັ້ນໃຫ້ທຸກຄົນມີສະຕິລະວັງຕົວ ໃນການຕ້ານ ແລະ ສະກັດກັ້ນພະຍາດໂຄວິດ-19

ໃນວັນທີ 22 ທັນວານີ້, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ຖະແຫລ່ງຂ່າວຜ່ານສື່ມວນຊົນ ເພື່ອສື່ສານເຖິງພີ່ນ້ອງຊາວລາວໃນທົ່ວປະເທດໃຫ້ມີສະຕິລະວັງຕົວ ແລະ ເອົາໃຈໃສ່ຮ່ວມມືກັບລັດຖະບານ ແລະ ໜ່ວຍງານທີ່ກ່ຽວຂ້ອງໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ທີ່ອາດຈະເກີດຂຶ້ນຮອບໃໝ່ຢູ່ລາວເຮົາ ເນື່ອງຈາກວ່າພະຍາດໂຄວິດ-19 ກໍາລັງເປັນໄພຄຸກຄາມຕໍ່ໂລກ ແລະ ຕໍ່ປະເທດເຮົານັບມື້ນັບເພີ່ມຂຶ້ນ ຊຶ່ງຍັງບໍ່ທັນມີກຳລັງແຮງໃດໆມາສະກັດກັ້ນໄດ້ເທື່ອ ແລະ ຄາດວ່າອີກສອງສາມວັນຂ້າງໜ້າ ຈະມີຜູ້ຕິດເຊື້ອສະສົມເຖິງ 80 ລ້ານຄົນ ແລະ ຈໍານວນຕົວເລກຜູ້ເສຍຊີວິດກໍອາດຈະເພີ່ມຂຶ້ນເຖິງ 2 ລ້ານຄົນໃນທົ່ວໂລກ. ສິ່ງທີ່ເປັນອັນຕະລາຍຍິ່ງໄປກວ່ານັ້ນ ແມ່ນນັກວິທະຍາສາດການແພດໃນໂລກໃຫ້ຮູ້ວ່າ: ພະຍາດນີ້ໄດ້ມີການກາຍພັນເປັນພັນທີ່ຮ້າຍແຮງຂຶ້ນກວ່າເກົ່າ, ການແຜ່ເຊື້ອຈະມີຄວາມໄວຂຶ້ນ ແລະ ສະລັບສັບຊ້ອນກວ່າສາຍພັນເດີມ ແລະ ການກວດເຫັນຜູ້ຕິດເຊື້ອປັດຈຸບັນນີ້ສ່ວນຫລາຍບໍ່ມີອາການ ເຊິ່ງເຮັດໃຫ້ການປ້ອງກັນ, ຄວບຄຸມ ຍິ່ງເພີ່ມຄວາມຫຍຸ້ງຍາກສັບສົນຂຶ້ນຕື່ມ ແລະ ໄດ້ເກີດຂຶ້ນຢູ່ບາງປະເທດເພື່ອນບ້ານທີ່ມີຊາຍແດນຕິດກັບປະເທດເຮົາແລ້ວ. ດັ່ງນັ້ນ, ຈິ່ງຮຽກຮ້ອງໃຫ້ພວກເຮົາຕ້ອງເພີ່ມສະຕິລະວັງຕົວໃຫ້ສູງກວ່າເກົ່າ ເພື່ອຮັບມືກັບໄພອັນຕະ ລາຍນີ້ຢ່າງຈິງຈັງ, ບໍ່ດັ່ງນັ້ນ ໂຄວິດ-19 ຈະສາມາດກັບມາປະເທດເຮົາຮອບໃໝ່ ຊຶ່ງຈະຮ້າຍແຮງກວ່າເກົ່າ ແລະ ເຮັດໃຫ້ການຄວບຄຸມຈະພົບກັບຄວາມສ່ຽງສູງສຳລັບປະເທດ ແລະ ປະຊາຊົນເຮົາ.

ທ່ານນາຍົກໃຫ້ຮູ້ວ່າ: ໃນສະພາບດັ່ງກ່າວ ຈຶ່ງໄດ້ຮຽກປະຊຸມຄະນະສະເພາະກິດກ່ຽວກັບການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໃນປະເທດເຮົາ ແລະ ໄດ້ໃຊ້ເວລາຫລາຍຊົ່ວໂມງເພື່ອຄົ້ນຄວ້າ, ວິໄຈ ແລະ ປະເມີນສະຖານະການການແຜ່ລະບາດຂອງພະຍາດນີ້ ໃນທົ່ວໂລກ, ອາຊຽນ ແລະ ບັນດາປະເທດໃກ້ຄຽງທີ່ມີຊາຍແດນຕິດກັບປະເທດເຮົາ ກໍຄືຢູ່ໃນປະເທດເຮົາຢ່າງລະອຽດຖີ່ຖ້ວນ ແລະ ເລິກເຊິ່ງ, ພ້ອມນີ້ກອງປະຊຸມຍັງໄດ້ຕີລາຄາຢ່າງຊັດເຈນວ່າ: ໃນໄລຍະຜ່ານມາ ປະເທດພວກເຮົາສາມາດຄວບຄຸມ, ປ້ອງກັນ ແລະ ແກ້ໄຂບັນຫານີ້ໄດ້ດີ, ມີຜູ້ຕິດເຊື້ອສະສົມບໍ່ຫລາຍ ແລະ ບໍ່ທັນມີຜູ້ເສຍຊີວິດ, ການປີ່ນປົວຜູ້ຕິດເຊື້ອກໍມີຜົນສຳເລັດເປັນຢ່າງດີ.

ເຖິງແນວໃດກໍຕາມ, ທ່ານນາຍົກລັດຖະມົນຕີ ໄດ້ມີຄຳແນະນຳພາກສ່ວນກ່ຽວຂ້ອງ ແລະ ຮຽກ ຮ້ອງມາຍັງພໍ່ແມ່ພີ່ນ້ອງລາວທຸກໆຄົນ ໂດຍສະເພາະໃຫ້ຄະນະສະເພາະກິດທົບທວນຄືນຄຳສັ່ງສະບັບເລກທີ 06/ນຍ, ລົງວັນທີ 29 ມີນາ 2020 ແລະ ທົບທວນຄືນເບິ່ງວ່າ ບັນດາມາດຕະການຜ່ອນຜັນຈາກຄໍາສັ່ງນີ້ຈະກັບມາໃຊ້ອັນໃດ ແລະ ຈະມີມາດຕະການເພີ່ມເຕີມອັນໃດແດ່ ເພື່ອຮັບມືກັບສະພາບການໃໝ່. ແຕ່ສິ່ງທີ່ຈະຕ້ອງປະຕິບັດນັບແຕ່ມື້ນີ້ເປັນຕົ້ນໄປ ແມ່ນໂຈະການອະນຸຍາດໃຫ້ພົນລະເມືອງຢູ່ບັນດາປະເທດທີ່ມີການລະບາດຂອງໂຄວິດ-19 ໃນຊຸມຊົນເຂົ້າປະເທດເຮົາ, ສືບຕໍ່ປິດດ່ານປະເພນີ, ດ່ານທ້ອງຖິ່ນ, ສືບຕໍ່ຢຸດຕິການເປີດໃຫ້ມີຖ້ຽວບິນເໝົາລໍາໄປ-ມາຈາກຕ່າງປະເທດໃນໄລຍະນີ້, ນອກຈາກກໍລະນີຈຳເປັນແທ້ໆ, ແຕ່ຕ້ອງໄດ້ຂໍອະນຸຍາດທຸກໆຄັ້ງ; ໃຫ້ສືບຕໍ່ກະກຽມສະຖານທີ່ກັກກັນຊົ່ວຄາວໃຫ້ມີມາດຕະຖານທີ່ດີກວ່າເກົ່າ ແລະ ຫລາຍກວ່າເກົ່າ, ກຽມເພີ່ມສະຖານທີ່, ຢາ, ອຸປະກອນຕ່າງໆ ເພື່ອຮັບໃຊ້ການປີ່ນປົວຜູ້ຕິດເຊື້ອໂຄວິດ-19 ແລະ ໃຫ້ຄາດຄະເນລ່ວງໜ້າໃຫ້ເໝາະສົມ ເພື່ອຮັບມືເມື່ອມີເຫດສຸກເສີນ ແລະ ກໍລະນີມີຜູ້ຕິດເຊື້ອຂະຫຍາຍກວ້າງ ແລະ ໄວ. ຂະນະດຽວກັນ ກໍໃຫ້ກະກຽມກ່ຽວກັບການຮັບເອົາການຊ່ວຍເຫລືອຢາວັກຊີນຈາກປະເທດເພື່ອນມິດ ແລະ ອົງການຈັດຕັ້ງສາກົນທີ່ໄດ້ເຊັນຮ່ວມກັນມາແລ້ວ ເພື່ອນໍາວັກຊີນມາສັກໃຫ້ປະຊາຊົນ, ກ່ອນອື່ນແມ່ນບັນດາກຸ່ມເປົ້າໝາຍສ່ຽງໃຫ້ໄດ້ໄວເທົ່າທີ່ຈະໄວໄດ້, ພ້ອມທັງໃຫ້ກຽມງົບປະມານເພື່ອສັ່ງຊື້ຢາວັກຊີນຕື່ມອີກ ເພື່ອໃຫ້ປະຊາຊົນລາວໄດ້ຮັບການສັກຢາວັກຊິນນີ້ຢ່າງເໝາະສົມໃນເວລາອັນຄວນ.

ພ້ອມກັນນັ້ນ ຂໍຮຽກຮ້ອງໃຫ້ປະຊາຊົນທຸກຄົນປະຕິບັດໄລຍະຫ່າງ, ບໍ່ສຳຜັດມືໃນເວລາພົບກັນ (ໃຫ້ໃຊ້ການຍົກມືນົບທັກທາຍຕາມປະເພນີລາວເຮົາ ຊຶ່ງທັງງົດງາມ ແລະ ປອດໄພ), ໃຫ້ທຸກໆຄົນໃຊ້ຜ້າອັດປາກ-ອັດດັງໃນເວລາຢູ່ໃນຊຸມຊົນ, ໃນເວລາອອກຈາກເຮືອນໄປ-ມາຢ່າງເຄັ່ງຄັດ ຍ້ອນໄລຍະນີ້ຢູ່ປະເທດເຮົາພວມມີວັນສຳຄັນຂອງພັກ ແລະ ຂອງຊາດຫລາຍ ຈຶ່ງຂໍໃຫ້ທຸກຄົນຈົ່ງປະຕິບັດໄລຍະຫ່າງ ແລະ ໃສ່ຜ້າອັດປາກ-ອັດດັງຢ່າງເຄັ່ງຂັດ, ລ້າງມື, ສີດຢາຂ້າເຊື້ອທຸກໆຄັ້ງໃຫ້ທຸກໆຄົນກ່ອນເຂົ້າຮ່ວມງານຕ່າງໆ; ພ້ອມກັນນັ້ນ ກໍໃຫ້ຈຳກັດງານດອງໃຫ້ກະທັດຮັດ, ບໍ່ອະນຸຍາດໃຫ້ຈັດງານຄອນເສີດ, ງານລາຕີສະໂມສອນ ແລະ ຮຽກຮ້ອງບໍ່ໃຫ້ມີການຈັດງານສະຫລອງປີໃໝ່ສາກົນທີ່ຈັດເປັນງານໃຫຍ່, ຂໍໃຫ້ສະຫລອງຢູ່ກັບເຮືອນພາຍໃນຄອບຄົວຂອງໃຜລາວ ຊຶ່ງຖືວ່າມີຄວາມອົບອຸ່ນກວ່າ ແລະ ປອດໄພກວ່າ, ພ້ອມໃຫ້ເປັນເອກະພາບກັນຖືຄຳຂວັນທີ່ວ່າ: “ຮ່ວມແຮງຮ່ວມໃຈສູ້ໄພໂຄວິດ” ໃຫ້ກາຍເປັນພາກປະຕິບັດທີ່ແທ້ຈິງ.